Tobiti 8 - ÎVUKU RÎA ÛVORO MWARO

Ngoma nîyengatirwe

¹ Rîrîa maarîkirie kûrîa, aciari a Sara nîmaaumagaririe Tobiasi akîthiî toro.

² Tobiasi nîwaririkanire ûrîa aathîtwe nî Rafaeli, nîwocire îtema rîa nthamaki na ngoro kuuma mûvukorî varîa aacigîte. Agîcoka agîcigîrîra ûbani ûkîvîcaga.

³ Rîrîa ngoma yagucirie mûnungo ûcio nîyathiîre Misiri nake mûraika akîmwova kuo.

Îvoya rîa Tobiasi

⁴ Mûrango ûrî mûvinge na marî onga nyomba, Tobiasi nîwaumire ûrîrî na akiuga atîrî, “Mwarwaiya, ûkîra tûvoe nîguo Mwathani atwîguîre ntha.”

⁵ Nake Tobiasi nîwambîrîrie kûvoya atîrî, “Ûrokumua we Ngai wa methe metû na rîîtwa rîaku rîtheru na rîrî riiri rîrokumua tene na tene. Tiga îgûrû na ciûmbe cionthe ciaku igûkumie.

⁶ We nîwaûmbire Adamu na ûkîmûva mûka Awa, nîguo atuîke mûmûtethia na mûmûtirîrîri. Nîmaatuîkire aciari a andû onthe. We nîwaugire atî, ‘Tîwaro mûndûmûrûme atûûre arî wenga. Nîngûmûmbîra mûndû wa kûmûtethagia.’

⁷ Rîu Mwathani nînthuurîte Sara nîûndû wa wagîrîru wake, na tî ûndû wa merirîria macûku. Nakûthaitha ûtwîguîre ntha, na ûtûme twîkaranie vamwe nginya ûkûrûrî wetû.”

⁸ Nao oîrî makiuga “Ameni.”

⁹ Nao nîmaacokire makîthiî kûmama. Nwatî Ragueli nîwaramûkire na akîthiî na akînja mbîrîra,

Aciari nîmaathînîkire Ngororî

¹⁰ agîîciragia atî, “Nwakwîthîrwa wanake agaakua.”

¹¹ Rîrîa maarîkirie kwînja mbîrîra, Ragueli nîwatonyire nyomba na akîra mûka atîrî,

¹² “Tûma ûmwe wa ndungata ciaku cia erîtu akamenye kana Tobiasi arî mwoyo. Ethîrwa ndarî mwoyo, tûmûthike andû matarî amenyu.”

¹³ Kwoguo ndungata nîyavingûrire mûrango, îgîtonya na îkîmethîrîria marî toro wa oîrî.

¹⁴ Kwoguo ndungata îo nîyacokire na îkîra Ragueli na Edina atî Tobiasi aarî mwoyo.

¹⁵ Ragueli nîwacokire agîkumia Ngai wa îgûrû na akiuga atîrî: “Ûrokumua we Ngai na ngoro ntheru, araika aku onthe na andû arîa atheru nîmagûkumie tene na tene.

Îvoya rîa Ragueli

¹⁶ Ûrokumua we Mwathani nîûndû nîûtûmîte ngena, ûrîa nerîgîrîrîte tîguo gwîkarire, nwatî we nîûtwîguîrîrîte ntha nyîngî.

¹⁷ Ûrokumua we Mwathani nîûndû nîwîguîrîrîte ciana igîrî ntha. Meguîrîre ntha we Mwathani, tûma matûûre marî akenu na marî na wendo.”

¹⁸ Ragueli nîwacokire akîatha ndungata ciake ithike mbîîrîra mbere ya riûa riume.

Kîrugo kîa ûviki

¹⁹ Ragueli nîwerire mûka akande mîgate ya kwîgana, agîcoka akîthiî ndîthiarî yake na agîûka na ndegwa igîrî na ndûrûme inya na akîatha ndungata ciake ithînje nîguo kîrugo Kîammbîrîrie.

²⁰ Mbere ya mîthenya ya kîrugo îthira, Ragueli nîweranîre na mwîvîtwa kûrî Tobiasi atî ndagîrîrwe nî kûthiî nginya mîthenya îkûmi na îna ya gûkûngûîra ûviki îthire.

²¹ Ûgacoka woce nuthu ya indo ciakwa ûthiî kûrî aciari aku ûrî mûgima. Nie na Edina twakua, nîûkagaa nuthu îo îngî ya ûtonga wakwa. Îîyûmîrîrie mwana wakwa! Kuuma rîu tûrî aciari aku wata ûrîa Sara arî mwana wetû. Îîyûmîrîrie mwana wakwa!