Tobiti 6 - ÎVUKU RÎA ÛVORO MWARO

Tobiasi nîwanyitire nthamaki

¹ Tobiasi na mûraika nîmambîrîria kûthiî merekerete Media, na makîthiî na ngui ya Tobiasi. Maathiîre gûgîtuka magîcoka makîamba magema rûtere rwa rûnjî rwa Tigiri.

² Tobiasi nîwathiîre kwîthambia magûrû kûu rûnjîrî nayo nthamaki nene nîyarûgire kuuma manjîrî na îkîgeria kûmûmeria. Tobiasi nîwaugîrîrie,

³ nake mûraika akîmwîra atîrî, “Nyita nthamaki îo! Ndûkareke îthiî.” Kwoguo Tobiasi nîwanyitire nthamaki na akîmîguucia rûtere rwa rûnjî.

⁴ Nake mûraika nîwamwîrire atîrî, “Tinania nthamaki îo maita maîrî na ûrute ngoro yayo, îtema na ndûrû. Cige nîûndû nwa itûmîrwe ta ndawa, nwatî ûte mara.”

⁵ Tobiasi nîwekire wata ûrîa mûraika aamwîrire. Nîwacokire akîruga nthamaki, akîrîa kanini na agîkîra îo îngî cumbî nîguo ndîgacûke. Andû acio oîrî nîmathiîcanirie vamwe nginya magîkuvîvîria Media.

⁶ Tobiasi nîwacokire akîûria atîrî, “Mûrata wakwa Azaria, nî mîrimû îrîkû îngîvonua nî ndûrû, ngoro kana îtema rîa nthamaki?”

⁷ Mûraika nîwacokirie atîrî, “Ngoro na îtema nwa ivîvue na ndogo ya cio igatûmîrwa kwîngata ngoma kana roho mûcûku ûrîa ûrathiria mûndû vinya. Ndogo îo yatogererua mûndû, kûthînîka kûu gûkathira wa rîmwe na mûndû ndakaathînîka rîngî.

⁸ Nwa ûtûmîre ndûrû kûthondeka mûndû ûrîa metho make magîte na rûûî. Wamîvaka methorî make na ûvuve rûûî nîacokaga kwona rîngî.”

Marî njîrarî mathiîte Ekibatana

⁹ Rîrîa maakinyire Media merekerete îtûûra rînene rîa Ekibatana,

¹⁰ Rafaeli nîwaugire atîrî, “Mûrwaiya Tobiasi!” Nake Tobiasi nîwetîkire atîrî, Îî. Nake mûraika nîwathiîre na mbere kuga atîrî, “Ûmûnthî nîtwîkara kwa Ragueli ûrîa wa mûvîrîga wenyu. Arî na mwana ûmwe tu wa mwîrîtu wîtagwa Sara.

¹¹ Wî vakuvî nake mûno kîmûvîrîga na nwa ûvikie Sara na ûkarîa ûkua wa indo ciake.

¹² Sara nî mûûgî, arî kîîo na nî mwaro na îthe nîamwendete mûno. Ûtukû ûyû ngaaria na îthe etîkîre ûvikie Sara. Vuvarî twacoka mûciî kuuma îtûûrarî rîa Ragesi nîtûgaakûngûîra ûviki. Ragueli ndangîrega ûvikia Sara na ndangîtîkîra mûndûmûrûme wîngî amûvikie. Angîtîkîria mûndûmûrûme wîngî amûvikie akethîrwa aunîte watho wa Musa, na kwaguo agîrîrwe nî kûragwa. Ragueli nîaicî atî we nîwe wenga tu wî na kîvooto gîa kûvikia mwarî na kûrîa ûkua wake. Kwoguo rûmîrîra mataaro makwa. Nîngwaria na Ragueli ûtukû wa ûmûnthî na kûvanga maûndû ma ûnyanya waku na Sara. Twacoka mûciî kuuma Ragesi nîtûgooca Sara tûthiî nake.”

¹³ Tobiasi nîwacokire akîra mûraika Rafaeli atîrî, “Mûrwaiya Azaria, nîmbîguîte atî mwîrîtu ûcio nîmûvecane kûrî arûme mûgwanja, na wa ûmwe aakucaga mbere ya amama nake.

¹⁴ Nîmbîguîte atî arûme acio maûragagwa nî ngoma na ndîûragaga Sara nwatî nîyûragaga mûndû wa wonthe ûgeragia kûmûkuvîvîria. Rîu nie nînie mwanake tu wa vava, nwatî nînîretigîra ngoma îo. Nîngîkua aciari akwa magaakua nî kîeva. Matirî na mwana wîngî wa mwanake wa kûmathika.”

¹⁵ Nwatî mûraika nîwamûcokerie atîrî, “Nîkwa ûtararirikana ciugo irîa aguo aakwîrire atî ûkaavikia mûndûmûka kuuma kûrî andû enyu. Kwoguo nthikîrîria waro. Ndûgatangîke nîûndû wa ngoma îo. Nîmbicî atî ûtukû ûyû Ragueli nîagwîtîkîra ûvikie Sara.

¹⁶ Wathiî nyombarî ya kûraara, ûgooca ngoro ya nthamaki na îtema na ûcigîrîre îgûrû rîa ûbani ûkîvîa,

¹⁷ nîguo mûruke ûcio wîcûre nyombarî îo. Rîrîa ngoma îkaaûnungîra, îkaathiî na ndîgacoka vakuvî na Sara rîngî. Na mbere ya mûmama vamwe, mûkaarûngama mûvoe Ngai wa îgûrû nîguo amwîguîre ntha na amûgitîre. Mûtikamake nîûndû aavecanirwe kûrî we kuuma tene. Nîûkaamûvonokia na nîûkaathiî nake na nîngwîvoka atî nîûkaagîa ciana nake!” Rîrîa Tobiasi egwire maûndû mau, nîwamwendire na akîmwîrirîria mûno.