Tobiti 5 - ÎVUKU RÎA ÛVORO MWARO

Tobiasi nîwevarîrie kûthiî

¹ Kwoguo Tobiasi nîwacokerie îthe atîrî, “Vava nîngwîka ûrîa wonthe ûmbîrîte mbîke.

² Nwatî nîngînyita mbeca icio atîa kuuma kûrî Gabaeli na ndimwîcî? Ngeemenyithia atîa kûrî ke nîguo etîkîre kûmva mbeca icio? Makîria ya ûguo ndicî njîra îrîa îthiîte Media.”

³ Kwoguo Tobiti nîwacokerie mûvîcî Tobiasi atîrî, “Gabaeli nanie nîtwandîkire maarûa ya kûnyitanîra na tûgîkîra mîvûri yetû. Nîtwacokire tûkîmîtembûrana na gatagatî wa mûndû akîthiî na gîcunjî kîmwe Kîam maarûa. Gîcunjî gîake nakigire vamwe na mbeca, nakîo gîcunjî kîu kîngî nîrî nakîo. Twegucanîre ûguo mîaka mîrongo îîrî mîthiru. Thiî ûcarie mûndû mwîvokeku mûthiî nake nginya Media na mwacoka nîngaamûrîva mûcara wake. Nwatî nwanginya woce mbeca irîa natigîre Gabaeli.”

Tobiasi nîwacemanirie na Rafaeli

⁴ Kwoguo Tobiasi nîwathiîre gûcaria mûndû ûngîmenya njîra ya kûthiî Media nîguo mathiî nake. Auma mûciî, nîwacemanirie na Rafaeli metho kwa metho. Tobiasi ndaamenyaga kana Rafaeli nî mûraika wa Ngai,

⁵ kwoguo nîwamûririe atîrî, “Umîte kû?” Nake Rafaeli nîwamwîrire atîrî, “Nie nîrî Mûisiraeli ûmwe wa andû enyu a kûraca na mbûkîte gûkû Nineve gûcaria wîra.” Nake Tobiasi nîwamûririe atîrî, “Nîwicî njîra îrîa îthiîte Media?”

⁶ Nake Rafaeli nîwamûcokerie atîrî, “Îî, nînîmicî. Nanathiî Media maita meengî na nîmbicî njîra cionthe waro. Nîrî Media nekaraga kwa Gabaeli ûmwe wa andû etû, ûrîa wîkaraga îtûûrarî rîa Ragesi. Ragesi nî îtûûra rînene rîa Media na rîrî irîmarî na nî rûgendo rwa mîthenya îîrî kuuma Ekibatana.”

⁷ Tobiasi nîwacokire akîra Rafaeli atîrî, “Mbeterera ava mûrata wakwa nthiî ngere vava.”

⁸ Nake Rafaeli nîwamwîrire atîrî, “Thiî na ndûgekare mûno.” Kwoguo nîwathiîre na akîra îthe atîrî, “Nînona mûndû wa tûthiî nake.” Nake îthe nîwamwîrire atîrî, “Mwîte aûke nîguo menye aumîte mûvîrîgarî ûrîkû na menye kana nî mûndû mwîvokeku wa mûthiî nake.”

⁹ Kwoguo Tobiasi nîwetire Rafaeli na agîtonya ndaarî na magîkethania.

Tobiti nîwacemanirie na Rafaeli

¹⁰ Tobiti nîwamûririe atîrî, “Mûrata wakwa tambîra ûrî wa nyomba îrîkû na mûvîrîga ûrîkû.”

¹¹ Nwatî Rafaeli nîwamûririe atîrî, “Ûracaria mûvîrîga, nyomba kana ûracaria mûndû ûrîa ûkaarîva nîguo mathiîcanie na mûvîcîguo?” Nake Tobiti nîwamwîrire atîrî, “Mûrwaiya, nwa mende kûmenya andû enyu na rîîtwa rîaku.”

¹² Rafaeli nîwacokirie atîrî, “Nie mbîtagwa Azaria mûvîcî wa Anania ûrîa mûkûrû, ûmwe wa andû enyu.”

¹³ Tobiti nîwamûcokerie atîrî, “Nîtwakûnyita ûgeni gûkû gwetû mûrwaiya. Ndûkarakare nîûndû nîmendaga kûmenya mûvîrîga wenyu na nyomba yenyu. Ûrî wetû na umîte mûciî mwaro na wa vata. Nînaicî Anania na Jathani, avîcî a Shemaia ûrîa mûkûrû. Vîndî cionthe meethagîrwa marî evokeku kûrî ndini yao. Nîtwathiîcaga vamwe nao Jerusalemu kûgooca na kûruta matega ma mbere ma ndîthia cietû na ma irio cietû. Gîani na rûgendo rwaro.”

¹⁴ Tobiti nîwathiîre na mbere na akiuga atîrî, “Nîngûrîva mûcara ûrîa ûrîvanagwa wa mûthenya vamwe na matûmîri menyu muoîrî.

¹⁵ Kwoguo thiîni na Tobiasi na nîngaakwongerera mûcara ethîrwa nîmûgaacoka mûrî na thayû.” Nao nîmeetîkîrire.

¹⁶ Nîwacokire akîra Tobiasi atîrî, “Îîvarîrie kûthiî na namûvoera mûgîe na rûgendo rwaro muoîrî.” Kwoguo mûvîcî nîwavarîrîrie rûgendo. Nake îthe nîwamwîrire atîrî, “Thiîni na mûndû ûyû; Ngai wa îgûrû nîakûmûthondekera njîra cienyu nake mûraika wake aromwîkaria.” Kwoguo oîrî nîmaaumire nja na makîthiî na nîmaathiîre na ngui ya kamwana kau.

¹⁷ Nwatî ng'ina Ana nîwambîrîrie kûrîra na akîra Tobiti atîrî, “Warekia mwana wetû athiî nîkî? Nîke ûtûtethagîrîria, rîu nîûrîkû ûgaatûtethagia?

¹⁸ Mbeca icio nîkwa irî na vata mûno gûkîra mwana wetû atî nîguo ûrekererie nîguo athiî akaigîre?

¹⁹ Nîkwa tûtangîganîra na ûtûûro ûrîa tûvetwe nî Mwathani?”

²⁰ Nake Tobiti nîwamwîrire atîrî, “Ndûkamake mwarwaiyia; nîagaacoka arî mûgima na nîûkaamwona,

²¹ nîûndû mûraika mwaro nîakûthiî nake, na rûgendo rwake rûkethîrwa rûrî rwaro na nîagaacoka arî mûgima.” Kwoguo Ana nîwatigire kûrîra.