Tobiti 4 - ÎVUKU RÎA ÛVORO MWARO

Mataaro ma Tobiti kûrî Tobiasi

¹ Mûthenya wa ûcio, Tobiti nîwaririkanire mbeca irîa aatigîte irî na Gabaeli kûu Ragesi vûrûrirî wa Media.

² Kwoguo nîweciririe atîrî, “Nîûndû nîmvoete Ngai ngue, nîngwîta mwana wakwa Tobiasi na nîmwîre ûvoro wa mbeca icio mbere ya ngua.”

³ Kwoguo Tobiti nîwetire Tobiasi na akîmwîra atîrî, “Mwana wakwa, rîrîa ngaakua ûkaanthika ûrîa kwagîrîrîte. Na nwanginya ûtîîage nyûkwe, ûmûmenyagîrîre waro ûtûûrorî waku wonthe. Îkaga maûndû monthe marîa endaga wîke na ndûkamwîguithie kîeva.

⁴ Mwana wakwa, ririkana atî aarî na mathîna meengî nîûndû waku vîndî îrîa ûtaarî mûciare. Kwoguo vîndî îrîa agaakua ûkaamûthika vakuvî nanie.

⁵ “Mwana wakwa, ririkanaga Mwathani Ngai wetû vîndî cionthe na ndûkevie kana ûregana na maathani make. Vîndî cionthe îkaga ûndû ûrîa mwagîrîru na ndûkenyîtithanie na ûndû wa wonthe mûcûku.

⁶ Weka ûndû wa ma, maûndû monthe marîa ûgekaga makathiîcaga waro.

⁷ “Rutaga gîcunjî kîmwe Kîam indo ciaku ûkava athîni. Ndûgatiganîrie mûthîni nake Ngai ndagagûtiganîrîa.

⁸ Vecanaga kûringana na kîrîa ûrî nakîo. Ethîrwa wî na nyîngî nîwagîrîrwe nî kûvecana nyîngî. Wana ethîrwa ûrî na tûnini, ruta tûnini kuumana natuo.

⁹ Weka ûguo ûkeigîra mûthithû mwaro vîndî ya thîna,

¹⁰ nîûndû gûtethia athîni nîkûvonokagia mûndû ndagaakue na gûkagiria ndakathiî kwa arîa akuû.

¹¹ Andû arîa matethagia athîni nîmarutaga îtega rîaro mbere ya Ngai-Mûnene.

¹² “Mwana wakwa, îîmenyerere maûndûrî ma ûmaraa. Makîria ya ûguo vikia mûndûmûka kuuma mûvîrîgarî wa methe menyu. Ndûkavikie mûndûmûka kuuma mûvîrîgarî wîngî ûtarî wa methe menyu, nîûndû tûrî njiarwa cia arathi. Ririkana atî methe metû ma tene Nuhu, Iburahimu, Isaka na Jakovu maavikanîtie mîvîrîgarî yao. Ngai nîwamarathimire na ciana na njiarwa ciao nîikagaa vûrûri wa Isiraeli.

¹³ Mwana wakwa, endaga andû enyu na ndûkametîîre kana ûmena anake kana erîtu a andû enyu na njîra ya kûrega kûvikia mwîrîtu wao. Nîûndû mwîtîîo ûretaga gûcûkangua na kîvîngîcî kînene ta ûrîa ûgûûta ûretaga ûthîni na yûra rînene, nîûndû ûgûûta nî ng'ina wa yûra.

¹⁴ “Rîvaga aruti wîra aku wa mûthenya, ndûkaige mbeca ciao nginya mûthenya ûcio wîngî. Ûngîva Ngai gîtîîo agaakûrathima. Mwana wakwa îîmenyagîrîre maûndûrî monthe marîa wîkaga na wîthagîrwe na mîtugo mîaro vîndî cionthe.

¹⁵ Ndûgeke mûndû ûrîa ûtangîenda gwîkwa we mwene. “Ndûkanyue ndivei ûrîwa; kûnyua ndivei gûtigatuîke kamenyeri.

¹⁶ “Va arîa avûtu irio na arîa marî njaga ûmave nguo. Tethagia athîni ûrî na ûtana na wîkage ûguo ûkenete.

¹⁷ Mûndû mûvoi Ngai angîkua ruta irio irîwe nî andû ake, nwatî ndûgeke ûguo mûndû mwîvia akuîte.

¹⁸ “Voyaga ûtaaro kûrî andû arîa aûgî, na ndûkaire ûtaaro wa wonthe mwaro.

¹⁹ “Kumagia Mwathani Ngai waku vîndî cionthe. Mûvoyage akûrûngarîrie njîra ciaku na mîvango yaku yagagîre, nîûndû ndavecanaga ûûgî kûrî mavûrûri monthe. Nîke kiumo Kîam maûndû monthe maro, nwatî nwa agûcûkangie na agakûthiria angîenda gûgwîka guo. “Ririkana mataaro makwa monthe. Ndûkariganîrwe nîmo wanarî ndagîka îmwe.

²⁰ “Na rîu mwana wakwa, nîrenda gûkûmenyithia ûvoro wa mbeca nyîngî natigîre Gabaeli mûvîcî wa Gabaria îtûûrarî rîa Ragesi vûrûrirî wa Media.

²¹ Ndûkamake mwana wakwa, nîûndû atî rîu tûrî athîni. Ûngîathîkîra Ngai na wîtheme mevia, wîkage maûndû marîa mangîmûkenia ûrî na ûtonga mwîngî.”