Tobiti 3 - ÎVUKU RÎA ÛVORO MWARO

Îvoya rîa Tobiti

¹ Nîrî na kîeva kîngî mûno nînarîrire na ngîthirwa nî vinya na ngîvoya ngiugaga atîrî;

² “We Mwathani ûrî mûthingu, nîwîgucanagîra ntha na ciîko ciaku cionthe nî cia ma, na nîûvecanaga îtuîro rîa ma na rîagîrîru tene na tene.

³ Kwoguo we Mwathani ndirikana na ûndorie, ndûkamverithie nîûndû wa mevia makwa, kana nîûndû wa mavîtia makwa, kana mavîtia marîa mekirwe nî methe makwa.

⁴ Matiarûmîrîra maathani maku, watûtiganîrie tûkîtharîkîrwa, tûkîthamua na tûkîûragwa. Nîwatûmire tûtuîke andû matarî vata na a kûthekererwa, gatagatî ka mavûrûri monthe marîa twanyaganîrie.

⁵ Maita meengî wanatuîra methe makwa ma tene nîûndû wa mevia mao, na nîûmverithîtie nîûndû wa mevia makwa. Nîtwatigire gûkwîvoka na tûkîrega maathani maku, kwoguo tûverithagua ûrîa kwagîrîrîte.

⁶ Îka nanie ûrîa ûrona kwagîrîrîte. Oca mwoyo wakwa ûndute nthî îno, tiga mwîrî wakwa ûcoke mûtheturî. Nîkava nguîte gûkîra gûtûûra mwoyo, nîûndû numagwa ndarî na mavîtia, nîndete mwîvoko. Mwathani, wenda nduta mathînarî mama, ûmvire kîvurûkorî gîa tene na tene, ndûkarege kwîgua îvoya rîakwa.”

Mathîna ma Sara

⁷ Mûthenya wa ûcio îtûûrarî rînene rîa Ekibatana vûrûrirî wa Media nîgwatuîkîkire atî Sara mwarî wa Ragueli, nîwarumirwe nî ûmwe wa ndungata cia îthe cia erîtu.

⁸ Sara nîwavikîtue maita mûgwanja, nwatî roho wa ngoma njûku îtagwa Asimodeu, nîwaûragaga mûndûmûrûme wa wonthe mbere ya amenyana kîîmwîrî na mûka. Mwîrîtu ûcio nîwerire Sara atîrî, “Nîkwa ûtaicî nîwaûragire arûme aku? Nîwîthîrîtwe ûrî na arûme mûgwanja na gûtirî wanarî ûmwe wanakûva kaana.

⁹ Nîkwa ûratûvinyîrîria nîkî? Thiî ûrûmîrîre arûme acio akuû. Nîkava twîkare tûtona mwana waku!”

¹⁰ Rîrîa Sara eegwire ciugo icio nîweguire kîeva mûno na agîîciria kwîyûraga. Nwatî nîweîrire atîrî, “Ndikwîyûraga. Nie nînie mwana wenga kûrî vava. Nîngîka ûguo gîkethîrwa kîrî gîconoko kûrî ke na ndûme akue nî kîeva nîûndû nî mûkûrû.”

Îvoya rîa Sara

¹¹ Sara nîwarûngamire ndiricarî, akîambararia njara na akîvoya atîrî, “Ûrokumua we Mwathani Ngai wakwa, na rîîtwa rîaku rîtheru rîrotûûra rîkumagua. Ciûmbe ciaku cionthe irogûkumagia tene na tene.

¹² Na rîu we Mwathani, nîwe ndoretie ûndethie.

¹³ Athana ndutwe gûkû nthî nîguo ndikegue irumi ino rîngî.

¹⁴ We Mwathani nîwicî atî nîrî nthingi, ndianamenyana kîîmwîrî na mûndûmûrûme.

¹⁵ Ndianagwatia rîîtwa rîakwa gîko kana rîa vava, nîrî vûrûrirî ûyû tûthamîrîtue. Vava ndarî na mwana wîngî wa kûmûgaa, na gûtirî mûndû wa nyomba yetû ûngîmvikia. Arûme akwa mûgwanja nîmakuîte, kwoguo nîndûûra mwoyo nîkî? Nwatî ethîrwa tî wendi waku gwoca mwoyo wakwa, mbîguîra ntha ndikegue ngîcambua rîngî.”

Ngai nîweguire mavoya ma Tobiti na ma Sara

¹⁶ Kwoguo mavoya ma Tobiti na rîa Sara nîmeguirwe nî Ngai arî îgûrû,

¹⁷ nake Ngai nîwatûmire mûraika wake Rafaeli nîguo amatethie. Aatûmîtwe nîguo arute tûnyamû tûrîa twonekaga tûrî tûcerû kuuma methorî ma Tobiti nîguo avote kwona rîngî na kûvanga kîvikanio gîa Sara na Tobiasi mûvîcî wa Tobiti. Tobiasi aarî mûrwethe na Sara na nîke wagîrîrwe nî kûmûvikia. Rafaeli nîwathîtwe engate ngoma îo njûku îtagwa Asimodeu kuuma kûrî Sara. Vîndî îrîa Tobiti aatonyaga gwake nyomba kuuma kîvarorî, nake Sara mwarî wa Ragueli nîkwa aanyûrûrûkaga kuuma kanyombarî gake ka îgûrû.