Tobiti 2 - ÎVUKU RÎA ÛVORO MWARO

Gûkûngûîra kwa andû a Mûciî

¹ Rîrîa nakinyire mûciî nîtwacokanîrîre na mûka wakwa Ana na mûvîcîwa Tobiasi. Vîndî ya kîrugo gîa Pentekosto, na nîkîo kîrugo kîtheru gîa ciumia mûgwanja, nînavarîrîrue irio mbaro cia kîvwaî na ngîkara nthî kûrîa.

² Rîrîa nonire wîngî wa irio, nînerire mûvîcîwa atîrî, “Thiî ûgacarie mûndû wonthe wetû mûthîni ûrîa ûngîona na ûrîa ûrûmagîrîra maathani ma Mwathani ûmûrete na nîngûgweterera.”

Ûragani Nineve

³ Nwatî Tobiasi nîwacokire rîngî na akiuga atîrî, “Vava, mûndû ûmwe wetû nîmûrage na agaikua thokorî.”

⁴ Kwoguo mbere ya kûrîa kîndû nînaûkîrire na ngîvira mwîrî vandû vaarî na kîruru nginya kîvwaî.

⁵ Na rîrîa nacokire mûciî nînethambirie na ngîrîa irio ciakwa nîrî na kîeva.

⁶ Nînacokire ngîririkana ûrathi wa Amosi ûrîa aaugire atîrî; “Thigûkû cienyu nîigaatuîka cia kîeva, nacio nyîmbo cienyu ituîke macakaya.” Na nînarîrire.

⁷ Rîrîa riûa rîathûire nînaumire, ngînja mbîrîra na ngîthika mûndû ûcio.

⁸ Nao andû arîa tûriganîtie nao nîmanthekerere na makiuga atîrî, “Ndaramaka atî nîakaaûragwa nîûndû wa gwîka ûguo. Nîwaûrîte ndakaûragwe, na rîu nîarathika akuû rîngî.”

Tobiti nîwatuîkire ndumumu

⁹ Ûtukû ûcio nînethambirie nîguo nîîtherie nîûndû naarî mûgwate nî gîko. Nînaacokire ngîmama rûgitorî, na ndiekunîkîra ûthiû nîûndû kwarî na ûrugarî.

¹⁰ Ndiamenyaga atî kwarî na nthûngûrûrû rûthingorî îgûrû rîa kîongo gîakwa. Namo mai marîa ciamîaga nîmaagîre methorî makwa na makîrûtha rûûî kuo. Nînathiîre kûrî aragûri, nwatî matiandethia. Kûnarî ûguo Ahika nîwamenyerere nyinya rîrîa aathiîre Elamu.

Andû a mûciî nîmaakararanirie

¹¹ Vuva wa Ahika kûthiî, mwongia wakwa Ana nwanginya angîathiîre wîrarî, nîûndû nîwatumaga nguo ta aka acio engî.

¹² Nîwaviragîra acio maamwandîkîte nguo irîa aatumaga. Vîndî îmwe, vuva wa kûmûrîva kîrîa aathûkûmîte, nîmaamûvere koori ka mbûri.

¹³ Rîrîa Ana aaûkire na koori, nîkaambîrîrie kwania. Nînetanire ngîûria atîrî, “Mbûri îo yumire kû? Kinthî tîkwa wîire? Mîcokerie ene. Tî waro kûrîa indo cia kwîa.”

¹⁴ Ana nîwambîrire atîrî: “Naarî! Nîraverwe koori gaka ka mbûri karî kîveo vamwe na mûcara wakwa.” Nwatî ndiamwîtîkia. Nîneguire nthoni nîûndû wa gîko kîu eekire. Nînaamwathire acokie mbûri îo kwa ene. Na nîvo aanjokerie atîrî, “We nîwatethererie andû arîa mataarî kîndû kana tîguo? Ciîko ciaku ikûvete kî?”