Tobiti 1 - ÎVUKU RÎA ÛVORO MWARO

¹ Nie nînie Tobiti na rûrû nî rûgano rwa ûtûûro wakwa. Vava etagwa Tobieli, nake ûma etagwa Ananieli nake mûvîcî wa ûma etagwa Adueli. Îthe wa Adueli etagwa Gabaeli, ûrîa warî wa njiarwa cia Asieli wa mûvîrîga wa Nafutali.

² Vîndî îrîa Shalumanesa aarî mûthamaki wa Asîria, nîrîo nie Tobiti naavirirwe îthamîriorî kuuma îtûûrarî rîa Tisibe rîrîa rîrî mwena wa îveti wa Kadeshi kûu Nafutali mwena wa rûgûrû wa Galili, gatagatî ka mwena wa rûgûrû na mwena wa îthûîro wa îtûûra rîa Hazoru na mwena wa rûgûrû wa Fogoru.

Ûtûûro wa tene wa Tobiti

³ Nie Tobiti nûmîrîrîte njîra irîa ciumanaga na gwîka maûndû maro ûtûûrorî wakwa wonthe. Nîmvecanîte mbeca kûrî andû etû arîa marî na ûvatari na Ayahudi arîa twathamîrue Nineve nao, îtûûra rîrîa rînene rîa Asîria.

⁴ Rîrîa naarî mûnini, natûûraga mwena wa rûgûrû wa Isiraeli. Mîvîrîga yonthe ya Isiraeli nîyagîrîrwe nî kûruta îgongoona kûu Jerusalemu. Rîîrî nî îtûûra rîmwe tu rîrîa Ngai aathuurîte gatagatî ka matûûra mau mengî ma Isiraeli varîa hekarû yake yarî îtumwe ûrî mûciî wake mûtheru wa tene na tene. Nwatî mûvîrîga wakwa wonthe wa Nafutali nîwaregire îtûûra rînene rîa Jerusalemu na athamaki arîa maaumaga kûrî njiarwa cia Daudi.

⁵ Andû etû onthe, na mûvîrîga wa Nafutali nîmaathiîcaga kîrîmarî wa kîonthe kûruta îgongoona kûrî mûvuanano wa gacaû karîa kaathondeketwe nî Jeroboamu mûthamaki wa Isiraeli kûu Dani vûrûrirî wa Galili.

Tobiti aarî mwîvokeku ndinirî yake

⁶ Nînie nienga andûrî a nyomba yetû nathiîcaga Jerusalemu gûkûngûîra vîndî wa vîndî wata ûrîa Watho wa Musa wathanîte mûndû wa wonthe ekage. Nînîngîathiîre Jerusalemu nîrî na gacunjî ka mbere ka maketha makwa, marikithathi ma nyamû ciakwa, gîcunjî gîa îkûmi Kîam nyamû ciakwa, na guoya wenjetwe warîo wa ng'ondurî ciakwa. Vuva wa ûguo nînarûngamaga mbere ya metha ya kîgongoona hekarûrî na nganenganîra matega mama kûrî athînjîri-Ngai, avîcî a Aroni.

⁷ Nînavecanire gîcunjî gîa îkûmi Kîam maketha makwa kûrî ciana cia Lawi arîa maatungataga kûu Jerusalemu. Nînendagia gîcunjî gîa kaîrî gîa îkûmi, na nînathiîcaga gûtûmîra mbeca icio kûu Jerusalemu wa mwaka.

⁸ Nwatî mwaka wa wonthe wa Kathatû, nînavecanaga gîcunjî Kîam ithatû kûrî aka a ndigwa na ciana cia ngoriai na ageni arîa maatûûraga gatagatîrî getû, na tûkarîa irio cia kîrugo tûrî vamwe. Nekire ûguo ngîvingia watho wa Musa, ûrîa Debora, ng'ina wa ûma Ananieli aanthomithîtie. (Natigîtwe nîrî mwana wa ngoriai vava akua.)

Wathîki wa Tobiti arî îthamîriorî

⁹ Rîrîa natuîkire mûndû mûgima nînavikirie Ana, mûndû wa njiarwa cietû. Nîtwagîre na kaana na tûgîgeta Tobiasi.

¹⁰ Vuvarî nînatavirwe na ngîvirwa Nineve. Andû a nyomba yetû onthe na Ayahudi maarîcaga irio irîa ciarîcagwa nî andû arîa mataarî Ayahudi,

¹¹ nwatî nie nînaregire kûrîa irio icio,

¹² nîûndû nînathîkîre Ngai na ngoro yakwa yonthe.

¹³ Ngai-Mûnene nîwatûmire mûthamaki Shalumanesa amende na ngîvewa rûtha rwa kûgûragîra mûthamaki indo ciake.

¹⁴ Mbere ya mûthamaki ûcio akue, Nînathiîre maita meengî vûrûrirî wa Media kûmûgûrîra indo. Mûthenya ûmwe nîrî mûciî mûnene wa Ragesi kûu Media nînatigîre Gabaeli, mûrwang'ina na Gabaria mîvuko îrî na mbeca, na ngîmwîra amîmenyerere. Ndaarî ya mîvuko îo kwarî na sîlûva makîria ya kilo magana mathatû (300).

¹⁵ Nwatî rîrîa Shalumanesa aakwire, Senakeribu mûvîcî nîwatuîkire mûthamaki vuva wake. Vîndî yake nîkwagîre eki naaî na kûthiîrîra varavararî cia Media kwarî na ûgwati, nanie ngîremwa nî kûthiî kuo.

Tobiti nîwathikire andû akuû

¹⁶ Vîndî wa îo Shalumanesa aathanaga, nînatethererie mûno Ayahudi etû arîa athîni.

¹⁷ Arîa avûtu nînamaveere irio nao arîa maarî njaga ngîmava nguo; na nîngîonire mûndû wa wonthe wetû arî mûkuû na aikîtue nja ya rûthingo rwa Nineve, nîngîamûthikire.

¹⁸ Na ethîrwa mûthamaki Senakeribu aûragîte mûndû wa wonthe umîte Judea, naamûthikaga nîîthithîte, nîûndû arî mûrakaru nîwaûragaga andû engî mûno. Vuvarî mîîrî yacarua nî mûthamaki, ndionekaga.

¹⁹ Mûndû ûmwe wa Nineve nîwathiîre na akîîra mûthamaki atî nînie naathikaga andû arîa aûrage. Kwoguo nînethithire. Rîrîa naamenyire atî nînîracarua nîguo mbûragwe, nînagîre na guoya na ngiuma mûciî ngîûra.

²⁰ Vuva wa ûguo indo ciakwa cionthe nîciocirwe nî mûthamaki na gûtirî kîndû gîatigarire tiga mûka wakwa Ana na mûvîcîwa Tobiasi.

Tobiti nîwavonokirue nî mwîvawe

²¹ Îtarî mîvîtûku mîthenya mîrongo îtano ciana igîrî cia Senakeribu nîciaûragire îthe, na makîûrîra irîmarî cia Ararati. Vuvarî Esarihadoni mwana wîngî wa Senakeribu nîwatuîkire mûthamaki, na akîthuura Ahika mwana wa mûrwaiya Anaeli atuîke mûrûngamîrîri wa mbeca na mûnene wa maûndû monthe ma vûrûri.

²² Kwoguo Ahika nîwambarîrîrie na ngîtîkîrua gûcoka Nineve. Gaka kaarî kavinda ga kaîrî ka Ahika kûthuurwa arute wîra ûcio, nîûndû anarûngamîra ndivei, mûrûngamîrîri wa mbeca, mûnene na mûrûngamîrîri wa mûvûri wa ofici arî rungu rwa mûthamaki Senakeribu, nîûndû nake Esarihadoni nîwamûthuurîte nîguo anyitîrîre wîra ûcio. Ahika aarî mwana wa mwarwaiya.