Thaburi 96 - ÎVUKU RÎA ÛVORO MWARO

Ngai nîke mûthamaki ûrîa mûnene

¹ Inîrani Ngai-Mûnene rwîmbo rûcerû! Inîrani Ngai-Mûnene, andû onthe a nthî!

² Inîrani Ngai-Mûnene na mûmûkumie, anagîrîrani ûvonokio wake wa mîthenya yonthe.

³ Anîrîrani riiri wake mavûrûrirî, îrani andû onthe maûndû ma magegania marîa ekîte.

⁴ Ngai-Mûnene, nî mûnene na nîwagîrîrwe nî gûkumua mûno; nîagîrîrwe nî gwîtigîrwa gûkîra ngai cionthe.

⁵ Nîûndû ngai cionthe cia mavûrûri marîa mengî nî mîvuanano tu, nwatî Ngai-Mûnene nîke waûmbire îgûrû na indo irîa irî kuo.

⁶ Ke athiûrûrûkîrîtue nî riiri na ûnene; Hekarû yake îcûrîtwe nî vinya na ûthaka.

⁷ Kumiani Ngai-Mûnene, mue andû onthe a nthî, kumiani riiri na vinya wake.

⁸ Kumiani riiri wa rîîtwa rîa Ngai-Mûnene, ûkani hekarûrî yake mûrî na matega.

⁹ Goocani Ngai-Mûnene arî hekarûrî yake ntheru; mûgooceni na gîtîîo mue andû onthe a nthî!

¹⁰ Îrani mavûrûri monthe atîrî, “Ngai-Mûnene nî mûthamaki. Nthî nîîkindîrîtie na ndîngîenyenyeka; ke agaatuîra andû na kîvooto.”

¹¹ Îgûrû na nthî nîikene, îria na indo irîa itûûraga kuo nîirurume.

¹² Mîgûnda nîîkene wana indo cionthe îrîa irî kuo, nayo mîtî yonthe ya mûtitû nîkaaina îrî na gîkeno;

¹³ îkaaina îrî mbere ya Ngai-Mûnene rîrîa agaaûka. Nîûndû agaaûka gûtuîra andû a nthî ciira. Ke agaatuîra nthî na waragania na andû a nthî na kîvooto.