Thaburi 92 - ÎVUKU RÎA ÛVORO MWARO

Rwîmbo rwa gûkumia Ngai

¹ Nî waro gûgûcokeria ngatho we Ngai-Mûnene, na kwina nyîmbo cia gûkumia Ngai ûrîa ûrî Îgûrû Mûno.

² Nî waro kwanîrîra wendo waku ûtathiraga wa kîraûko, na wîvokeku waku ûtukû,

³ tûgîkwinagîra nyîmbo na ngita, na mîgambo mîaro ya kînanda.

⁴ We Ngai-Mûnene ciîko ciaku nîingenagia; minaga ngenete nîûndû wa maûndû marîa wîkîte.

⁵ We Ngai-Mûnene, kaî maûndû marîa wîkaga nî manene-î! Meciria maku nî marikîru mûno!

⁶ Mûndû kîrimû ndangîmenya ûndû, mûndû mûritu ndangîtaûkîrwa nîûndû ûyû,

⁷ atî andû arîa aganu nwa makûre ta nyaki, andû arîa mekaga maûndû macûku magîe na maûndû maro; nwatî mûthiiarî onthe nîmakaathirua viû.

⁸ Nwatî we Ngai-Mûnene, ûrî mûnene tene na tene.

⁹ Nama, we Ngai-Mûnene nthû ciaku nîigaakua, andû arîa mekaga maûndû macûku nîmakaanyagania!

¹⁰ Nwatî nîûtûmîte ngîe na vinya ta mbogo, na nîûmbîtîrîrîtie maguta ma kûnjanjamûra.

¹¹ Nîmonete na metho makwa nthû ciakwa ikîvootwa, nîmbîguîte kîrîro Kîam andû arîa aganu.

¹² Andû arîa athingu matûûraga ta mîtî ya mîkîndû, magaakûra ta mîtarakwe ya Lebanoni.

¹³ Mekariî ta mîtî îvandîtwe nyombarî ya Ngai-Mûnene, îrîa îkûragîra hekarûrî ya Ngai wetû.

¹⁴ Îthiîcaga na mbere gûciara matunda wana îrî mîkûrû, vîndî cionthe îthagîrwa îrî na vinya na îrî mîruru.

¹⁵ Nîguo monanie atî Ngai-Mûnene nî mûthingu, nîke ûngitagîra na ekaga maûndû ma ûthingu.