Thaburi 86 - ÎVUKU RÎA ÛVORO MWARO

Kûvoya ûtethio

¹ We Ngai-Mûnene nthikîrîria na ûnjokerie, nîûndû ndirî na vinya na nîrî mûthîni.

² Ngitîra ndigakue, nîûndû nîwe ngoocaga; mvonokia, nie ndungata yaku îrîa îkwîvokete.

³ We nîwe Ngai wakwa, kwoguo mbîguîra ntha, nîûndû nîwe ngaagîra vîndî cionthe.

⁴ We Mwathani, tûma ngoro ya ndungata yaku îkene, nîûndû we nîwe mvoyaga.

⁵ We Mwathani, wî mwagîrîru na nîwovanagîra; nîwonagia andû arîa makûvoyaga wendo ûtathiraga.

⁶ We Ngai-Mûnene, thikîrîria îvoya rîakwa; thikîrîria ngîgûkaîra nîguo ûndethie.

⁷ We nîwe mbîtaga, rîrîa nîrî thînarî, nîûndû we nî ûmbîtîkaga.

⁸ We Mwathani, gûtirî ngai îkariî tawe; gûtirî ngai yaneka ûrîa we wîkîte.

⁹ Ndûrîrî cionthe irîa waûmbire nîigaaûka ikûgooce, we Mwathani; na nîikaanîrîra ûnene wa rîîtwa rîaku.

¹⁰ We wî mûnene na nîwîkaga maûndû ma magegania; we wenga tu nîwe Ngai.

¹¹ Nthomithia njîra ciaku, we Ngai-Mûnene, na nîngûkwathîkîra nîrî mwîvokeku; nthomithia nîguo ngûtungatage na ngoro yonthe.

¹² Nîngûgûkumia we Mwathani Ngai wakwa na ngoro yakwa yonthe, na nîndûûra ngumagia ûnene wa rîîtwa rîaku tene na tene.

¹³ Wendo waku ûtathiraga kûrî nie nî mûnene, nîûmvonoketie kuuma ûgwatirî wa gîkuû.

¹⁴ We Ngai, andû arîa etîi nîmareganîte nanie; gîkundi Kîam andû aganu nîkîrenda kûmbûraga, na matiîciragia ûvoro waku wanarî vanini.

¹⁵ Nwatî we Mwathani, ûrî Ngai wî ntha na wendo, nîûkiragîrîria, ûrî wendo ûtathiraga na wî mwîvokeku.

¹⁶ Njokerera na ûmbîguîre ntha; mva vinya, nie ndungata yaku na ûmvonokie, nie ndungata yaku mwana wa ndungata yaku ya mûndûmûka.

¹⁷ Îka ûndû wa kûmonia wega waku we Ngai-Mûnene, nîguo arîa manthûrîte mone na maconoke, nîûndû we, Ngai-Mûnene nîûndethetie na ûkanyûmîrîria.