Thaburi 83 - ÎVUKU RÎA ÛVORO MWARO

Kûvoera nthû cia Isiraeli ivootwe

¹ We Ngai, ndûgakire; ndûgakire na ndûgeterere, we Ngai!

² Taroria, nthû ciaku irî na gacagaca; na arîa makûmenete nîmararegana nawe.

³ Marathondeka mîvango ya nthitho maregane na andû aku; mararanîria makîregana na andû arîa ûgitagîra.

⁴ Marauga atîrî, “Ûkani tûcûkangie vûrûri wao, rîîtwa rîa Isiraeli rîriganîre tene na tene.”

⁵ Nîmetîkanîrîtie mîvangorî yao na ngoro îmwe, marîkanîrîte vamwe maregane nawe:

⁶ andû a Edomu na andû a Ishumaeli, andû a Moabu na andû a Hagari,

⁷ andû a Gebali, Amoni na Amaleki, andû a Filisiti na andû a Turo.

⁸ Asîria wanao nîmanyitanîrîte nao, andû arîa marî vinya a rûciaro rwa Loti.

⁹ Meke wata ûrîa wekire andû a Midiani, wata ûrîa wekire Sisera na Jabini rûnjîrî rwa Kishoni;

¹⁰ andû arîa wathirîrie Endoru, na mîîrî yao yorere nthî.

¹¹ Wîke atongoria ao wata ûrîa wekire Orebu na Zeebu, wîke anene ao onthe wata ûrîa wekire Zeba na Zalimuna,

¹² arîa maaugire atîrî, “Tigani twîgwatîre vûrûri wa Ngai ûtuîke wetû vûrûri.”

¹³ We Ngai wakwa, maûmbûre ta rûkûngû, ta ûrîa mavûngo magûrûkagua nî rûkûngi.

¹⁴ Ta ûrîa mwaki ûvîvagia mûtitû, ta ûrîa nînîmbî cia mwaki ivîvagia irîma.

¹⁵ Mavinyûrithie na kîvuvûkanio gîaku kînene, na ûmamakie na rûvuvo rwaku.

¹⁶ We Ngai-Mûnene, tûma magîe na gîconoko, nîguo mavote gûgûcaria.

¹⁷ Marovootwa na matûûre mamakîte tene na tene; tiga mathire marî na gîconoko.

¹⁸ Tiga mamenye atî we wenga nîwe Ngai-Mûnene, nîwe wathanaga nthî yonthe.