Thaburi 80 - ÎVUKU RÎA ÛVORO MWARO

Îvoya nîûndû wa vûrûri

¹ We mûrîthi wa andû a Isiraeli tûthikîrîrie, we ûtongoragia njiarwa cia Josefu ta ndîthia ya ng'ondu. We wîkaragîra gîtî gîaku Kîam ûnene îgûrû rîa akerubi, onania ûnene waku.

² Onania ûnene waku methorî ma andû a Efiraimu, Benjamini, na Manase. Onania vinya waku, ûûke ûtûvonokie kuuma kûrî nthû cietû.

³ Tûgarûre twîkare ûrîa twekariî mbere, twîguîre ntha na nîtûkûvonoka.

⁴ We Ngai-Mûnene, Ngai mwene vinya wonthe, nîûrakara nî mavoya ma andû aku nginya rî?

⁵ Nîûtûmîte kîeva gîtuîka irio cietû, na ûgatûva methori matuîka kîndû gîa kûnyua.

⁶ Nîûtûmîte tûcambue nî andû arîa matûthiûrûrûkîrîtie, nthû cietû nîkwa itûthekagîrîra.

⁷ Ngai mwene vinya wonthe tûcokie twîkare ûrîa twekariî mbere, twîguîre ntha na nîtûkûvonoka.

⁸ Waretire mûthavibu kuuma Misiri, ûkîvinyûria ndûrîrî irîa ciîngî, na ûkîûvanda vûrûrirî wao.

⁹ Nîwaûrîmîre nîguo ûkûre, nîwamerire na mîri yaguo nîyarikîre îgîtamba nthî yonthe.

¹⁰ Kîruru Kîamguo nîgîakunîkîre irîma, na mvûa ciaguo ikîneneva gûkîra mîtarakwe îrîa mînene.

¹¹ Mvûa ciaguo cianenevire igîkinya îriarî, nayo mîri yaguo yathiîte nginya rûnjîrî rwa Efarati.

¹² Ngai-Mûnene, wamomorire rûthingo rûrîa rwaûthiûrûrûkîrîtie nîkî? Rîu andû arîa mavîtûkagîrîra kuo mathiîcaga magîtucaga thavibu.

¹³ Ngûrûe cia kîthaka nîiûcûkangagia, nyamû cia kîthaka nîirîcaga matunda maguo.

¹⁴ Ngai mwene vinya wonthe tûcokerere! Taroria ûrî kûu îgûrû wone; menyerera mûthavibu ûcio.

¹⁵ Ûka ûvonokie mûthavibu ûrîa we wavandire, mûthavibu ûcio we watûmire ûkûre.

¹⁶ Nthû itemete mûthavibu ûcio na ikaûvîvia, marorie ûrî na marakara na ûmathirie.

¹⁷ Menyerera na ûgitîre andû arîa ûthuurîte, rûrîrî rûrîa watûmire rûgîa vinya.

¹⁸ Natue tûtigaagûtiganîria rîngî, tûma tûtûûre mwoyo na tûgakûgoocaga.

¹⁹ Ngai-Mûnene, Ngai mwene vinya wonthe tûcokie ûrîa twekariî mbere, twîguîre ntha na nîtûkûvonoka.