Thaburi 74 - ÎVUKU RÎA ÛVORO MWARO

Îvoya nîûndû wa kwomomorwa kwa hekarû

¹ Nîkwa Ngai ûtûtiganîrîtie ûguo nîkî? Nîûtûûra ûrakarîte nî andû aku?

² Ririkana andû arîa wathuurire magîtuîka aku kuuma tene, arîa wakûûrire kuuma ûkomborî matuîke mûvîrîga waku kîûmbe. Ririkana Kîrîma gîa Zayuni, kûrîa watûûraga.

³ Vîtûkîrîra kûrîa kwomomorirwe viû; nthû ciacûkangirie indo cionthe irîa ciarî hekarûrî.

⁴ Nthû ciaku iraugîrîria irî hekarûrî yaku nîûndû nîivootanîte; maavandîte vendera ciao kuo cia kwonania ûvootani wao.

⁵ Ciekariî ta andû marî mûtitûrî magîkinda mîtî na mathanwa mao.

⁶ Nîmaaunangire mîrango ya hekarû, na mathanwa na nyondo.

⁷ Nîmaavîvirie hekarû yaku na mwaki; na makîvaka mûgiro vandû varîa ûgoocagîrwa.

⁸ Meeîraga na ngoro atîrî, “Nîtûmathiria viû”; nîmaavîvirie kûndû kuonthe vûrûrirî kûrîa kwarî kûtheru.

⁹ Marûûri metû monthe marîa matheru nî mathiru; gûtirî mûrathi wanarî ûmwe mûtigaru, na gûtirî mûndû wanarî ûmwe gatagatîrî getû wicî nîgwîkara ûguo nginya rî.

¹⁰ We Ngai, nthû ciaku nîitûthekerera nginya rî? Nîmatûûra marumaga rîîtwa rîaku tene na tene?

¹¹ Nîûrega gûtûtethia nîkî? Nîûrega gûtambûrûkia njara nîkî?

¹² Kûnarî ûguo, we Ngai ûrî mûthamaki wetû kuuma tene; nîwîthîrîtwe ûgîka maûndû meengî ma gûtûvonokia.

¹³ We nîwagaanirie îria na vinya waku mûnene, na ûgîtombora ciongo cia njûnamatu irîa nene cia îriarî.

¹⁴ We nîwatomborire ciongo cia Leviathani kîûmbe kîrîa kînene, na ûkînenganîra mwîrî kîo kûrî nyamû cia werûrî irîe.

¹⁵ We nîwatûmire kûgîe na ithima cia manjî na tûrûnjî, nîwatûmire nyûnjî irîa nene inyare.

¹⁶ We nîwaûmbire mûthenya wana ûtukû; nîwaigire riûa vandû va rîo na ûkiga mweri vandû va guo.

¹⁷ We nîwarûthire mîvaka ya nthî; nîwaûmbire îvinda rîa ûrugarî na îvinda rîa mvevo.

¹⁸ Nwatî ririkana we Ngai-Mûnene atî nthû ciaku nîikûthekagîrîra, nî andû irimû na nîmakûnyararîte.

¹⁹ Ndûgatiganîrie andû aku arîa wendete njararî cia nthû ciao; ndûkariganîrwe nî ûtûûro wa andû arîa avinyîrîrie tene na tene.

²⁰ Ririkana kîrîkanîro kîrîa warûthire natue. Andû aganu marî kûndû kuonthe kûrîa kûrî na nduma gûkû nthî.

²¹ Ndûgatûme andû arîa avinyîrîrie maconorithue; tiga andû arîa avinyîrîrie na arîa athîni magûkumagie.

²² Ûkîra we Ngai, na ûtetere kîvooto gîaku! Ririkana ûrîa andû arîa matagwicî marakûthekerera.

²³ Ndûkariganîrwe nî înegene rîa nthû ciaku, ûrîa itûûraga vîndî cionthe inegenaga.