Thaburi 68 - ÎVUKU RÎA ÛVORO MWARO

Rwîmbo rwa ûvootani

¹ Ngai arûngamaga nthû ciake ikanyagania; nao arîa mamûmenete makaûra nîke.

² Amaûmbûraga ta ûrîa ndogo yûmbûragwa nî rûkûngi; andû arîa aganu mathiragua nî Ngai, ta ûrîa mûvûra ûrarûragwa nî mwaki.

³ Nwatî andû arîa athingu nîmakenaga marî mbere ya Ngai; macanjamûkaga na makaina marî na gîkeno.

⁴ Inîrani Ngai, kumiani rîîtwa rîake; mûthondekere njîra, ûrîa ûkîte arî matuurî. Rîîtwa rîake nî Ngai-Mûnene, kenani mûrî varî ke!

⁵ Ngai ûrîa ûtûûraga hekarûrî yake ntheru, nîke îthe wa ciana cia ngoriai na mûgitîri wa aka a ndigwa.

⁶ Ngai nîavecaga athîni kûndû kwa gûtûûra; avingûragîra andû arîa ove na akamatûûria na gîkeno; nwatî arîa mareganaga nake matûûraga vûrûrirî mûmû.

⁷ We Ngai, rîrîa watongoririe andû aku, rîrîa mwathiîrîre werûrî,

⁸ nthî nîyathingithire na mbura îkiura kuuma îgûrû, nîûndû Ngai wa Sinai nîwaûkire, nîûndû Ngai wa Isiraeli nîwaûkire.

⁹ We Ngai, nîwatûmire mbura nyîngî yure nthî, na ûkînyotora vûrûri waku ûrîa warî mûcûkangu.

¹⁰ Andû aku nîmaatûûrire kuo; nîwavere athîni indo nîûndû wa ûtaana waku.

¹¹ Mwathani nîwathanire, nao aka eengî nîmaanîrîre ndûmîrîri makiugaga atîrî,

¹² “Athamaki na athigari ao a mbaara nîmaraûra!” Aka arîa maarî mîciî nîmaagaanire indo irîa ciatavîtwe,

¹³ wana ethîrwa meekaraga ciagarî cia ng'ondu, mîvuanano ya ndutuura îvakîtwe sîlûva, na mathagu ma cio maakengaga ta thaavu ntheri.

¹⁴ Rîrîa Ngai mwene Vinya wonthe aanyaganirie athamaki Kîrîmarî gîa Zalimoni, nîwatûmire mbaravu îgwe Kîrîmarî kîu.

¹⁵ We kîrîma kînene, kîrîma Kîam Bashani, we kîrîma kîrî na tûcûmbîrî twîngî, kîrîma Kîam Bashani!

¹⁶ Ûreguîra kîrîma kîu kîrî na tûcûmbîrî twîngî wîru nîkî, kîrîma kîrîa Ngai aathuurire nîguo atûûre kuo? Ngai-Mûnene agaatûûra kuo tene na tene.

¹⁷ Mwathani nîwaûkire vandû varîa vatheru kuuma Sinai, arî na makiri meengî ma ikaari ciake cia mbarathi.

¹⁸ Nîaunûkia îgûrû rîa kîrîma arî na mîgwate mîîngî; nîakwamûkîra iveo kuuma kûrî andû arîa maareganire nake, Ngai-Mûnene, Ngai agaatûûra kûu.

¹⁹ Mwathani arokumua, ûrîa ûkuuaga mîrigo yetû mîthenya yonthe; nîke Ngai mûvonokia wetû.

²⁰ Ngai wetû nîke ûtûvonokagia; nîke Ngai-Mûnene, Mwathani wetû, ûrîa ûtûvonokagia kuuma gîkuûrî.

²¹ Ngai nîagaatombora ciongo cia nthû ciake, ciongo cia arîa matûûraga mevagia.

²² Mwathani nîwaugire atîrî, “Nîngaacokia nthû ciaku kuuma Bashani; nîngaamacokia kuuma îriarî îriku,

²³ nîguo ûkethambia magûrû na nthakame yao, nacio ngui ciaku irîe nthû nginya ivae.”

²⁴ We Ngai, andû aku nîmaronekana marûmanîrîrîte marî na ûvootani, andû a Ngai wakwa, mûthamaki wakwa, mathiîte varîa vatheru.

²⁵ Aini marî mbere, nao avûûri inanda marî vuva, gatagatî kao kûrî na erîtu makîvûraga tamburini.

²⁶ “Kumiani Ngai mûrî kîûnganorî Kîam andû eengî, kumiani Ngai-Mûnene, mue njiarwa cia Isiraeli!”

²⁷ Andû a mbere nî Benjamini, mûvîrîga ûrîa mûnini viû, marûmîrîrîtwe nî atongoria a Juda na andû ao, marûmîrîrwe nî atongoria a Zebuluni na a Nafutali.

²⁸ Onania vinya waku, we Ngai; vinya ûrîa wavûthîre nîûndû wetû,

²⁹ kuuma hekarûrî yaku Jerusalemu, kûrîa athamaki makûretagîre iveo.

³⁰ Kaania nyamû icio itûûraga mûthanjerî; kaania mavûrûri marîa mekariî ta ndîthia ya ndegwa na tûcaû twacio, nginya mavûrûri mau makûve gîtîîo na makûrutîre gooti; nyagania andû arîa mendaga mbaara!

³¹ Aarîrîria nîmagaaûka kuuma Misiri; andû a Ethiopia nîmakaavirîra Ngai ûtonga wao.

³² Inîrani Ngai, mue mothamaki ma nthî, inîrani Mwathani nyîmbo cia kûmûkumia,

³³ inîrani ûcio ûthiîcagîrîra matuurî, matuurî ma tene na tene. Mûthikîrîrieni akiugîrîria na mûgambo mûnene.

³⁴ Anîrîrani vinya wa Ngai; nîke wathaga Isiraeli, ûnene wake ûkinyîte matuurî.

³⁵ Ngai nî wa gwîtigîrwa arî varîa vake vatheru, ke nîke Ngai wa Isiraeli! Nîavecaga andû ake vinya na ûvoti. Ngai arokumua!