Thaburi 41 - ÎVUKU RÎA ÛVORO MWARO

Îvoya rîa mûndû arî mûrwaru

¹ Kûrathimwa nî andû arîa marûmbûyagia andû arîa athîni; Ngai-Mûnene nîakaamatethia vîndî îrîa makaagwatwa nî thîna.

² Ngai-Mûnene nîamagitagîra na akamamenyerera ûtûûrorî wao; nîmagaatûûra marî akenu marî vûrûrirî; ke ndakaamatiganîria kûrî nthû ciao.

³ Ngai-Mûnene nîamamenyagîrîra rîrîa marî arwaru, na nîamavonagia mîrimû yao yonthe.

⁴ Nanie nînaugire atîrî, “Nîngwîvîrîtie we Ngai-Mûnene; mbîguîra ntha na ûmvonie.”

⁵ Nthû ciakwa ciaragia maûndû makwa macûku ikiugaga atîrî, “Agaakua rî na ariganîre.”

⁶ Maûkaga kûmona na methagîrwa marî na ngoro igîrî, mûvango wao maûkaga kûmenya maûndû makwa marîa macûku, nîguo mathiî makîîraga andû onthe.

⁷ Arîa onthe manthûrîte mavevanagîrîra makîaria ndeto ciakwa, mavangaga kûmbîka maûndû macûku.

⁸ Maugaga atîrî, “Nîmûrwaru mûno; na ndangîvora, nîagûkua.”

⁹ Wana mûrata wakwa ûrîa mûnene na ûrîa nevokete mûno, ûrîa twarîcanagîra irio nake, nîangarûrûkîte.

¹⁰ Ngai-Mûnene, mbîguîra ntha na ûmvonie, nîguo ngerîvîria kûrî nthû ciakwa.

¹¹ Wamvonia nîngaamenya atî wî mûkenu nînie, na nthû ciakwa itikaamvoota.

¹² We nîûndethagia nîûndû mbîkaga maûndû maro, na nîûmbigaga vakuvî nawe tene na tene.

¹³ Ngai-Mûnene, Ngai wa Isiraeli arokumua! Arokumua tene na tene! Ameni! Ameni!