Thaburi 34 - ÎVUKU RÎA ÛVORO MWARO

Gûkumia Ngai nîûndû wa wega wake

¹ Ngaacokagîria Ngai-Mûnene ngatho vîndî cionthe, nîndûûra nîmûkumagia.

² Nîngumagia Ngai-Mûnene nîûndû wa ûrîa ekîte; tiga andû arîa avinyîrîrie megue na makene!

³ Tûrî vamwe nîtûkumieni ûnene wa Ngai-Mûnene, nîtûkumieni rîîtwa rîake tûrî vamwe!

⁴ Nînavoire Ngai-Mûnene, na akîmbîgua; nîwanthiririe guoya yonthe îrîa naarî nayo.

⁵ Mwîvokeni na mûgîe na gîkeno; na gûtirî vîndî mûgaaconorithua.

⁶ Andû arîa athîni mamwîtaga na nîegucaga; na nîamavonokagia kuuma mathînarî mao monthe.

⁷ Mûraika wa Ngai-Mûnene nîamenyagîrîra andû arîa magoocaga Ngai-Mûnene, na nîamavonokagia kuuma ûgwatirî.

⁸ Tuîriani mwone atî Ngai-Mûnene nî mwaro. Kûrathimwa nî andû arîa mathiîcaga kûrî ke nîguo amagitîre.

⁹ Kumiani Ngai-Mûnene, mue andû ake onthe; arîa mamwathîkagîra gûtirî kîndû maturaga.

¹⁰ Wana mînyambû nîîvûtaga watura gîa kûrîa, nwatî andû arîa mavoyaga Ngai-Mûnene matituraga indo mbaro.

¹¹ Ûkani kûrî nie mue anake mûnthikîrîrie, nîngûmûthomithia kûgooca Ngai-Mûnene.

¹² Nwa wende gûkenera ûtûûro waku? Nwa wende gûtûûra îvinda îraca na ûrî na gîkeno?

¹³ Tiga kwaragia maûndû marîa macûku, na ûtige kwaragia maveeni.

¹⁴ Ûragîra maûndû marîa macûku na wîkage maûndû marîa maro; caragia thayû na ngoro yonthe.

¹⁵ Ngai-Mûnene aroragia andû arîa athingu, na nîathikagîrîria kîrîro Kîamo.

¹⁶ Nwatî nîareganaga na andû arîa mekaga maûndû macûku, na makua nîatûmaga mariganîre gûkû nthî.

¹⁷ Rîrîa andû athingu magûkaîra Ngai-Mûnene nîamathikagîrîria; na nîamavonokagia kuuma mathînarî mao monthe.

¹⁸ Ngai-Mûnene arî vakuvî na arîa akuû ngoro; nîavonokagia arîa onthe matete mwîvoko.

¹⁹ Andû arîa athingu matî mathîna meengî mûno, nwatî Ngai-Mûnene nîamavonokagia kuuma kûrî mo monthe.

²⁰ Ngai-Mûnene nîamenyagîrîra ciîga cionthe cia mîîrî yao; gûtirî wanarî îvîndî rîmwe rîao rîkaaunîka.

²¹ Andû arîa aganu makaathirua nî waganu wao; andû arîa mamenete arîa athingu nî makaaverithua.

²² Ngai-Mûnene nîavonokagia mîoyo ya andû ake; arîa mathiîcaga kûrî ke nîguo amagitîre matikaaverithua.