Thaburi 32 - ÎVUKU RÎA ÛVORO MWARO

Kumbûra na kwoverwa mevia

¹ Kûrathimwa nî andû arîa overe mevia mao, arîa makirîrîtwe mevia mao viû.

² Kûrathimwa nî mûndû ûrîa Ngai-Mûnene onaga atarî na mavîtia, mûndû ûrîa ûtaveenanagia.

³ Rîrîa ndaarî mumbûru mevia makwa, naarî mûthiru vinya nîûndû naarîraga mûthenya mûgima.

⁴ Nîwamverithagia ûtukû na mûthenya, we Ngai-Mûnene, naarî mûthiru vinya viû, ta ûrîa manjî manyaraga vîndî ya ûrugarî.

⁵ Nînaacokire ngiumbûra mevia makwa kûrî we, na ndiathitha mavîtia makwa. Nînatwire nyumbûre mevia makwa kûrî we, na nîwanjovere mevia makwa monthe.

⁶ Kwoguo andû onthe arîa makûrûmagîrîra nîmakûvoyage vîndî cionthe, vîndî îrîa mathîna maûka ta mwîcûro wa manjî, matigaakinyagîrîrwa nî mo.

⁷ Nîîthithaga kûrî we, ûkaangitagîra ndikanyitwe nî thîna. Nîngûkwinîra nîûndû wa kûmvonokia.

⁸ Ngai-Mûnene augîte atîrî, “Nîngûkwonia njîra îrîa wagîrîrwe nî kûrûmîrîra, nî ngûthomithia na ngûmenyerere.

⁹ Ndûgatuîke kîrimû ta mbarathi kana nyûmbû irîa itarî ûmenyo, igucagua na gîcûvî na mûkanda ûrî kanyua nîguo yathîke.”

¹⁰ Andû arîa aganu nî makoona mathîna meengî, arîa mevokete Ngai-Mûnene nî agitîre nî wendo wake ûtathiraga.

¹¹ Mue andû arîa athingu, kenani na mûcanjamûke, nîûndû wa ûrîa Ngai-Mûnene ekîte. Mue arîa mûmwathîkagîra, ugîrîriani mûkenete!