Thaburi 30 - ÎVUKU RÎA ÛVORO MWARO

Îvoya rîa gûcokia ngatho

¹ Nî ngûkumagia we Ngai-Mûnene, nîûndû nîûmvonoketie, na ûkîgiria nthû ciakwa inthekerere.

² Nînaakûrîrîre we Ngai-Mûnene, Ngai wakwa nîguo ûndethie, na nîwamvonirie.

³ We Ngai-Mûnene, nîûmvonoketie kuuma gwa akuû, nîwanjokerie mwoyo rîngî, nîwandutire gatagatî ka arîa mathiîcaga kwa arîa akuû.

⁴ Inani nyîmbo cia gûkumia Ngai-Mûnene, mue andû onthe ake! Ririkanani atî, ke nî mûtheru, na mûmûcokerie ngatho.

⁵ Marakara ma Ngai-Mûnene nî ma kavinda kanini, na wega wake nî wa tene na tene. Nwa kwîthîrwe kûrî na kîrîro ûtukû, nwatî kîraûko kwîthîrwe na gîkeno.

⁶ Rîrîa noonire mbîganîrîte, neîrire na ngoro atîrî, “Ndikaavootwa.”

⁷ Nîûndû wa wega waku we Ngai-Mûnene, nîwatûmire nîkindîrie ta kîrîma kînene. Nwatî nîwethithire kûraca nanie, nanie nînaîtigîre.

⁸ Nînaakûrîrîre we Ngai-Mûnene, na ngîkûvoya ûndethie:

⁹ “Gîkuû gîakwa nî gîkûguna na ndûî? Nathiî mbîrîrarî ûkagunîka na ndûî? Andû arîa akuû nwa magûkumie? Nwa manîrîre ûrîa ûrî mwîvokeku?

¹⁰ Nthikîrîria, we Ngai-Mûnene na ûmbîguîre ntha! We Ngai-Mûnene, ndethia!”

¹¹ Nîûtûmîte gûcakaya gwakwa gûtuîka gîkeno, nî ûnthirîrîtie kîeva kanthiûrûrûkîria na gîkeno.

¹² Kwoguo nie ndigaakira, ngaakwinagîra rwîmbo rwa gûgûkumia. We Ngai-Mûnene, Ngai wakwa, nîndûûra ngûcokagîria ngatho tene na tene.