Thaburi 18 - ÎVUKU RÎA ÛVORO MWARO

Rwîmbo rwa Daudi rwa ûvootani

¹ Ngai-Mûnene, nîngwendete! We nîwe ûngitagîra.

² Ngai-Mûnene nîke ûngitagîra, nîke mûgitîri wakwa ûrîa mûnene. Ngai wakwa nîke ûngitagîra, na varî ke nîmûgitîre. Angitagîra kuuma kûrî nthû ciakwa ta ngo; angitagîra na akambiga nîrî na thayû.

³ Mbîtaga Ngai-Mûnene ûrîa wagîrîrwe nî gûkumua andethie, na nîamvonokagia kuuma kûrî nthû ciakwa.

⁴ Naathiûrûrûkîrîtue nî mîtego ya gîkuû mîena yonthe, naatharîkîrîtwe nî ivuvûkanio cia kûnjûkangia.

⁵ Noovanîtue nî mînyororo ya gîkuû, na ngaigîrwa mîtego ya gîkuû.

⁶ Rîrîa naarî thînarî nînetire Ngai-Mûnene, nînaakaîre Ngai wakwa nîguo andethie. Nîwambîguire arî hekarûrî yake, nîwathikîrîrie ngîmûkaîra nîguo andethie.

⁷ Nthî nîyagîre na kîthingithia na îkinaina, itina cia irîma wana cio nîciainainire, nîûndû Ngai aarî mûrakaru.

⁸ Ndogo yaumagîrîra maniûrûrî make, rûrîrîmbî rwa mwaki wa gûcûkangia rwaumagîrîra kanyuarî gake; na makara ma mwaki nîmaaumaga kûrî ke.

⁹ Nîwavingûrire îgûrû na akînyûrûrûka nthî; aakinyîte matu mairû na magûrû make.

¹⁰ Aagûrûkire na îvenya akuuîtwe nî kîûmbe kîrî mathagu, aaûkire na îvenya avurutîtwe nî rûkûngi ta ûrîa gîconi kîgûrûkaga.

¹¹ Eekunîkîrîte na nduma, athiûrûrûkîrîtue nî matu mairû marî na manjî.

¹² Rûveni nîrwavenirie mbere yake, na mbura ya mbembe na nthande cia mwaki nîciaumîre maturî mairû.

¹³ Ngai-Mûnene nîwagambire na mûgambo ta wa ngûa arî îgûrû, naguo mûgambo wa Ngai ûrîa ûrî Îgûrû Mûno nîweguirwe

¹⁴ Nîwaikirie mîguî yake na akînyagania nthû ciake, nîwaretere nthû ciake mveni na ikîûra.

¹⁵ Îria nîrîanyaarire nthî, nayo mîcingi ya nthî nîyonekire, rîrîa wagûkirie nthû ciaku, we Ngai-Mûnene, na ûkîmagûkia ûrî na marakara.

¹⁶ Ngai-Mûnene nî watambûrûkirie njara yake kuuma îgûrû na akîmboca; nîwandutire îriarî îriku.

¹⁷ Nîwamvonokirie kuuma kûrî nthû ciakwa ciarî na vinya, na kuuma kûrî arîa onthe maamenete; nîûndû maarî na vinya mûno kûrî nie.

¹⁸ Nî maantharîkîre rîrîa naarî thînarî, nwatî Ngai-Mûnene nîwangitîre.

¹⁹ Nîwandethirie ngiuma thînarî, aamvonokirie nîûndû nîwakenire nînie.

²⁰ Ngai-Mûnene nîwambîkire maûndû maro nîûndû wa ûthingu wakwa, nîandathimaga nîûndû ndirî na mavîtia.

²¹ Nî mbathîkagîra watho wa Ngai-Mûnene, na ndianeka ûndû mûcûku nîguo ndiganîrie Ngai wakwa.

²² Nî mvingagia mawatho make monthe, Ndianarega kwathîkîra maathani make.

²³ Ke nîaicî, atî nie ndirî na mavîtia, na atî nînîthemete gwîka maûndû macûku.

²⁴ Kwoguo Ngai-Mûnene nîandathimaga nîûndû wa ûthingu wakwa, nîûndû nî aicî atî ndirî na mavîtia.

²⁵ We Ngai-Mûnene ûrî mwîvokeku waku kûrî andû arîa magwîtîkîtie, nîwonanagia wega waku kûrî andû arîa matarî ûcuke.

²⁶ We ûrî mwagîrîru kûrî andû arîa agîrîru, nwatî nîûverithagia andû arîa aganu.

²⁷ Nîûvonokagia andû arîa menyivagia, nwatî nîûturithagia kîene andû arîa etîi.

²⁸ We Ngai-Mûnene, nîûmbakanagîria taa, na ûkanthengutîria nduma.

²⁹ We nîûmvecaga vinya wa kûtharîkîra nthû ciakwa, na ûvoti wa kûrûga nthingo cia vinya cia nthû ciakwa.

³⁰ Ngai ûyû njîra ciake nî nginyanîru, Ciîranîro cia Ngai-Mûnene nî cia ma! Ke nî ngo kûrî arîa onthe macaragia ûgitîri kûrî ke.

³¹ Ngai-Mûnene wenga tu, nîke Ngai, Ngai wenga tu, nîke ûtûgitagîra.

³² Nîke Ngai ûrîa ûmvecaga vinya, ûrîa ûgitagîra njîra irîa nthiîcagîrîra.

³³ Nîatûmaga mvinyûre ta nthwariga, na nîangitagîra nîrî irîmarî irîa ndaca mûno.

³⁴ Nîanthomithagia kûrûa, nîguo njara ciakwa ivotage gûtûmîra ûta wa gîcango.

³⁵ We Ngai-Mûnene, nîûngitagîra na nîûmvonokagia, vinya waku nî ûnyitagîrîra, ûtethio waku nîûtûmîte nduîke mûndû wa vata.

³⁶ Nîwangitîre ndikanyitwe nî nthû ciakwa, na ndianagwa.

³⁷ Nînarûmîrîrie nthû ciakwa na ngîikinyîra, ndiacoka nginya rîrîa naaciûragire ikîthira.

³⁸ Naagwîthirie nthû ciakwa, na itingîaûkîrire; ciamamire nthî mbere yakwa irî mvoote.

³⁹ Nîwamvere vinya wa kûrûa, na ûkîmvotithia kûvoota nthû ciakwa.

⁴⁰ Nîwatûmire nthû ciakwa ciûre nînie, na nînaacûkangirie arîa mamenete.

⁴¹ Nîmeetanire matethue, nwatî gûtirî mûndû wamavonokirie, nîmaakaîre Ngai-Mûnene, nwatî ndaametîka.

⁴² Naarûire nacio igîkara ta rûkûngû rûrîa rûgûrûkagua nî rûkûngi, naamakinyangire ta ndaka îrî njîrarî.

⁴³ Nîwamvonokirie kuuma kûrî andû arîa maareganaga nanie, na ûkîndua mûtongoria wa mavûrûri, andû ndaaicî nîmaatuîkire ndungata ciakwa.

⁴⁴ Rîrîa meeguire ûvoro wakwa nîmaambathîkîre, andû ageni maaûkire kûrî nie menyivîtie.

⁴⁵ Ageni nîmaathirirwe nî ûmîrîru, na nîmaaumire kûrîa methithîte magîtetemaga.

⁴⁶ Ngai-Mûnene nîatûûraga mwoyo! Arokumua mûgitîri wakwa! Ngai mûvonokia wakwa arogoocwa.

⁴⁷ Nîke wamvotithirie kwîrîvîrîria kûrî nthû ciakwa, nîwatûmire mvoote andû a ndûrîrî,

⁴⁸ na ûkîmvonokia kuuma kûrî nthû ciakwa. We Ngai-Mûnene, nîwamvotithirie kûvoota nthû ciakwa na ûkîmvonokia kuuma kûrî aganu.

⁴⁹ Kwoguo we Ngai-Mûnene nîngûgoocaga gatagatî ka mavûrûri, na nî minaga nyîmbo ngîgûkumagia.

⁵⁰ Ngai nîavotithagia mûthamaki wake kûvootana, nî onanagia wendo ûtathiraga kûrî ûrîa athuurîte, kûrî Daudi na njiarwa ciake tene na tene.