Thaburi 145 - ÎVUKU RÎA ÛVORO MWARO

Rwîmbo rwa gûkumia Ngai-Mûnene

¹ Nîngûkwambararia we Ngai wakwa, mûthamaki wakwa; na ngumagie rîîtwa rîaku tene na tene.

² Ngaagûkumagia wa mûthenya; ngumagie rîîtwa rîaku tene na tene.

³ Ngai-Mûnene nî mûnene na nîwagîrîrwe nî gûkumua mûno, ûnene wake ndûngîmenyeka nî mûndû.

⁴ Rûciaro rûmwe nîrûkaaganagîra rûciaro rûrîa rwîngî wîra waku; na nîmakaanîrîra ciîko ciaku cia vinya.

⁵ Ngaaragia ûvoro wîgiî riiri waku na ûnene waku, na nîîciragie ûvoro wa ciîko ciaku cia magegania.

⁶ Andû makaragia ûvoro wa ciîko ciaku cia vinya, nanie ngaanagîrîra ûnene waku.

⁷ Makaanagîrîra ngumo ya wega waku mwîngî, na mainage maugîrîrîtie ûvoro wîgiî ûthingu waku.

⁸ Ngai-Mûnene nî mûtugi na arî ntha, ndarakaraga na îvenya na nîecûrîtwe nî wendo ûtathiraga.

⁹ Ngai-Mûnene nîekaga andû onthe waro, na nîegucagîra ciûmbe ciake cionthe ntha.

¹⁰ Ciûmbe ciaku cionthe nîigaagûkumia, we Ngai-Mûnene, na andû onthe aku nîmagaagûcokeria ngatho.

¹¹ Nîmakaaria ûvoro wa riiri wa ûthamaki waku, na maragie ûvoro wa vinya waku,

¹² nîguo mamenyithie andû onthe ciîko ciaku cia vinya, na riiri mwîngî wa ûthamaki waku.

¹³ Ûthamaki waku ûtûûraga tene na tene, na wathani waku ûtûûraga kûrî njiarwa cionthe. Ngai-Mûnene nî mwîvokeku maûndûrî monthe marîa aragia, na nî mûtugi maûndûrî monthe marîa ekaga.

¹⁴ Ngai-Mûnene nîatiragîrîra arîa onthe maragwa, na nîaûkagîrîria arîa avinyîrîrie.

¹⁵ Ciûmbe cionthe nîwe ciîvokete, na nîaivecaga gîa kûrîa mavinda marîa magîrîru.

¹⁶ Ûkumbatûragia njara yaku na ûtaana, na ûkavaithia kîrîa kîonthe kîrî mwoyo.

¹⁷ Ngai-Mûnene nî mûthingu maûndûrî monthe, na arî ntha maûndûrî monthe marîa ekaga.

¹⁸ Ngai-Mûnene arî vakuvî na arîa onthe mamûvoyaga, arî vakuvî na arîa onthe mamûvoyaga na ma.

¹⁹ Nîavingagia mavata ma arîa onthe mamûtîîte, nîegucaga kîrîro Kîamo na akamavonokia.

²⁰ Ngai-Mûnene nîagitagîra arîa onthe mamwendete, nwatî nîagaacûkangia arîa onthe aganu.

²¹ Ngaakumagia Ngai-Mûnene vîndî cionthe; ciûmbe cionthe irotûûra ikumagia rîîtwa rîake rîtheru tene na tene.