Thaburi 140 - ÎVUKU RÎA ÛVORO MWARO

Îvoya rîa gwîtia ûgitîri

¹ Mvonokia we Ngai-Mûnene, kuuma kûrî andû arîa mekaga maûndû macûku; ngitîra kuuma kûrî andû arîa aganu.

² Meciragia maûndû macûku ngororî ciao vîndî cionthe, na mambagîrîria mbaara vîndî cionthe.

³ Nîmî ciao nî njûku ta njoka; ciugo ciao ciîkariî ta ûrogi wa kîmvuva.

⁴ We Ngai-Mûnene, menyerera kuuma kûrî njara cia andû arîa aganu, ngitîra kuuma kûrî andû arîa aganu arîa mavangîte kûngwîthia.

⁵ Andû arîa etîi nîmambigîrîte mûtego; mambîte ndigi ta neti, na makathitha mîtego njîrarî nîguo mangwatithie.

⁶ Mbîraga Ngai-Mûnene atîrî, “We nîwe Ngai wakwa.” Thikîrîria mûgambo wa mathaithana makwa,

⁷ We Ngai-Mûnene, Mwathani wakwa, mûvonokia mûnene, nîûngitîrîte nîrî mbaararî.

⁸ We Ngai-Mûnene, ndûkave arîa aganu kîrîa meriragîria, ndûgatûme mîvango yao mîcûku îvinga.

⁹ Ndûkareke nthû ciakwa ivootana, ciugo ciao njûku iromacokerera.

¹⁰ Marogwîrwa nî makara ma mwaki; maroikua marimarî kûrîa matakaumîra rîngî.

¹¹ Tiga arîa macambanagia matigekindîrie vûrûrirî, andû arîa aganu marocokererwa nî maûndû macûku na mamathirie wa rîmwe.

¹² Nîmbîcî atî Ngai-Mûnene nîaciragîrîra arîa maranyamarua, na nîonanagia ivooto kûrî ngîa.

¹³ Nama, arîa athingu nîmagaakumia rîîtwa rîaku; arîa marî mîthiîre mîrûngîrîru nîmagaatûûrania nawe.