Thaburi 14 - ÎVUKU RÎA ÛVORO MWARO

Waganu wa andû

¹ Irimû ciîîraga na ngoro atîrî, “Gûtirî Ngai!” Onthe marî mîtugo mîcûku, na nîmekîte maûndû macûku mûno, gûtirî wanarî ûmwe wîkaga ûndû mwagîrîru.

² Ngai-Mûnene arî îgûrû nîaroragia andû gûkû nthî, nîguo one kana kûrî wanarî andû aûgî, wana kana kûrî andû mamûgoocaga.

³ Nwatî onthe nî eviu, mevîtie ûndû ûmwe onthe. Gûtirî wanarî ûmwe wao wîkaga waro, gûtirî wanarî ûmwe.

⁴ Ngai-Mûnene araûria atîrî, “Nîkwa andû arîa mekaga maûndû macûku matarî na ûmenyo? Marîcaga andû akwa ta ûrîa marîcaga irio, na matingoocaga.”

⁵ Ngai nîagaatûma andû acio manyitwe nî guoya, nîûndû Ngai nîatethagia andû arîa athingu.

⁶ Andû arîa aganu nî macûkangagia mîvango ya andû arîa athîni, nwatî Ngai-Mûnene nîke ûmagitagîra.

⁷ Mvoyaga nîguo ûvonokio wa andû a Isiraeli ûkaauma Zayuni. Rîrîa Ngai-Mûnene akaamacokeria mûnyaka wao rîngî, njiarwa cia Jakovu nîigaakena, andû a Isiraeli nîmagaakûngûîra!