Thaburi 135 - ÎVUKU RÎA ÛVORO MWARO

Rwîmbo rwa gûkumia Ngai

¹ Kumiani Ngai-Mûnene! Kumiani rîîtwa rîa Ngai-Mûnene, mûkumieni mue ndungata cia Ngai-Mûnene,

² mue arîa mûrûngamaga nyombarî ya Ngai-Mûnene, mue arîa mûrûngamaga nja ya nyomba ya Ngai wetû.

³ Kumiani Ngai-Mûnene nîûndû nî mwaro, mwinîreni nyîmbo nîûndû nî mûtugi.

⁴ Ngai-Mûnene nîathuurîte Jakovu atuîke wake, nîathuurîte andû a Isiraeli matuîke ake kîûmbe.

⁵ Nie nîmbicî atî Ngai-Mûnene nî mûnene, na Mwathani wetû nî mûnene gûkîra ngai cionthe.

⁶ Ûrîa wonthe Ngai-Mûnene endaga gwîka nîekaga, îgûrû wana nthî, mariarî wana kûrîa kuonthe kûriku mûno.

⁷ Nîke ûtûmaga matu mambate kuuma mîthiia yonthe ya nthî, nîke ûtûmaga mveni ivenie rîrîa gûkura, na akaruta rûkûngi kuuma makûmbîrî make.

⁸ Nîke waûragire marikithathi monthe ma Misiri, ma andû na ma nyamû.

⁹ Nîke waringire ciama na morirû Misiri, nîguo averithie mûthamaki wa Misiri na ndungata ciake cionthe.

¹⁰ Nîwacûkangirie mavûrûri meengî, na akîûraga athamaki maarî vinya:

¹¹ Sihoni, mûthamaki wa Amori, Ogu, mûthamaki wa Bashani, na athamaki onthe a Kanaani.

¹² Nîwavecanire mavûrûri mao rîrî îgai; aamavecanire rîrî îgai kûrî andû ake Isiraeli.

¹³ We Ngai-Mûnene, rîîtwa rîaku rîtûûraga tene na tene, njiarwa cionthe nîitûûra iririkanaga ngumo yaku tene na tene.

¹⁴ Ngai-Mûnene nîakaarîrîria andû ake, na eguîre ndungata ciake ntha.

¹⁵ Mîvuanano ya ngai cia mavûrûri irûthîtwe na sîlûva na thaavu, irûthîtwe na njara cia andû.

¹⁶ Irî na tûnyua, nwatî itiaragia, irî na metho, nwatî itionaga.

¹⁷ Irî na matû, nwatî itiîgucaga, wana itingîvota kûveva.

¹⁸ Arîa onthe mairûthaga na maciîtîkîtie, magaatuîka ta cio!

¹⁹ Mue andû a Isiraeli, kumiani Ngai mûnene; andû a nyomba ya Aroni, kumiani Ngai-Mûnene!

²⁰ Mue nyomba ya Lawi, kumiani Ngai-Mûnene; mue arîa mwîtigîrîte Ngai-Mûnene, mûkumieni!

²¹ Kumiani Ngai-Mûnene mûrî Zayuni, mue arîa mûtûûraga Jerusalemu! Kumiani Ngai-Mûnene!