Thaburi 110 - ÎVUKU RÎA ÛVORO MWARO

Ngai-Mûnene nîwerîre mûthamaki wake ûvootani

¹ Ngai-Mûnene nîwerire Mwathani wakwa atîrî, “Îkara nthî mwena wakwa wa ûrîo nginya rîrîa ngaatûma ûkinyangîre nthû ciaku na magûrû maku.”

² Ngai-Mûnene nîagaatûma ûthamaki waku ûneneve kuuma Zayuni. Augîte atîrî, “Ûkaathanaga ûrî gatagatî ka nthû ciaku.”

³ Mûthenya ûrîa ûkaathiî kûrûa na nthû ciaku, andû aku nîmakevecana na njîra ya kwîyendera. Ta ûrîa îme riumaga kîraûko tene, nîguo anake aku magaaûka kûrî we irîmarî irîa nyamûre.

⁴ Ngai-Mûnene nîweranîre na mwîvîtwa na ndakeericûkwa; “We ûrî mûthînjîri-Ngai tene na tene, ta mûthînjîri-Ngai Melikizedeki.”

⁵ Mwathani arî mwena waku wa ûrîo, rîrîa akaarakara nî akaavoota athamaki.

⁶ Nîagaatuîra ndûrîrî ciira, na ecûrie kûrîa kûrûagîrwa mbaara na ciimba, na nîakaavoota athamaki a nthî yonthe.

⁷ Mûthamaki nîakaanyua manjî karûnjîrî karî rûtere rwa njîra; na nîakaathiî kîthûri kîrî mbere nîûndû wa kûvootana.