Thaburi 10 - ÎVUKU RÎA ÛVORO MWARO

Îvoya nîûndû wa kîvooto

¹ Wîkarîte kûraca ûguo nîkî, we Ngai-Mûnene? Wîthithaga nîkî vîndî îrîa tûrî mathînarî?

² Andû arîa aganu metîîaga na makanyarira andû arîa athîni, marogwatwa nî mîvango yao mîcûku îrîa mavangîte.

³ Andû arîa aganu metîîaga nîûndû wa merirîria ma ngoro ciao, arîa akoroku marumaga na makarega Ngai-Mûnene.

⁴ Andû arîa aganu matiîciragia ûvoro wa Ngai-Mûnene, nîûndû wa mwîtîîo wao maugaga atî, “Gûtirî Ngai.”

⁵ Nîmonaga indo cionthe irîa mendaga, matingîtaûkîrwa nî ûrîa Ngai atucanagîra, manyararaga nthû ciao cionthe.

⁶ Meîraga na ngoro atîrî, “Ndingîenyenya, ndikona thîna ûtûûrorî wakwa wonthe.”

⁷ Mîario yao îthagîrwa îcûrîtwe nî irumi, maveeni na kûvinyanîrîria, maragia ciugo njûku cia rûmena.

⁸ Methithaga icagirî, metererete kûûraga andû matarî na mavîtia. Matuîragia andû arîa matarî na vinya,

⁹ metagîrîra methithîte ta mînyambû, metagîrîra andû arîa athîni, mamanyitaga na mîtego yao na makathiî nao.

¹⁰ Andû arîa matarî vinya matharîkagîrwa na makagwîthua nthî, magwîthagua na vinya nî andû arîa aganu.

¹¹ Andû arîa aganu meîraga na ngoro atîrî, “Ngai nî mûriganîre! Nîathithîte ûthiû wake na ndonaga wanarî kîndû!”

¹² We Ngai-Mûnene, verithia andû arîa aganu, ndûkariganîrwe nî andû arîa mavinyagîrîrua!

¹³ Andû arîa aganu manyararaga Ngai nîkî, na makeîra na ngoro atî, “Ndagaatûverithia”?

¹⁴ Nwatî we nîwonaga arîa marî na mathîna na mînyamaaro, na wîthagîrwa vîndî cionthe wîvarîrîtie kûmatethia. Andû arîa matarî vinya merekagîrîria njararî ciaku; we nîûtethagia athîni vîndî cionthe.

¹⁵ Thiria vinya wa andû arîa aganu na eki naaî, maverithie matigeke maûndû macûku rîngî.

¹⁶ Ngai-Mûnene nî mûthamaki tene na tene, andû arîa magoocaga ngai ciîngî nî makaathira vûrûrirî wake.

¹⁷ We Ngai-Mûnene thikîrîria mavoya ma andû arîa avooreri, maûmîrîrie na ûmathikîrîrie,

¹⁸ nîûthikagîrîria kîrîro gîa ciana cia ngoriai na arîa avinyîrîrie, nîguo andû a nthî matikaamaretere kîmako rîngî.