Obadia 1 - ÎVUKU RÎA ÛVORO MWARO

¹ Gîkî nî kîoneki kîrîa Obadia aaguûrîrue nî Ngai-Mûnene kîgiî vûrûri wa Edomu. Nîtûgwatîte ndûmîrîri kuuma kûrî Ngai-Mûnene; mûnjaama nîmûtûme mavûrûrirî akauge atîrî, “Ûkîrani tûthiî tûkarûe na andû a Edomu!”

Ngai-Mûnene nîakaaverithia Edomu

² Ngai-Mûnene erîte vûrûri wa Edomu atîrî, “Nîngaagûtua rûrîrî rûnini gatagatî ka ndûrîrî cionthe, andû onthe nîmagaakûnyarara.

³ Mwîtîîo wa ngoro yaku nîûkûveenetie, îtûûra rîaku ririgîtwe na rûthingo rwa îthiga rîa vinya; mûciî waku ûrî kîrîmarî îgûrû na wîîraga atîrî, ‘Nî ûrîkû ûngîvota kûûgwîthia nthî?’

⁴ Wana ethîrwa ûmbûkaga na îgûrû ta nderi, ûgatuma kîomba gîaku kûrîa njata irî, nîngaakûruta kuo ngûgwîthie nthî, ûguo nîguo nie Ngai-Mûnene nîrauga.

⁵ Rîrîa andû maûka ûtukû kwîa, na kinthî matiocaga tu wa indo irîa makwenda? Rîrîa andû magûketha thavibu, na kinthî matitigaragia tûnini? Nwatî nthû ciaku nîikûthirîtie viû.

⁶ Mue njiarwa cia Esaû indo cienyu nî mbîe, mîthithû yenyu yonthe nî mîtave.

⁷ Andû arîa mûgwatanagîra nao nîmamûveenetie, nîmamûvinyûrîtie kuuma vûrûrirî wenyu. Andû arîa mwekaranagia nao mûrî na thayû nîmamûvootete. Arata arîa mwevokete nîmaamwigîre mûtego na mûmûnyitithie; makiugaga atî, ‘Ûrî va ûûgî wonthe ûrîa maarî naguo?’ ”

⁸ Nie Ngai-Mûnene nîrauga atîrî, “Kavinda kau, nîngaacûkangia andû arîa aûgî a Edomu, na nthirie ûmenyo wao.

⁹ Nawe Temani, andû aku arîa marî vinya nîmakaamaka, athigari a mbaara onthe a Edomu nîmakaaûragwa.

Gîtûmi gîa kûverithua kwa Edomu

¹⁰ “Maûndû macûku marîa mwekire aa mûrwanyûkwe njiarwa cia Jakovu, nîmo magaatûma mûconorithue na mûcûkangue tene na tene.

¹¹ Mûthenya ûcio mwarûngamire varaca mûroretie, rîrîa nthû ciakuire ûtonga wake, nao ageni magîtonyera ivingorî ciake. Nîmagaanire Jerusalemu na njîra ya gwikia mîtî. Kwoguo wanamue mwekariî wa ta o.

¹² Mûtiagîrîrwe nî gûkenerera mathîna marîa maarî na aa mûrwanyûkwe. Mûtiagîrîrwe nî gûkena rîrîa andû a Juda maacûkangagua. Mûtiagîrîrwe nî gwîtîîa rîrîa maarî na mathîna.

¹³ Mûtiagîrîrwe nî gûtonya îtûûrarî rîa andû akwa, mûthenya ûrîa maagwatirwe nî mûthiro, mûtiagîrîrwe nî gûkenerera mathîna mao mûthenya wa mûthiro. Mûtiagîrîrwe nî gûtava indo ciao mûthenya wa mûthiro.

¹⁴ Mûtiagîrîrwe nî kûrûngama makathîkanorî ma njîra, na kûnyita andû ao arîa maûraga; mûtiagîrîrwe nî kûnenganîra andû arîa mataûragwa kûrî nthû ciao, mûthenya ûcio warî wa kîeva.

Ngai nîagaatuîra mavûrûri ciira

¹⁵ “Kavinda ka Ngai-Mûnene karî vakuvî ga gûtuîra mavûrûri monthe ciira. Ûrîa mwekire, nwaguo wanamue mûgekwa, mûkarîvwa kûringana na ciîko cienyu.

¹⁶ Wata ûrîa naverithirie andû akwa marî kîrîmarî kîrîa Kîammûre, nwaguo ngaaverithia andû a mavûrûri marîa mariganîtie nao. Ngaamaverithia mathire viû. Magacûkangua mekare takwa mataatûûraga kuo.

Isiraeli nîmakaavootana

¹⁷ “Nwatî kîrîmarî gîa Zayuni nîgûkethîrwa arîa makaavonokua, gûkethîrwa kûrî kûndû kûtheru. Andû a Jakovu nîmakegwatîra vûrûri ûrîa maacunîtwe ûtuîke wao kîûmbe.

¹⁸ Andû a Jakovu makethîrwa mekariî ta mwaki, na andû a Josefu mekariî ta nînîmbî cia mwaki. Nîmakaathiria andû a Esaû, wata ûrîa mwaki ûvîvagia rûûa rûkathira, na nyomba ya Esaû gûtigatigara mûndû ûrî mwoyo. Nie Ngai-Mûnene nînie nauga ûguo.

¹⁹ Andû arîa matûûraga mwena wa Negebu nîmakegwatîra vûrûri wa Edomu, nao arîa matûûraga Shefela megwatîre vûrûri wa Afilisiti. Andû a Isiraeli nîmakegwatîra vûrûri wa Efiraimu na megwatîre vûrûri wa Samaria; na andû a Benjamini nîmakegwatîra vûrûri wa Gileadi.

²⁰ Aisiraeli arîa marî îthamîriorî Hala, nîmakegwatîra vûrûri wa Foinike nginya Zarefathu. Nao andû a Jerusalemu arîa marî îthamîriorî Sefaradi, nîmakegwatîra matûûra ma Negebu.

²¹ Andû arîa magaatigara marî mwoyo nîmakaathiî kîrîmarî gîa Zayuni, nao nîmakaathaga kîrîma gîa Esaû, Nake Ngai-Mûnene nîke ûgaatuîka mûthamaki.”