Nthi 4 - ÎVUKU RÎA ÛVORO MWARO

Umithio wa ûûgî

¹ Mue ciana, thikîrîriani kîrîra Kîam aguo, thikîrîriani waro nîguo mûgîe na ûmenyo.

² Nîûndû nîmûthomithagia maûndû maro, kwoguo mûtikaregane na kîrîra gîakwa.

³ Rîrîa naarî kamwana kanini ka vava, kaana karîa kendeetwe mûno nî nyanya,

⁴ vava nîwanthomithagia akambîra atîrî, “Igaga na kinyi maûndû marîa nîrakûthomithia ngororî yaku; vingagia maathani makwa, na nîûgûtûûra mwoyo.

⁵ Gîa na ûûgî na ûmenyo! Ndûkariganîrwe nî ciugo ciakwa kana ûrega kûirûmîrîra.

⁶ Ndûkaregane na ûûgî, naguo ûgaakûmenyagîrîra, endaga ûûgî na ûgaakûgitagîra.

⁷ Ûûgî nîkîo kîndû Kîam vata mûno kûgîa. Îgûrû rîa indo cionthe irîa ûngîgîa nacio, gîa na ûtaûku.

⁸ Tua ûûgî kîndû Kîam goro, naguo ûgaatûma ûgîe îgweta; ûkumbatîrie, naguo ûgaatûmaga ûvewe gîtîîo.

⁹ Ûûgî ûgaagwîkagîra nthûmbî ng'emie kîongorî gîaku, na ûgwîkagîre ngovia îrî na riiri.”

¹⁰ Mwana wakwa, thikîrîria na wîtîkîre ûrîa nîrakwîra, na nîûgûtûûra mîaka mîîngî.

¹¹ Nîngûthomithîtie ûrîa ûngîgîa na ûûgî, na ngakwonia kûthiî na mîthiîre mîkinyanîru.

¹² Ndûkaarigîrîrua nî kîndû rîrîa ûkûthiî; kana ûvîngwa nî kîndû rîrîa ûkûvinyûra.

¹³ Rûmagîrîra kîrîra, na ndûgatigane nakîo; kîvingagie na kinyi, nîûndû nîkîo ûtûûro waku.

¹⁴ Ndûkarûmagîrîre njîra ya andû arîa aganu, na ûtigane na mîthiîre ya andû arîa acûku.

¹⁵ Tigana nayo, ndûkamîrûmîrîre, mîîtheme na wîvîtûkîre.

¹⁶ Nîûndû andû arîa aganu matingîmama matekîte naaî; matingîgwatwa nî toro matavîtithîtie mûndû.

¹⁷ Waganu nîta irio kûrî o, nayo mbaara nîta ûcûrû kûrî o.

¹⁸ Nwatî njîra ya andû arîa athingu îkariî ta riûa rîkîratha, rîrîa rîaraga na rîkathiî na mbere kwongerera ûtheri nginya mûthenya gatagatî.

¹⁹ Njîra ya andû arîa aganu nîta nduma ndumanu, magwîcaga na matimenyaga kîrîa kîmavîngaga.

²⁰ Mwana wakwa, thikîrîria ûrîa ngûkwîra; tega gûtû wîgue ciugo ciakwa.

²¹ Cige ngororî yaku, na ndûkariganîrwe nîcio.

²² Nîûndû nîcio itûûragia ûrîa ûirûmagîrîra, na ikamûva ûgima wa mwîrî wake wonthe.

²³ Menyerera ngoro yaku waro mûno, nîûndû ngororî nîkuo kuumaga maûndû marîa matongoragia ûtûûro wa mûndû.

²⁴ Ndûkaragie mîario îtarî ya ma, na ndûkaragie maveeni.

²⁵ Thiîcaga ûroretie mbere; thiîcaga ûtakwîvûgûra.

²⁶ Menyagîrîra na kinyi mîthiîre yaku, namo maûndû marîa ûgekaga makethagîrwa marî maro.

²⁷ Ndûkathûkagie mwena wa ûrîo kana wa ûmotho; ndûkanyitanagîre na maûndû macûku.