Nthi 24 - ÎVUKU RÎA ÛVORO MWARO

Uuge wa îkûmi na Kenda

¹ Ndûkeguîre andû arîa acûku wîru, kana wîrirîrie kwîthîrwa ûrî mûrata wao.

² O meciragia tu wa ûrîa kûngîgîa thîna, vîndî cionthe maragia ûrîa mangîtûma kûgîe thîna.

Uuge wa Mîrongo îîrî

³ Ûûgî nîguo ûtumaga mûciî, naguo ûtaûku nîguo ûtûmaga mûciî wîvande.

⁴ Ûmenyo nîguo ûtûmaga mûciî wîcûre indo cionthe cia goro na mbaro.

Uuge wa Mîrongo îîrî na îmwe

⁵ Kûgîa na ûûgî nî waro gûkîra kûgîa na vinya, nama, ûmenyo nî mwaro gûkîra vinya.

⁶ Ûngîenda kûrûa mbaara, nwanginya ûgîe na mûvango mwaro, na wa ûrîa ûngîgîa na ataari eengî, nwaguo ûngîgîa na ûvûthû kûvootana.

Uuge wa Mîrongo îîrî na îîrî

⁷ Mûndû mûritu ndataûkagîrwa nî ûûgî, ekaraga akirîte rîrîa maûndû ma vata makwarua.

Uuge wa Mîrongo îîrî na ithatû

⁸ Mûndû ûrîa ûvangaga gwîka maûndû macûku, ageetagwa mûtonyereri wa maûndû ma andû arîa engî.

⁹ Mîvango ya mûndû mûritu nî ya mevia, mûndû mwîtîi nîathûrîtwe nî andû arîa engî.

Uuge wa Mîrongo îîrî na inya

¹⁰ Ûngîkua ngoro vîndî ya thîna, na ma ndûrî na vinya.

Uuge wa Mîrongo îîrî na ithano

¹¹ Vonokia andû arîa mavirîtwe kûûragwa, ndûkarege kûvonokia arîa matuîrîrîtwe kûûragwa matarî na mavîtia.

¹² Ethîrwa nwa uge atîrî, “Nie ndiîcî ûvoro ûyû,” Ngai-Mûnene ûrîa ûmenyaga ngoro cia andû nîonaga, nîakaarîva mûndû kûringana na wîra wake.

Uuge wa Mîrongo îîrî na ithathatû

¹³ Mwana wakwa, rîa ûûkî; nîûndû nî mwaro, ûûkî ûrîa uumaga kûrî mago ûrî mûrîo.

¹⁴ Ûguo nîguo ûûgî wîkariî ngororî yaku, ûngîgîa naguo, nîûkaagîa na mûtûûrîre mwaro vuvarî.

Uuge wa Mîrongo îîrî na mûgwanja

¹⁵ Ndûgakavîre andû arîa athingu ta ûrîa andû arîa aganu mekaga, ndûkathiî kûmacuuna indo kwao mîciî.

¹⁶ Andû arîa athingu nîmagûcaga maita meengî na magaûkîra, nwatî andû arîa aganu nîmacûkangagua nî mathîna.

Uuge wa Mîrongo îîrî na inyanya

¹⁷ Ndûgakene rîrîa nthû yaku yagwa, na ndûgakene rîrîa nthû yaku yavîngwa.

¹⁸ Nîûndû Ngai-Mûnene nwa amenye ûguo na arakare, na atige kûmûverithia.

Uuge wa Mîrongo îîrî na kenda

¹⁹ Ndûkamakue nî andû arîa mekaga maûndû macûku, na ndûkeguîre arîa aganu wîru.

²⁰ Nîûndû mûndû mwaganu ndarî kîîrîgîrîro, taa ya mwoyo wa mûndû mwaganu nîîkaavorua.

Uuge wa Mîrongo îthatû

²¹ Mwana wakwa îtigîre Ngai-Mûnene na ûtîîe mûthamaki, ndûkanyitanîre na arîa maregaga kwathîkîra Ngai-Mûnene kana mûthamaki.

²² Nîûndû thîna nîûkaauma kûrî o wa rîmwe, na ûthirie arîa maregaga kûmathîkîra.

Ciugo ciîngî cia Ûûgî

²³ Ino wana cio nî ciugo cia andû arîa aûgî: Tî waro gûtwithania ciira na kîmenyano.

²⁴ Mûndû ûrîa wîraga mûndû mwaganu atîrî, “We ndûrî na mavîtia,” nîakaarumwa nî andû a vûrûri na nîmakaamûmena.

²⁵ Nwatî mûndû ûrîa ûverithagia mûndû mwaganu nîagaakena, nîakaagîa na kîrathimo.

²⁶ Mûndû ûrîa waragia ûvoro wa ma, nîke mûrata wa ma.

²⁷ Mbere amba ûrute wîra waku wa nja, varîrîria mûgûnda waku ûthire, ûcoke ûtume nyomba yaku.

²⁸ Ndûgatuîke mûira wa mûndû wîngî vatarî na gîtûmi kîganu, na ndûkaveenanie.

²⁹ Ndûkauge atîrî, “Ngaamwîka wa ûguo aambîkire! Thirî ya kauga îrîvagwa na kauga!”

³⁰ Nînavîtûkîrîre mûgûndarî wa mûndû kîgûûta, mûgûndarî wa mîthavibu wa mûndû kîrimû.

³¹ Na ngîmaka nona ûramerete mîgua kûndû kuonthe, na ûkamera îria kuonthe, rûthingo rwaguo rwarî rwomomoku.

³² Nînaacokire ngîciria ûvoro wa guo, na ngîthoma ûndû kuumana naguo.

³³ Mama mama vanini, îîthikîrîrie vanini, kûnja njara tu ûnogoke,

³⁴ naguo ûthîni ûgaaûka kûrî we ta mûcunani, ûkaatharîkîrwa nî ûthîni ta mwîi arî na indo cia mbaara.