Nthi 10 - ÎVUKU RÎA ÛVORO MWARO

Nthimo cia Solomoni

¹ Ino nî nthimo cia Solomoni. Mwana mûûgî atûmaga îthe akene, nwatî mwana mûritu atûmaga ng'ina agîe na kîeva.

² Gûtonga na njîra îtagîrîrîte gûtigunaga mûndû, nwatî ûthingu nîûvonokagia mûndû kuuma kûrî gîkuû.

³ Ngai-Mûnene ndetîkagîra andû arîa aro mavûûte, nwatî nîagiragia arîa acûku magwata kîrîa mendaga.

⁴ Ûgûûta ûtûmaga mûndû athîne, nwatî mûndû wî kîîo nî atongaga.

⁵ Mwana ûrîa mûûgî aûnganagia irio ciake vîndî ya maketha, nwatî mwana ûrîa ûmamaga vîndî ya maketha agîcaga na gîconoko.

⁶ Andû arîa athingu nîmarathimagwa, nwatî ciugo cia andû arîa aganu ithithagîrîra waganu.

⁷ Andû nîmakenaga makîririkana mûndû ûrîa ûkuîte arî mûthingu, nwatî mûndû ûrîa mûcûku akua nîariganagîra.

⁸ Andû arîa marî ûûgî wa ngoro nîmavingagia maathani, nwatî andû arîa maragia ûrimû mecûkangagia o ene.

⁹ Andû arîa marî mîthiîre mîkinyanîru methagîrwa marî agitîre, nwatî arîa matarî evokeku nîmakaamenyeka.

¹⁰ Mûndû ûrîa ûthithagîrîra ûma nîatûmaga kûgîe na thîna, nwatî mûndû ûrîa waragia ûma aûmîrîrîtie nîatûmaga kûgîe na thayû.

¹¹ Ciugo cia mûndû mûthingu nî ta kîthima gîa ûtûûro, nwatî ciugo cia mûndû mwaganu ithithagîrîra waganu.

¹² Rûthûro rûretaga ngucanio, nwatî rwendo rûrekagîra mavîtia monthe.

¹³ Andû arîa marî ûmenyo maragia maûndû ma ûûgî, nwatî andû arîa maragia ûrimû nîmaverithagua.

¹⁴ Andû arîa aûgî maragia maûndû mavarîrîrîtie, nwatî mûtûkatûko wa irimû nîûtûmaga kûgîe na thîna.

¹⁵ Gîtonga kîgitagîrwa nî ûtonga wa kîo; mûthîni acûkangagua nî ûthîni wake.

¹⁶ Mûcara wa mûndû mûthingu nî ûtûûro mwaro, nwatî umithio wa mwaganu nî mevia.

¹⁷ Mûndû ûrîa wîtîkagîra ûtaaro nîatûûraga waro, nwatî mûndû ûrîa ûreganaga na ûtaaro ethagîrwa arî njîrarî ya kûûra.

¹⁸ Mûndû ûrîa ûthithaga ûthû ngororî nî mûthaani. Mûndû ûrîa ûgutanaga nî kîrimû.

¹⁹ Mîario mîîngî ndîturaga mavîtia, nwatî mûndû mûûgî ndaragia mûno.

²⁰ Ciugo cia mûndû mûthingu irî vata ta sîlûva ntheri, meciria ma mûndû mwaganu matirî vata.

²¹ Ciugo cia mûndû mûthingu igunaga andû eengî, nwatî irimû ikucaga nîûndû wa gûtura ûmenyo.

²² Irathimo cia Ngai-Mûnene nîcio itûmaga mûndû atonge, na ndarî kîeva aretanagîria na irathimo icio.

²³ Kîrimû gîkenaga rîrîa gîkûvîtia, nwatî mûndû ûrî na ûmenyo akenaga agîka maûndû na ûûgî.

²⁴ Andû arîa athingu manyitaga kîrîa meriragîria, nwatî andû arîa aganu manyitaga kîrîa metigîrîte mûno.

²⁵ Rîrîa rûkûngi rûnene rwaûka rûthiragia andû arîa aganu, nwatî andû arîa athingu matûûraga mekindîrîtie tene na tene.

²⁶ Ndûkave mûndû kîgûûta wîra akûrutîre, nîûndû agakwîgwithia ngirira ta thiki îrî magegorî kana ta ndogo îrî metho.

²⁷ Wathîkîra Ngai-Mûnene nîûgûtûûra îvinda îraca, nwatî mûndû mwaganu akucaga atakinyîtie.

²⁸ Mwîrîgîrîro wa mûndû mûthingu ûrîkagîrîria na gîkeno, nwatî mwîrîgîrîro wa mûndû mwaganu ndûkinyaga.

²⁹ Ngai-Mûnene nîagitagîra andû arîa evokeku, nwatî nîacûkangagia arîa mekaga maûndû macûku.

³⁰ Andû arîa athingu magaatûûra vûrûrirî wao mekindîrîtie tene na tene, nwatî andû arîa aganu matigaatûûra vûrûrirî ûcio îvinda îraca.

³¹ Andû arîa athingu maragia maûndû ma ûûgî, nwatî andû arîa maragia maûndû marîa macûku nîmagaacûkangua.

³² Andû arîa athingu nîmaicî ûrîa magîrîrwe nî kuga, nwatî andû arîa aganu maragia maveeni vîndî cionthe.