Nthi 1 - ÎVUKU RÎA ÛVORO MWARO

Vata wa Nthimo

¹ Ino nî nthimo irîa ciatungirwe nî Solomoni mûvîcî wa Daudi, mûthamaki wa Isiraeli.

² Nthimo ino ikaavotithagia andû kûgîa na ûûgî, kîrîra na ûtaûku wa maûndû marîa ithomithagia.

³ Nthimo ino ithomithagia andû ûrîa magîrîrwe nî gwîkaga maûndû na njîra ya ûûgî, ûthingu, kîvooto na waragania,

⁴ nîguo itaare andû arîa matarî na ûmenyo, na ive andû aîthî ûtaûku na ûrîa mangîvota kûgîa na mîvango mîkinyanîru.

⁵ Andû arîa aûgî wanao nîmaithikagîrîrie nîguo mongerere ûûgî, na andû arîa marî na ûmenyo magîcage na wara,

⁶ nîguo mataûkagîrwe nî nthimo na ngerekano, mîario ya andû arîa aûgî na ndaî ciao.

Mataaro kûrî andû ethî

⁷ Gwîtigîra Ngai-Mûnene nîkîo Kîammbîrîria gîa kûgîa na ûmenyo. Andû arîa aritu nîmanyararaga ûûgî na kîrîra.

⁸ Mwana wakwa, thikagîrîria kîrîra Kîam aguo, ndûkaregane na ûrîa ûkûthomithua nî nyûkwe;

⁹ nîûndû kîrîra Kîamo gîgekaraga ta nthûmbî îgemetue na maûa îrî kîongorî gîaku, na mûkathî ûrî ngingorî yaku.

¹⁰ Mwana wakwa, andû evia mangîkûgucîrîria meviarî, ndûgetîkîre.

¹¹ Mangîkwîra atîrî, “Ûka tûthiî tûkethithîre andû tûmaûrage, tûthiî tûkovere andû matarî na mavîtia gûtarî na gîtûmi!

¹² Tûmathirie ta andû mathikîtwe marî mwoyo, ta andû maikîtue kwa arîa akuû.

¹³ Nîtûkegwatîra indo cionthe cia goro, twîcûrie nyomba cietû indo irîa tûtavîte.

¹⁴ Ûka tûnyitanîre vamwe, kîrîa tûgaatava gîkethîrwa kîrî gîetû tuonthe.”

¹⁵ Mwana wakwa, ndûkathiîcanie nao, ndûkarûmîrîre mîthiîre yao.

¹⁶ Nîûndû mavinyûragîra gwîka maûndû marîa macûku, na methagîrwa marî na karûgî ga kûûragana.

¹⁷ Ûngîtega gîconi na mûtego gîkîonaga, ndûngîkîgwatithia.

¹⁸ Nwatî andû ta acio methithagîra andû, meyûragaga o ene, meyovagîra o ene na makeyûraga.

¹⁹ Ûguo nîguo njîra cia acunani ciîkariî, maûragagwa nî indo irîa macunanîte.

Ûûgî nîaretana

²⁰ Ûûgî nîaretana arî njîrarî, nîaraugîrîria arî thokorî.

²¹ Nîaraugîrîria arî vandû îgûrû, nîararia arî ivingorî cia îtûûra akauga:

²² “Mue irimû ino! Mûrenda gwîkara mûrî irimû nginya rî? Mûrenda gwîkara mûkînyararaga ûmenyo, mûkaamenya maûndû rî?

²³ Tathikîrîriani ngîmûkaania. Nîngaamûmenyithia meciria makwa, na nîngaamwîcûria ûûgî wakwa.

²⁴ Nîûndû naamwîtire na mûkîrega kwîgua, namûveneerie na njara na gûtirî mûndû watindanîrîre nanie.

²⁵ Mue nîmûregete ûtaaro wakwa wonthe, na nîmûregete gwîtîkîra ngîmûkaania.

²⁶ Kwoguo rîrîa mûkethîrwa mûrî mathînarî, nîngaamûthekerera. Nîngaamûthekerera rîrîa mûkaanyitwa nî kîmako,

²⁷ rîrîa kîmako gîgaaûka kûrî mue ta rûkûngi rûnene, na mathîna mamwîthîrîrie ta rûkûngi rûnene, rîrîa mûkaanyitwa nî kîeva na ûrûrû.

²⁸ Nîmûgaacoka mûmbîte, nwatî ndikaamwîtîka. Mûkaanjaria na kinyi, nwatî mûtikaamona.

²⁹ Nîûndû nîmwamenire ûmenyo na mûkîrega gwîtigîra Ngai-Mûnene,

³⁰ na nîmwareganire na ûtaaro wakwa, na mûkînyarara maûndû monthe marîa namûkaanirie.

³¹ Kwoguo, nîmûkaarîa matunda ma mîthiîre yenyu, na mûvûnue nî mîvango yenyu.

³² Nîûndû irimû ikucaga ciarega kûthikîrîria ûtaaro, na andû arîa aritu mathiragua nî ûrimû wao.

³³ Nwatî ûrîa ûnthikagîrîria ekaraga arî na thayû, ekaraga atarî na guoya, na atagwîtigîra maûndû macûku.”