Ntha 38 - ÎVUKU RÎA ÛVORO MWARO

Metha ya kîgongoona ya kûvîvîrua matega

¹ Bezaleli nîwatumire metha ya kîgongoona ya matega ma kûvîvua ya mûtî ya mûgaa. Metha îo ya kîgongoona yeganene mîena yonthe. Ûraca wayo warî wa mita igîrî na cendimita mîrongo îîrî na îthano (2.25), na wariî wa mita igîrî na cendimita mîrongo îîrî na ithano (2.25). Naguo ûraca na îgûrû warî mita îmwe na cendimita mîrongo îthatû (1.30).

² Nîwacokire akîmîrûthîra mîtî yumîrîte ta mvîa mîenarî yonthe îna ya metha ya kîgongoona. Mîtî îo yaumîrîte yanyitanîte vamwe na metha, na nîwamîvakire gîcango.

³ Nîwarûthire indo cionthe cia metha ya kîgongoona na indo icio ciarî: nyûngû, indo cia kûng'ara, mbakûri, mînyoge, na ngîo cia mwaki. Indo icio cionthe ciarûthîtwe na gîcango.

⁴ Nîwarumîre metha ya kîgongoona gîcungi Kîam gîcango na nîwagîkîrire rungu rwa rûrengo rwa metha, na gîkîthîrwa gîtonyete nthî nuthu ya metha ya kîgongoona.

⁵ Nîwarûthire icûvî inya cia gûkuua gîcungi na agîciîkîra mîenarî îna yakîo.

⁶ Nîwacokire akîrûtha mîtî ya gûkuua metha ya kîgongoona na mîtî ya mûgaa, na akîmîvaka gîcango.

⁷ Nîwatonyirie mîtî îo icûvîrî mîenarî yonthe ya metha ya kîgongoona îrîa aarûthîte na mbaû îkariî ta îthandûkû rîtarî îkunîke mwena wa nthî na wa îgûrû.

Kîraî kîa gîcango

⁸ Bezaleli nîwarûthire kîraî na vandû va gûkigîrîra. Cionthe ciarûthirwe na gîcango îrîa yarî ya aka arîa maatungataga mûromorî wa îgema rîa Ngai-Mûnene.

Kîvaro kîrîa kîrî nja ya îgema rîa Ngai-Mûnene

⁹ Bezaleli aairigîre kîvaro Kîam îgema rîa Ngai-Mûnene na itambaa itumîtwe na ndigi mbaro. Mwena wa îveti itambaa ciarî na ûraca wa mita mîrongo îna na inya (44),

¹⁰ inyitîrîrîtwe na itugî cia gîcango mîrongo îîrî (20) na ikinyithîtue itinarî cia gîcango mîrongo îîrî (20). Nwatî icûvî cia itugî na tûmîtî twa kûinyitithania twarî twa sîlûva.

¹¹ Mwena wa rûgûrû wana guo warî na itambaa cia ûraca wa mita mîrongo îna na inya (44) na inyitîrîrîtwe na itugî cia gîcango mîrongo îîrî (20) na irî na itina mîrongo îîrî (20). Icûvî na tûmîtî twa kûinyitithania twarî twa sîlûva.

¹² Mwena wa îthûîro warî na itambaa cia ûraca wa mita mîrongo îîrî na igîrî (22), inyitîrîrîtwe nî itugî îkûmi (10) na itina îkûmi (10). Icûvî na tûmîtî twacio twa kûinyitithania twarî twa sîlûva.

¹³ Mwena wa îrathîro ûrîa warî na mûromo warî na ûraca wa mita mîrongo îîrî na igîrî (22).

¹⁴ Itambaa cia mwena ûmwe wa mûromo ciarî cia ûraca wa mita ithathatû na nuthu (6.5), inyitîrîrîtwe nî itugî ithatû (3) na itina ithatû (3).

¹⁵ Mwena ûcio wîngî wa mûromo wanaguo warî na itambaa cia ûraca wa mita ithathatû na nuthu (6.5) inyitîrîrîtwe nî itugî ithatû (3) na itina ithatû (3).

¹⁶ Itambaa cionthe irîa ciathiûrûrûkîrîtie kîvaro Kîam îgema rîa Ngai-Mûnene ciatumîtwe na itambaa mbaro.

¹⁷ Itina cia itugî ciarûthîtwe na gîcango. Icûvî, tûmîtî twa kûnyitithania, na ciongo cia itugî ciarûthîtwe na sîlûva. Itugî cionthe irîa ciathiûrûrûkîrîtie kîvaro cianyitithanîtue na tûmîtî twa sîlûva.

¹⁸ Gîtambaa Kîam mûromo wa kîvaro gîatumîtwe waro na ndigi cia rangi wa vururu, njambarawe na cia rangi ndune na gîtumithanîtue waro.

¹⁹ Gîtambaa kîu Kîam mûromo Kîamnyitîrîrîtwe nî itugî inya (4) irî na itina inya (4) cia gîcango. Icûvî cia itugî icio, ciongo cia itugî, na tûmîtî twacio ciarûthîtwe na sîlûva.

²⁰ Nthugî cionthe cia îgema rîa Ngai-Mûnene na irîa ciathiûrûrûkîrîtie kîvaro ciarûthîtwe na gîcango.

Cuuma irîa ciatûmîrwe gûtuma îgema rîa Ngai-Mûnene

²¹ Ûyû nîguo mûtaratara wa cuuma irîa ciatûmîkire gûtuma îgema rîa Ngai-Mûnene kûringana na ûrîa Musa aathanire itarwe. Îgemarî rîu nîkuo kwaigagwa ivengere igîrî irîa ciandîkîtwe maathani îkûmi. Cuuma icio ciatarirwe nî Alawi arîa maarutaga wîra marûngamîrîrîtwe nî Ithamaru mûvîcî wa Aroni, mûthînjîri-Ngai.

²² Bezaleli mûvîcî wa Uri, wa mûvîrîga wa Juda nîwarûthire indo cionthe irîa Ngai-Mûnene aathîte Musa irûthwe. Huri aarî ûma wa Bezaleli.

²³ Oholiabu mûvîcî wa Ahisamaki wa kuuma mûvîrîgarî wa Dani nîke wamûtethagia. Oholiabu aarî na wara wa gûcora, wa kumia indo cia cuuma, na wa gûtuma itambaa mbaro na ndigi cia rangi wa vururu, njambarawe, na cia rangi ndune.

²⁴ Thaavu yonthe îrîa yatûmîkire na wîra wa gûtuma îgema rîa Ngai-Mûnene na yarutîtwe îrî matega, yarî na ûrito wa kilo ngiri îmwe (1,000) kûringana na kîthimi Kîam vîndî îo.

²⁵ Sîlûva îrîa yaumire kûrî andû arîa maatarirwe yarî na ûrito wa kilo ngiri ithatû na magana mana ma mîrongo îthatû (3,430) kûringana na kîthimi Kîam vîndî îo.

²⁶ M ûndû wa wonthe watarirwe akinyîtie ûkûrû wa mîaka mîrongo îîrî (20) nîwarutire sîlûva kûringana na kîthimi kîu. Andû acio matarirwe magîkinya andû ngiri magana matandatû ma ithatû na magana matano ma mîrongo îtano (603, 550).

²⁷ Itina îgana rîmwe (100) cia itugî cia îgema rîa Ngai-Mûnene na cia kûnyitîrîra itambaa nîciatûmîre sîlûva kilo ngiri ithatû na magana mana (3,400). Wa gîtina gîatûmagîra sîlûva kilo mîrongo îthatû na inya (34).

²⁸ Bezaleli nîwatûmîre sîlûva îrîa yatigarîte ya kilo mîrongo îthatû (30), na kûrûtha icûvî cia itugî, na tûmîtî twa kûinyitithania, na ikunîko cia ciongo cia itugî.

²⁹ Gîcango îrîa yamûrîrîtwe Ngai-Mûnene îrî matega yarî na ûrito wa kilo ngiri igîrî, magana mana na mîrongo îîrî na ithano (2,425).

³⁰ Bezaleli aatûmîre gîcango îo na kûrûtha itina cia mûromo wa îgema rîa Ngai-Mûnene, metha ya kîgongoona na gîcungi Kîamyo, na indo cionthe cia metha ya kîgongoona.

³¹ Gîcango îo nwayo yarûthire itina cia itugî cia kîvaro na cia mûromo wakîo, na nthugî cionthe cia îgema na cia kîvaro Kîam rîo.