Ntha 37 - ÎVUKU RÎA ÛVORO MWARO

Gûtuma îthandûkû rîa kîrîkanîro

¹ Bezaleli nîwatumire îthandûkû rîa kîrîkanîro na mîtî ya mîgaa. Îthandûkû rîu rîa kîrîkanîro rîarî rîa ûraca wa inji mîrongo îna na ithano (45), wariî wa inji mîrongo îîrî na mûgwanja (27), na ûraca kûthiî na îgûrû inji mîrongo îîrî na mûgwanja (27).

² Nîwacokire akîrîvaka thaavu ntheri, ndaarî wana nja na akîrûtha mûvîcî wa thaavu ûrîthiûrûrûkîrîtie.

³ Nîwarûthire icûvî inya cia thaavu na akîinyitithania na îthandûkû rîu mîenarî îna yarîo. Icûvî igîrî ciarî mwena ûmwe na igîrî mwena ûcio wîngî.

⁴ Nîwarûthire mîtî ya mîgaa ya gûkuua îthandûkû, akîmîvaka thaavu,

⁵ na akîmîtonyia icûvîrî irîa cia thaavu ciarî mîenarî ya îthandûkû.

⁶ Nîwarîrûthire gîkunîko Kîam îthandûkû rîu rîa kîrîkanîro Kîam thaavu ntheri Kîam ûraca wa cendimita îgana rîa îkûmi (110), na wariî wa cendimita mîrongo îtandatû na ithathatû (66).

⁷ Nîwacokire akîrûtha akerubi aîrî na thaavu ya gûturwa.

⁸ Kerubi ûmwe nîwekîrirwe mwena ûmwe wa îthandûkû, na ûcio wîngî mwena ûcio wîngî. Aamarûthire manyitanîte na gîkunîko Kîam îthandûkû rîa kîrîkanîro.

⁹ Akerubi nîmaacûthanîrîrîtie marî mîenarî yoîrî ya îthandûkû rîa kîrîkanîro. Namo mathagu mao nîmakûnjûkîte magakunîkîra gîkunîko Kîam îthandûkû.

Metha ya mûgate wa kûrutîra Ngai

¹⁰ Bezaleli nîwacokire agîtuma metha ya mîtî ya mîgaa. Ûraca wa metha îo warî cendimita mîrongo înana na inyanya (88), na wariî wa cendimita mîrongo îna na inya (44).

¹¹ Nîwamîvakire thaavu ntheri na akîmirigicîria mwena na mûcivi wa thaavu.

¹² Nîwarûthire karûvaû ka wariî ta wa rûvî na kathiûrûrûkîrîtie metha na agîgekîra kamûcivi ka thaavu kathiûrûrûkîrîtie karûvaû kau.

¹³ Nîwarûthire icûvî inya cia thaavu cia gûkuua metha na agîciîkîra mîenarî îna magûrûrî ma metha.

¹⁴ Icûvî cia kûnyitagîrîra mîtî ya gûkuua nîciekîrîrwe vakuvî na kamûcivi.

¹⁵ Nîwarûthire mîtî ya mîgaa ya gûkuua metha na akîmîvaka thaavu.

¹⁶ Nîwarûthire indo cia thaavu ntheri cia kwigîrîrwa metharî. Indo icio ciarî thaani, mbakûri cia gwîkîrwa ûbani, mbakûri, na njagi cia gwîkîra ndivei. Indo icio cionthe nî cia kûvûthagîrwa vîndî ya matega ma ndivei.

Vandû va kwigîrîrwa taa

¹⁷ Bezaleli nîwarûthire vandû va kwigagîrîra taa na thaavu ntheri. Aarûthire gîtina na gîtugî gîa kûnyitîrîra vandû vau na thaavu ya gûturwa. Maûa marîa maavagemetie maanyitanîte vamwe na gîtugî Kîam vandû vau va kwigîrîrwa taa.

¹⁸ Kwarî na mvûa ithathatû ciaumîte mîenarî ya vandû vau. Mvûa ithatû ikauma mwena ûmwe, na ithatû ikauma mwena ûcio wîngî.

¹⁹ Mvûa icio ithathatû, wa rûvûa rwarî na maûa mathatû maarûgemetie mekariî ta ikombe cia mûtî wa mûrothi na marî na tûmîrûri na makoni.

²⁰ Gîtugî Kîam vandû vau va kwigîrîrwa taa vaarî na maûa mana mekariî ta ma mûtî wa mûrothi ûthundîtie na marî na mîrûri.

²¹ Ngurumo ya wa rûvûa kwarî na kamûrûri kamwe.

²² Tûmîrûri, mvûa, na vandû va kwigîrîrwa taa cianyitanîte vamwe irûthîtwe na thaavu ntheri ya gûturwa.

²³ Nîwarûthire taa mûgwanja, tûnyamû twa kûnyita ndambi na ngîo cia taa na thaavu ntheri.

²⁴ Bezaleli aavûthîrire thaavu ntheri ya ûrito wa kilo mîrongo îthatû na ithano (35) kûrûtha vandû va kwigîrîrwa taa vamwe na indo cionthe ciavo.

Metha ya kîgongoona ya kûvîvîrua ûbani

²⁵ Bezaleli nîwatumire metha ya kîgongoona ya kûvîvîrua ûbani ya mîtî ya mîgaa. Metha îo ya kîgongoona nîyeganene mîena yonthe. Wariî wayo warî cendimita mîrongo îna na ithano (45), na ûraca wayo wa cendimita mîrongo îna na ithano (45). Ûraca na îgûrû wayo warî wa cendimita mîrongo kenda (90). Mîenarî yayo îna îrîa yumîrîte na îgûrû ta mvîa yanyitanîte vamwe na metha îo ya kîgongoona.

²⁶ Nîwamîvakire thaavu ntheri îgûrû na mîenarî yayo îna na mvîa, na akîrûtha mûcivi wa thaavu ûmîthiûrûrûkîrîtie.

²⁷ Nîwarûthire icûvî igîrî cia thaavu na agîciîkîra rungu rwa mûcivi wa thaavu mîenarî îîrî. Icûvî icio nî cia kûnyitîrîra mîtî ya gûkuua metha îo ya kîgongoona.

²⁸ Nîwarûthire mîtî ya mûgaa ya gûkuua metha ya kîgongoona na akîmîvaka thaavu.

Maguta ma kwamûrana na ûbani

²⁹ Nîwacokire akîrûtha maguta ma kwamûrana na akîrûtha ûbani mûnungi waro ûtukanîtue ta maguta manungi waro.