Ntha 33 - ÎVUKU RÎA ÛVORO MWARO

Ngai-Mûnene nîwathire andû a Isiraeli maume kîrîmarî gîa Sinai

¹ Ngai-Mûnene nîwerire Musa atîrî, “Uma gûkû, we vamwe na andû arîa warutire vûrûri wa Misiri na mûthiî vûrûrirî ûrîa nerîîre Iburahimu, Isaka, na Jakovu vamwe na njiarwa ciao atî nîngaamava.

² Nîngûtûma mûraika amûtongorie na nîngwîngata Akanaani, Amori, Ahiti, Aperizi, Ahivi, na Ajebusi.

³ Nîmûthiî vûrûri ûrî na îriia na ûkî. Nwatî nie tîtûthiîcania namue, nîûndû mûrî andû aremi na navota kûmûthiria mûrî njîrarî.”

⁴ Rîrîa andû meegwire maûndû mau macûku nîmaambîrîrie kûrîra na makîrega gwîkîra mathaga ma kwîgemia,

⁵ nîûndû Ngai-Mûnene nîwathîte Musa ameere atîrî, “Mue mûrî andû aremi. Nîngîthiîcania namue wanarî vanini nîngîmûthiria viû. Kwoguo rutani mathaga menyu, nîguo menye ûrîa ngwîka namue.”

⁶ Kwoguo andû a Isiraeli mauma kîrîmarî Kîam Horebu matiacoka gwîkîra mathaga rîngî.

Îgema rîa Ngai-Mûnene

⁷ Vandû vonthe varîa andû a Isiraeli maambaga magema, Musa nîwathiîcaga akamba îgema rîa Ngai-Mûnene varaca na kûrîa andû maatûûraga. Îgema rîu rîetagwa Îgema rîa Ngai-Mûnene na mûndû wa wonthe ûngîendire kwaria na Ngai-Mûnene, nîwaumaga na akathiî îgemarî rîu.

⁸ Rîrîa rîonthe Musa aumagara athiî îgemarî rîu, andû onthe nîmaarûngamaga mîromorî ya magema mao, na makarorereria Musa nginya rîrîa agaatonya îgemarî.

⁹ Rîrîa Musa atonya îgemarî, gîtugî gîa îtu nîkîanyûrûrûkaga gîkarûngama mûromorî wa îgema na Ngai-Mûnene akarîria Musa arî îtuurî rîu.

¹⁰ Rîrîa andû onthe moona gîtugî gîa îtu Kîamrûngama mûromorî wa îgema, nîmaarûngamaga na makagooca Ngai-Mûnene wa mûndû arî mûromorî wa îgema rîake.

¹¹ Ngai-Mûnene aaragia na Musa makîonanaga ta ûrîa mûndû aragia na mûrata wake. Musa acoka kûrîa andû maambîte magema, Joshua mûvîcî wa Nuni ûrîa wamûtethagia aatigagwa kûu îgemarî. Joshua aarî mwanake.

Ngai-Mûnene nîweranîre atî akethagîrwa na andû ake

¹² Musa nîwerire Ngai-Mûnene atîrî, “Nî ma nîwambîra ndongorie andû mathiî vûrûri ûcio, nwatî ndûnamonia mûndû ûrîa watûma nîguo tûthiî nake. Nîwauga atî nîûmbicî waro na ûrî mûkenu nînie.

¹³ Rîu, ethîrwa ûrî mûkenie nînie, nakûthaitha ûmenyethie ûrîa mîvango yaku îkariî nîguo ngûmenye na ngûkenie makîria. Ririkana atî ûthuurîte rûrîrî rûrû rûtuîke andû aku.”

¹⁴ Nake Ngai-Mûnene nîwamûcokerie atîrî, “Nîmbîthîrwa nawe, na ngaatûma ûgîe na thayû.”

¹⁵ Musa nîwacokerie Ngai-Mûnene atîrî, “Ethîrwa tîûthiîcania natue, ndûgatûme tuuma gûkû.

¹⁶ Ethîrwa tîûthiîcania natue, andû mangîmenya atîa atî ûrîmûkenie nînie wana andû aku? Kûthiîcania natue nîkuo gûgatûma tûgîe na ngûrani gatagatî getû na andû acio engî onthe a nthî.”

¹⁷ Nake Ngai-Mûnene nîwerire Musa atîrî, “Ûguo wambûria nîguo ngwîka, nîûndû nîrî mûkenie nîwe na nîngwicî waro.”

¹⁸ Musa nîwacokire akîmwîra atîrî, “Nakûthaitha wîtîkîre kûmonia riiri waku.”

¹⁹ Ngai-Mûnene nîwacokirie atîrî, “Nie, nîngaatûma riiri wakwa ûvîtûkîrîre mbere yaku na nîngaagweta rîîtwa rîakwa ‘Ngai-Mûnene’ mbere yaku. Ngonanagia wendo kûrî mûndû ûrîa ngwenda kwonia wendo na ngegucagîra ntha mûndû ûrîa ngwenda kwîguîra ntha.

²⁰ Nwatî ndigeetîkîra wone ûthiû wakwa, nîûndû gûtirî mûndû ûngîmona na atûûre mwoyo.

²¹ Nwatî taroria ava mwenarî wakwa varî na îthiga na nîûkaarûngama îgûrû rîa rîo.

²² Rîrîa riiri wakwa ûkeethîrwa ûkîvîtûka nîngaagûtonyia mwanyarî wa îthiga rîu na ngûkunîkîre na njara yakwa nginya mvîtûke.

²³ Narîkia kûvîtûka nîngaathengutia njara yakwa mwanyarî wa îthiga, nawe nîûkoona mûrukuthu wakwa nwatî ndûkoona ûthiû wakwa.”