Ntha 27 - ÎVUKU RÎA ÛVORO MWARO

Metha ya kîgongoona

¹ “Ûgaatuma metha ya kîgongoona ya mûtî wa mûgaa. Metha îo ya kîgongoona îthîrwe îganene mîena yonthe; wariî wa mita igîrî na inji igîrî, na ûraca wa mita igîrî na inji igîrî. Naguo ûraca na îgûrû îthîrwe îrî ya mita îmwe na inji ithatû.

² Îgûrû rîa metha ya kîgongoona ûkaarûtha mîtî yumîrîte ta mvîa mîthiiarî yayo îna, na metha îo yonthe ûkaamîvaka gîcango.

³ Na ûkaarûtha nyûngû cia gwîkîra mûu ûrîa ûrî na mathuma, indo cia kûng'ara, mbakûri, mînyoge na rûgîo rwa mwaki. Indo icio cionthe irûthwe na gîcango.

⁴ Ûkaarûtha gîcungi Kîam gîcango na ûrûthe icûvî inya irî mîenarî îna yakîo.

⁵ Nakîo gîcungi kîu ûgaagîkîra rungu rwa rûrengerero rwa metha ya kîgongoona, nîguo gîcungi kîthîrwe kîrikîte na nthî nuthu ya metha ya kîgongoona.

⁶ Ûkaarûtha mîtî mîraca ya kûmîkuua. Mîtî îo îthîrwe îrî ya mûtî wa mûgaa na îvakwe gîcango.

⁷ Ûcoke ûmîkîre îtonyerere marimarî ma icûvi nîguo îthîrwe îrî mîenarî îîrî ya metha ya kîgongoona rîrîa metha îo îkuuîtwe.

⁸ Ûkaarûtha metha ya kîgongoona na mbaû ta îthandûkû rîtarî îkunîke. Ûkaamîrûtha kûringana na ûrîa naagûtarîrie ûrî kîrîmarî.

Kîvaro kîrîa kîrî nja ya îgema rîa Ngai-Mûnene

⁹ “Ûkaarûtha kîvaro nja ya îgema rîa Ngai-Mûnene. Ûgaakirigîra na itambaa itumîtwe na ndigi mbaro. Mwena wa îveti itambaa ikethîrwa irî cia ûraca wa mita mîrongo îna na inya.

¹⁰ Itambaa icio ikaanyitîrîrwa nî itugî mîrongo îîrî cia gîcango irûngamîtue nî itina mîrongo îîrî cia gîcango wanacio. Nwatî tûvatha twa itugî na tûmîtî twa kûnyitanithia twîthîrwe tûrî twa sîlûva.

¹¹ Mwena wa rûgûrû wanaguo ûûrûthe wata mwena wa îveti.

¹² Mwena wa îthûîro gûkethîrwa na itambaa cia ûraca wa mita mîrongo îîrî na igîrî, na itugî îkûmi cia mwena wa îthûîro irî na itina îkûmi.

¹³ Mwena wa îrathîro ûrîa ûrî na mûromo ûkaairigwa na itambaa cia mita mîrongo îîrî na igîrî.

¹⁴ Itambaa cia mwena ûmwe wa kîvingo ikethîrwa irî cia mita ithathatû na nuthu, irî na itugî ithatû na itina ithatû.

¹⁵ Mwena ûcio wîngî wa kîvingo wanaguo ûkethîrwa ûrî na itambaa cia mita ithathatû na nuthu na irî na itugî ithatû na itina ithatû.

¹⁶ Kîvingo gîa gûtonya kîvarorî gîkethîrwa na gîtambaa Kîam nguo mbaro îtumîtwe na ndigi cia rangi wa vururu na wa njambarawe na rangi ndune. Gîtambaa kîu gîkethîrwa kîrî na ûraca wa mita kenda na kîgemetue na wara. Nîgîkethîrwa kîrî na itugî inya na itina inya cia gûkînyitîrîra.

¹⁷ Itugî cionthe irîa ithiûrûrûkîrîtie kîvaro ikethîrwa inyitithanîtue na tûmîtî twa sîlûva îgûrû rîa itugî. Tûvatha twacio tûrûthîtwe twa sîlûva na itina cia gîcango.

¹⁸ Ûraca wa rwago rwa kîvaro ûkethîrwa ûrî mita mîrongo îna na inya, wariî wa mita mîrongo îîrî na igîrî, na ûraca na îgûrû wa mita igîrî na inji igîrî rwa itambaa itumîtwe na nguo mbaro na itina cia gîcango.

¹⁹ Indo cionthe cia gûtûmîrwa îgemarî rîa Ngai-Mûnene na nthugî cia kûrînyitîrîra na cia kûnyitîrîra rwago rwa kîvaro ikaarûthwa na gîcango.

Kûmenyerera Taa

²⁰ “Nîûkaatha andû a Isiraeli makûretere maguta maro ma mîtamaiyû îrîa îciaraga matunda ma gwîkîra taarî, nîguo îthagîrwe yakanîte vîndî cionthe.

²¹ Taa nîigagwe îgemarî rîa Ngai-Mûnene nja ya gîtambaa kîrîa kîgaanîtie varîa îthandûkû rîa kîrîkanîro Kîam Ngai-Mûnene rîrî. Nake Aroni na avîcî ake mamîmenyagîrîre îkarage îgîakanaga îrî mbere ya Ngai-Mûnene kuuma kîvwaî nginya kîraûko. Watho ûyû nîwakûrûmagîrîrwa nî njiarwa cia andû a Isiraeli nginya tene na tene.