Ntha 22 - ÎVUKU RÎA ÛVORO MWAROMawatho megiî kûrîvana 1 “Mûndû angîîa ndegwa kana ng'ondu na amîûrage kana amîendie, nîakaarîva ndegwa ithano îthenya rîa ndegwa îo kana ng'ondu inya îthenya rîa ng'ondu îo. 2 “Mwîi angînyitwa akîvunja nyomba yene ûtukû na aûragwe, mûndû ûcio wamûraga ndagaatuîrwa atî nîûraganîte. 3 Nwatî angîmûraga mûthenya, nîagaatuîrwa atî nîaûraganîte. Mwîi nwanginya akaarîva kîrîa aaîire. Nwatî angîthîrwa ndarî na kîndû kîngîendua, ke nîke ûkendua nîguo kîrîa aîîte kîrîvîke. 4 Narîo ndegwa, mvunda kana ng'ondu îrîa aîîte îngînyitîkana arî nayo na îrî mwoyo, akaamîrîva maita maîrî. 5 “Mûndû akîrîthia angîrekereria nyamû ciake irîe mûgûnda wene, kana irîe mûgûnda wa mîthavibu, nwanginya akaarîva na irio irîa mbaro mûno kuuma mûgûndarî wake na kuuma mûgûndarî wake wa mîthavibu. 6 “Mûndû angîakia mwaki naguo mwaki ûcio ûtambe na ûvîvie rûgiri rwa mîgua rwa mûgûnda wa mûndû wîngî na ûcoke ûvîvie ngano îrîa îrakûra kana îrîa îtemetwe îkovwa vamwe, mûndû ûrîa wakirie mwaki nwanginya akaarîva yonthe. 7 “Mûndû angîthithia mbeca kana indo kûrî mûndû wîngî nake mwîi aûke na aîe indo icio, mwîi angînyitwa nîakaarîva maita maîrî ma indo irîa aîîte. 8 Nwatî mwîi ûcio angîrega kûnyitîkana, mwene nyomba ûrîa ûrathithîtue indo nîakaathiî varîa vagoocagîrwa Ngai na nîakaanyua muma nîguo onanie atî ke tîmwîu indo cia mûndû ûcio wîngî. 9 “Andû mangîgîa na ngarari nîûndû wa kîndû, wana angîthîrwa nî îgûrû rîgiî ndegwa, mvunda, ng'ondu, nguo kana kîndû wa kîonthe kîrîa kîûrîte, andû acio nwanginya makaavirwa varîa vagoocagîrwa Ngai. Ûrîa Ngai akoonania atî nîke ûrî na mavîtia nî akaarîva ûcio wîngî maita maîrî ma kîrîa magûkararanagîria. 10 “Mûndû angîtîkîra kûthithua nî mûndû wîngî mvunda, ndegwa, ng'ondu, kana nyamû îngî wa yonthe na îkue kana îgurarue kana yocwe îtavwe nî andû a kûndû kwîngî na gûture mûndû wa wonthe wonete, 11 andû acio aîrî nîmakaathiî varîa vagoocagîrwa Ngai-Mûnene na mûndû ûcio wathithirue kîndû anyue muma onanie atî ke ndaîîte nyamû îo. Mwene nyamû îo nîagetîkania na ûira ûcio, na nyamû îo ndîkaarîvwa. 12 Nwatî ethîrwa nyamû îo nîkwa îîtwe, mûndû ûcio ûthithîtue nyamû îo nwanginya amîrîve. 13 Narîo ethîrwa nyamû îrîa aathithirue yaûragirwe nî nyamû cia kîthaka, nwanginya arete matigari nîguo matuîke ûira. Onania matigari mau ke ndakaarîva nyamû îrîa îrîtwe nî nyamû cia kîthaka. 14 “Mûndû angîvoya nyamû kuuma kûrî mûndû ûrîa wîngî na îtivue kana îkue mwene yo atarî vo, mûndû ûcio ûramîvoete nwanginya amîrîve. 15 Nwatî îngîkua mwene yo arî vo, mûndû ûcio ûramîvoete ndangîrwa amîrîve. Nwatî ethîrwa nîkwa îrarî ngombore, mbeca irîa iramîkomborete nîcio igaatuîka îrîvi. Mawatho megiî ndini na mîtûûrîre mîaro 16 “Mûndûmûrûme angîveenereria mwîrîtu nthingi ûtarî na mûrata wa kûmûvikia, na amenyane nake kîîmwîrî, nwanginya amûracîrie na amûvikie atuîke mûka. 17 Nwatî îthe wa mwîrîtu angîrega gwîtîkîra mûndû ûcio amûvikie, mûndû ûcio nîakaarîva îthe wa mwîrîtu mbeca ciîganîte rûracio rûrîa rûrutagwa nîûndû wa mwîrîtu nthingi. 18 “Mûtikareke mûndûmûka mûrogi atûûra mwoyo. 19 “Mûndû wa wonthe angîka maûndû ma ûûra nthoni na nyamû nwanginya akaaûragwa. 20 “Mûndû wa wonthe angîrutîra ngai ya mûvuanano îgongoona tiga nie, Ngai-Mûnene, nîakaaûragwa. 21 “Mûtikaanavinyîrîrie mûgeni kana mûmûvîtîria, ririkanani atî wanamue mwarî ageni vûrûrirî wa Misiri. 22 Mûtikaanavîtîrie mûndûmûka wa ndigwa kana mwana wa ndigwa, 23 nîûndû mûngîmavîtîria nao mandîrîre, nama nîngegua kîrîro Kîamo makîndîrîra nîmatethie, 24 nanie nîngaarakara na nîmûragithîrie mbaararî. Nao aka enyu nîmagaatuîka a ndigwa nacio ciana cienyu itigwe itarî na methe. 25 “Mûndû ûgaakombithia ûmwe wa andû akwa arîa athîni mbeca, ndagatuîke ta mûndû ûrîa ûkombithanagia mbeca agîa na maciaro. 26 Ûngîoca nguo ya mûndû atî nîguo akaamîkûûra, nwanginya ûmûcokerie riûa rîtarî rîthûu, 27 nîûndû îo nwayo nguo îrîa arî nayo ya gwîkunîkîra nayo. Mûndû ûcio angîîguîkire ndûî kîngî? Angîngaîra nîngaamwîgua nîûndû nîrî ntha. 28 “Ndûkarie ûndû mûcûku wîgiî Ngai, na ndûkarume mûtongoria wa andû enyu. 29 “Ndutagîra matega maku ma ngano, ndivei, na maguta ma ndamaiyû vîndî ya cio yakinya. “Mvecaga îrikithathi rîaku rîa anake. 30 Ûkaamvecaga îrikithathi rîaku rîa ng'ombe, na rîa ng'ondu. Ûkaarekaga marikithathi ma njamba mekare na ng'ina mîthenya mûgwanja na mûthenya wa kanana ûkîndutîra mo. 31 “Mue mûrî andû akwa arîa nthuurîte. Kwoguo mûtikarîe nyama cia nyamû yûragîtwe nî nyamû cia kîthaka. Vandû va ûguo, cikagîrieni ngui. |
©Bible Society of Kenya, 2019
Bible Society of Kenya