Ndari 2 - ÎVUKU RÎA ÛVORO MWARO

Ûrîa mîvîrîga yavangîtwe kûrîa maambîte magema

¹ Ngai-Mûnene nîwerire Musa na Aroni atîrî,

² “Andû a Isiraeli makambaga magema wa mûndû vakuvî na vendera yao. Nao makambaga magema mao mathiûrûrûkîrîtie îgema rîa Ngai-Mûnene.

³ “Andû a Juda makaamba magema mao mwena wa îrathîro vakuvî na vendera yao. Mûtongoria wao akeethîrwa arî Nahashoni mûvîcî wa Aminadabu.

⁴ Onthe makeethîrwa marî ngiri mîrongo mûgwanja na inya na magana matandatû (74,600).

⁵ Arîa makaarigania nao, nî andû a mûvîrîga wa Isakaru. Mûtongoria wao akeethîrwa arî Nethanieli mûvîcî wa Zuari.

⁶ Onthe makeethîrwa marî ngiri mîrongo îtano na inya na magana mana (54,400).

⁷ Nîmagaacoka marûmîrîrwe nî andû a mûvîrîga wa Zebuluni. Mûtongoria wao akeethîrwa arî Eliabu mûvîcî wa Heloni.

⁸ Onthe makeethîrwa marî ngiri mîrongo îtano na mûgwanja na magana mana (57,400).

⁹ Andû onthe a Juda, kûringana na ikundi ciao makeethîrwa marî ngiri îgana rîa mîrongo înana na ithathatû na magana mana (186,400). Andû acio nîo makaambîrîria rûgendo marî a mbere.

¹⁰ “Andû a Reubeni makaamba magema mao mwena wa îveti vakuvî na vendera yao. Mûtongoria wao akeethîrwa arî Elizuri mûvîcî wa Shedeuri.

¹¹ Onthe makeethîrwa marî ngiri mîrongo îna na ithathatû na magana matano (46,500).

¹² Nîmagaacoka marûmîrîrwe nî andû a mûvîrîga wa Simeon. Mûtongoria wao akeethîrwa arî Shelumieli mûvîcî wa Zurishadai.

¹³ Nao onthe makeethîrwa marî ngiri mîrongo îtano na kenda na magana mathatû (59,300).

¹⁴ Nîmagaacoka marûmîrîrwe nî andû a mûvîrîga wa Gadi matongoretue nî Eliasafu mûvîcî wa Reueli.

¹⁵ Onthe makeethîrwa marî ngiri mîrongo îna na ithano na magana matandatû ma mîrongo îtano (45,650).

¹⁶ Andû onthe a Reubeni, kûringana na ikundi ciao makeethîrwa marî ngiri îgana rîa mîrongo îtano na îmwe na magana mana ma mîrongo îtano (151,450). Acio nîo makaarûmîrîra andû a mûvîrîga wa Juda.

¹⁷ “Andû a Lawi nîo makaathiî makuuîte îgema rîa Ngai-Mûnene marî gatagatî ga ikundi cia mbere igîrî na cia mûthiia igîrî. Wa gîkundi gîkaathiî kîrûmîrîrîte vendera yakîo wata ûrîa andû mambîte magema mao.

¹⁸ “Andû a Efiraimu makaamba magema mwena wa îthûîro vakuvî na vendera yao. Mûtongoria wao akeethîrwa arî Elishama, mûvîcî wa Amihudi.

¹⁹ Onthe makeethîrwa marî ngiri mîrongo îna na magana matano (40,500).

²⁰ Arîa makaarigania nao nî andû a mûvîrîga wa Manase. Mûtongoria wao akeethîrwa arî Gamalieli mûvîcî wa Pedazuru.

²¹ Onthe makeethîrwa marî ngiri mîrongo îthatû na igîrî na magana maîrî (32,200).

²² Nîmagaacoka marûmîrwe nî andû a mûvîrîga wa Benjamini matongoretue nî Abidani wa Gideoni.

²³ Onthe makeethîrwa marî ngiri mîrongo îthatû na ithano na magana mana (35,400).

²⁴ Andû onthe a Efiraimu, kûringana na ikundi ciao makeethîrwa marî ngiri îgana rîa inyanya na îgana rîmwe (108,100). “Andû a Efiraimu nîo makaathiî marî gîkundi gîa kathatû.

²⁵ “Andû a Dani makaamba magema mao mwena wa rûgûrû vakuvî na vendera yao. Mûtongoria wao akeethîrwa arî Ahiezeri mûvîcî wa Amishadai.

²⁶ Andû acio makeethîrwa marî ngiri mîrongo îtandatû na igîrî na magana mûgwanja (62,700).

²⁷ Nîmagaacoka marûmîrîrwa nî andû a mûvîrîga wa Asheri matongoretue nî Pagieli mûvîcî wa Okirani.

²⁸ Onthe makeethîrwa marî ngiri mîrongo îna na îmwe na magana matano (41,500).

²⁹ Nîmagaacoka marûmîrîrwe nî andû a Nafutali matongoretue nî Ahira mûvîcî wa Enani.

³⁰ Onthe makeethîrwa marî ngiri mîrongo îtano na ithatû na magana mana (53,400).

³¹ Andû onthe a Dani, kûringana na ikundi ciao makeethîrwa marî ngiri îgana rîa mîrongo îtano na mûgwanja na magana matandatû (157,600). “Andû a Dani nîo makaathiî marî a mûthiia.”

³² Andû onthe a Isiraeli arîa maandîkirwe wa andû kûringana na mûvîrîga wao, gîkundi wa gîkundi maarî ngiri magana matandatû ma ithano na magana matano ma mîrongo îtano (605,550).

³³ Nwatî wata ûrîa Ngai-Mûnene aathîte Musa, Alawi matiataranîrua na andû a Isiraeli.

³⁴ Kwoguo Aisiraeli nîmeekire maûndû monthe wata ûrîa Ngai-Mûnene aathîte Musa. Nîmeekarire vakuvî na vendera ciao na makîthiî wa andû kûringana na mûvîrîga wao.