Ndari 1 - ÎVUKU RÎA ÛVORO MWARO

Gûtarwa kwa mbere kwa andû a Isiraeli

¹ Mûthenya wa mbere wa mweri wa kaîrî mwaka wa kaîrî kuuma andû a Isiraeli mauma Misiri, Ngai arî îgemarî rîa Ngai-Mûnene kûu werûrî wa Sinai nîwarîrie Musa akîmwîra atîrî,

² “We na Aroni tarani andû a Isiraeli, wa mûndû kûringana na mûvîrîga wake na nyomba yake. Andîkani marîîtwa ma arûme onthe

³ arîa marî na ûkûrû wa mîaka mîrongo îîrî na makîria na mangîtuîka athigari a mbaara na mûmagaanie ikundi ikundi.

⁴ Mûtongoria ûmwe kuuma kûrî wa mûvîrîga wa Isiraeli nîakaamûtethereria gûtara andû.”

⁵ Mama nîmo marîîtwa ma andû arîa makaamûtethagîrîria, wa mûndû na mûvîrîga wake. Kuuma mûvîrîgarî wa Reubeni mûgaatethagîrîrua nî Elizuri mûvîcî wa Shedeuri.

⁶ Kuuma mûvîrîgarî wa Simeoni mûgaatethagîrîrua nî Shelumieli mûvîcî wa Zurishadai.

⁷ Kuuma mûvîrîgarî wa Juda mûgaatethagîrîrua nî Nahashoni mûvîcî wa Aminadabu.

⁸ Kuuma mûvîrîgarî wa Isakaru mûgaatethagîrîrua nî Nethanieli mûvîcî wa Zuari.

⁹ Kuuma mûvîrîgarî wa Zebuluni mûgaatethagîrîrua nî Eliabu mûvîcî wa Heloni.

¹⁰ Kuuma kûrî njiarwa cia Josefu, mûgaatethagîrîrua nî Elishama mûvîcî wa Amihudi wa kuuma mûvîrîgarî wa Efiraimu; Gamalieli mûvîcî wa Pedasuri wa kuuma mûvîrîgarî wa Manase;

¹¹ Abidani mûvîcî wa Gideoni wa kuuma mûvîrîgarî wa Benjamini;

¹² Ahiezeri mûvîcî wa Amishadai wa kuuma mûvîrîgarî wa Dani;

¹³ Pagieli mûvîcî wa Okirani wa kuuma mûvîrîgarî wa Asheri;

¹⁴ Eliasafu mûvîcî wa Deueli wa kuuma mûvîrîgarî wa Gadi;

¹⁵ Ahira mûvîcî wa Enani wa kuuma mûvîrîgarî wa Nafutali.

¹⁶ Acio nîo atongoria arîa maathuurîtwe kuuma kûrî mwîngî, na kûrî mîvîrîga ya tene ya Isiraeli na kuuma kûrî atongoria a icunjî irîa ciagaanîtue cia Isiraeli.

¹⁷ Arûme aya îkûmi na aîrî nîo maatethereerie Musa na Aroni gûtarana.

¹⁸ Mûthenya wa mbere wa mweri wa kaîrî, nîmeetire andû onthe vamwe na makîmandîka onthe wa mûndû kûringana na mûvîrîga wake na nyomba yake. Arûme arîa maarî na ûkûrû wa mîaka mîrongo îîrî kûthiî na mbere nîmaatarirwe na makîandîkwa mûtaratara wao onthe,

¹⁹ wata ûrîa Ngai-Mûnene aathîte Musa. Musa aandîkîthirie andû acio arî werûrî wa Sinai.

²⁰ Mûtaratara wa arûme arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara maandîkîtwe mavangîtwe wa mûndû na mûvîrîga wake, nyomba yake, na maambîrîrîtie na andû a mûvîrîga wa Reubeni mûvîcî wa Jakovu ûrîa warî mûkûrû. Mwîgana wa andû acio kuuma kûrî wa mûvîrîga wekariî ta û:

²¹ Mûvîrîga wa Reubeni warî na arûme ngiri mîrongo îna na ithathatû na magana matandatû (46,600).

²² Mûvîrîga wa Simeoni nîwatarirwe na arûme onthe arîa maarî na ûkûrû wa kuuma mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

²³ Naguo warî na arûme ngiri mîrongo îtano na kenda na magana mathatû (59,300.)

²⁴ Mûvîrîga wa Gadi nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

²⁵ Naguo warî na arûme ngiri mîrongo îna na ithano na magana matandatû ma mîrongo îtano (45,650).

²⁶ Mûvîrîga wa Juda nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

²⁷ Naguo warî na arûme ngiri mîrongo mûgwanja na inya na magana matandatû (74,600).

²⁸ Mûvîrîga wa Isakaru nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

²⁹ Naguo warî na arûme ngiri mîrongo îtano na inya na magana mana (54,400).

³⁰ Mûvîrîga wa Zebuluni nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

³¹ Naguo warî na arûme ngiri mîrongo îtano na mûgwanja na magana mana (57,400).

³² Mûvîrîga wa Efiraimu nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

³³ Naguo warî na arûme ngiri mîrongo îna na magana matano (40,500).

³⁴ Mûvîrîga wa Manase nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

³⁵ Naguo warî na arûme ngiri mîrongo îthatû na igîrî na magana maîrî (32,200).

³⁶ Mûvîrîga wa Benjamini nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

³⁷ Naguo warî na arûme ngiri mîrongo îthatû na ithano na magana mana (35,400).

³⁸ Mûvîrîga wa Dani nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

³⁹ Naguo warî na arûme ngiri mîrongo îtandatû na igîrî na magana mûgwanja (62,700).

⁴⁰ Mûvîrîga wa Asheri nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

⁴¹ Naguo warî na arûme ngiri mîrongo îna na îmwe na magana matano (41,500).

⁴² Mûvîrîga wa Nafutali nîwatarirwe na arûme onthe arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara nîmaandîkirwe marîîtwa mao wa mûndû kûringana na mbarî yake, nyomba yake, na mûciî wake.

⁴³ Naguo warî na arûme ngiri mîrongo îtano na ithatû na magana mana (53,400).

⁴⁴ Acio nîo andû arîa Musa na Aroni maatarire magîtethagîrîrua nî atongoria îkûmi na aîrî a kuuma Isiraeli, wa mûndû arûngamîrîrîte nyomba ya îthe.

⁴⁵ Kwoguo arûme onthe a Isiraeli arîa maarî na ûkûrû wa mîaka mîrongo îîrî kûthiî na mbere na mangîatuîkire athigari a mbaara,

⁴⁶ maarî ngiri magana matandatû ma ithatû na magana matano ma mîrongo îtano (603,550).

⁴⁷ Andû a mûvîrîga wa Lawi matiataranîrua na andû a mîvîrîga îo îngî,

⁴⁸ nîûndû Ngai-Mûnene nîwerîte Musa atîrî,

⁴⁹ “Ûkîandîka mûtaratara wa andû arîa mangîtuîka athigari a mbaara, ndûgatare andû a mûvîrîga wa Lawi.

⁵⁰ Vandû va ûguo, tua andû a mûvîrîga wa Lawi a gûkuuaga îthandûkû rîa kîrîkanîro vamwe na indo ciarîo cionthe. Nwanginya mamenyagîrîre îthandûkû rîu na matume magema mao marîthiûrûrûkîrîtie.

⁵¹ Vîndî îrîa îgema rîgûkuuwa, Alawi nîo makaarîambûranagia, na vîndî îrîa rîkûrûngamua, nwao makaarîambaga. Mûgeni wa wonthe ûkarîkuvagîrîria nîakaaûragwa.

⁵² Aisiraeli acio engî makaambaga magema wa mûndû gîkundirî gîake vakuvî na vendera yao.

⁵³ Nwatî Alawi makaambaga magema mao mathiûrûrûkîrîtie îgema rîa gûcemanîrua marîrangîrîte nîguo gûtikethîrwe kûrî na ûndû ûngîtûma marakara ma Ngai-Mûnene makinyîrîre andû a Isiraeli.”

⁵⁴ Kwoguo andû a Isiraeli nîmeekire maûndû monthe marîa Musa aathîtwe nî Ngai-Mûnene eke.