Mûvunjia 3 - ÎVUKU RÎA ÛVORO MWARO

Ngai avangîte maûndû na mavinda mamo

¹ Wa ûndû ûrî kavinda ka guo, na ûndû wonthe twîkaga ûrî kavinda karîa Ngai aûvangîrîte.

² Kûrî kavinda ga gûciarwa na kavinda ka gûkua, kavinda ga kûvanda na kavinda ga gûketha.

³ Kavinda ga kûûraga na kavinda ga kûvonia, kavinda ga kwomomora na kavinda ga gûtuma.

⁴ Kavinda ga kûrîra na kavinda ga gûkena, kavinda ga kîeva na kavinda ga kwîinia.

⁵ Kavinda ga kûmenyana kîîmwîrî na kavinda gatarî ga kûmenyana kîîmwîrî, kavinda ga kûmumunyana na kavinda gatarî ga kûmumunyana.

⁶ Kavinda ga gûcaria na kavinda ga gûta, kavinda ga gûcokanîrîria indo na kavinda ga gûta.

⁷ Kavinda ga gûtembûranga na kavinda ka gûtuma, kavinda ga gûkira na kavinda ga kwaria.

⁸ Kavinda ga kwendana na kavinda ga kûmenana, kavinda ka mbaara na kavinda ka thayû.

⁹ Mûndû agunîkaga na ndûî kuumana na mawîra make monthe marîa arutaga?

¹⁰ Nîndoretie maûndû waro marîa Ngai avete andû marutage ûtûûrorî wao.

¹¹ Ngai nîavangîrîte ûndû wonthe mwaro mavinda marîa magîrîru. Nîatûvete wendi wa kûmenya maûndû ma vuvarî, nwatî ndaanatûva ûvoti wa kûmenya ûrîa Ngai ekîte kuuma Kîammbîrîria nginya mûthiia.

¹² Kwoguo nînaamenyire atî ûndû ûrîa mwaro mûndû angîka nî gûkena na gwîkenia ûtûûrorî wake wonthe.

¹³ Andû magîrîrwe nî kûrîa na kûnyua na gwîkenia na indo irîa macarîtie nîûndû indo icio nî Ngai ûmavete.

¹⁴ Nîmbicî atî maûndû monthe marîa Ngai ekaga matûûraga tene na tene. Gûtirî kîndû kîngîongererwa kana kîrutarutwe kuuma kûrî maûndû mau. Ngai atûmîte maûndû mau mekare ûguo nîguo andû mamûtîîaga.

¹⁵ Ûndû wa wonthe ûrekîka wanekîka na ûndû wa wonthe ûgeekîka nîwekîkîte tene. Ngai nîatûmaga maûndû mau mekare magîkîkaga.

Gûtura kîvooto gûkû nthî

¹⁶ Ûndû wîngî naamenyire gûkû nthî nî atî kûrîa kwagîrîrwe kwîthîrwa na kîvooto na ûûma kwîthagîrwa na maûndû macûku.

¹⁷ Nînaîrire na ngoro atîrî, “Ngai agaatuîra andû arîa athingu wana arîa aganu nîûndû nîavangîte mavinda ma ûndû wa wonthe na wîra wonthe.”

¹⁸ Nînatuire atî Ngai nîkwa arathimaga andû nîguo amonie atî matirî ngûrani na nyamû.

¹⁹ Mûrigîrîrio wa mûndû na wa nyamû nî ûmwe. Wa ûrîa andû makucaga nwaguo nyamû ikucaga. Andû wana nyamû mavevaga rîera ûndû ûmwe na mûndû tî mwaro gûkîra nyamû, nîûndû kûrî andû wana nyamû ûtûûro nî wa mana.

²⁰ Andû wana nyamû ciaumire mûtheturî. Andû magaacoka mûtheturî wana nyamû igaacoka mûtheturî rîngî.

²¹ Nî ûrîkû wicî waro kana vuva wa gûkua mîoyo ya andû îthiîcaga îgûrû nayo ya nyamû îthiîcaga mûtheturî?

²² Nînaacokire ngîmenya atî ûndû ûrîa mwaro mûno mûndû angîka nî gwîkenia na indo irîa acarîtie nîûndû ûguo nîguo avangîrîtwe. Gûtirî mûndû ûngîmenya ûrîa gûgekara arîkia gûkua.