Mika 5 - ÎVUKU RÎA ÛVORO MWARO

Bethilehemu nî gûkaauma mûthamaki wa Isiraeli

¹ Andû a Jerusalemu gomaniani athigari enyu vamwe, nîûndû nthû nîitûrigicîrîtie, iratharîkîra mûtongoria wa Isiraeli.

² Ngai-Mûnene augîte atîrî, “We Bethilehemu Efiratha, nîwe îtûûra rîrîa rînini mûno Juda. Nwatî mûndû ûrîa ûkaathana Isiraeli vandûrî vakwa akaauma kûrî we, na nîwa njiarwa cia methe ma tene.”

³ Kwoguo Ngai-Mûnene nîagaatiganîria andû ake, nginya rîrîa mûndûmûka ûrîa ûrî îvu agaaciara kavîcî. Nao andû ao arîa marî îthamîriorî nîmagaacokanîrîra rîngî na andû a Isiraeli.

⁴ Mûtongoria ûcio nîakaarîthia andû ake na vinya kuuma kûrî Ngai-Mûnene, na ûvoti wa Ngai ke mwene. Andû ake nîmagaatûûra matarî na guoya, nîûndû akethîrwa arî mûnene nginya mîthiia yonthe ya nthî,

⁵ nake nî akaareta thayû. Rîrîa andû a Asîria makaatharîkîra vûrûri wetû; na momomore nyomba cietû cia kwîgitîra, nîtûgaatûma atongoria etû arîa marî vinya makarûe nao.

Kûvonokua na kûverithua

⁶ “Nîmagaatûmîra indo ciao cia mbaara kwatha Asîria, nîmakavoota vûrûri wa Nimurodi. Na nîmagaatûvonokia kuuma kûrî Asîria rîrîa makaatharîkîra vûrûri wetû.

⁷ Nao andû a Isiraeli arîa magaatigara marî mwoyo makethîrwa mekariî ta îme kuuma kûrî Ngai-Mûnene marî gatagatî ka andû arîa engî kana ta mbura ya rûthuthuû rûrîa rûgwîcagîra nyaki, na ndiurithagua nî mûndû nwatî nî Ngai.

⁸ “Andû a Isiraeli arîa magatigara marî mwoyo, marî mavûrûrirî marîa mengî, makeethagîrwa mekariî ta mûnyambû ûrî gatagatî ka nyamû cia kîthaka, kana ta kaana ka mûnyambû karî ndîthiîra ya ng'ondu. Kathiîcaga na gakaûraga na gûtamburûranga kîrîa kaûragîte, na gûtirî mûndû wa kûivonokia.

⁹ Andû a Isiraeli nîmakaavoota nthû ciao, na maithirie cionthe.”

¹⁰ Ngai-Mûnene arauga atîrî, “Vîndî îo nîngathengutia mbarathi kuuma gatagatîrî kenyu, na njûkangie ikaari cienyu cia mbaara.

¹¹ Nîngaacûkangia matûûra ma vûrûri wenyu, na nyomomore kûndû kwenyu gwa kwîgitîra.

¹² Nîngaathiria aragûri onthe arîa mwîthagîrwa nao na nîmûtige mûtarî na mûndû wa kûmwonera maûndû.

¹³ Nîngaacûkangia mîvuanano yenyu, na itugî cia mathiga irîa mûgoocaga. Mûtigaacoka kûgooca rîngî indo irîa mwîthondekerete.

¹⁴ Nîngaaruta mîvuanano ya ngai ya Ashera vûrûrirî wenyu, na njûkangie matûûra menyu.

¹⁵ Nîûndû wa marakara makwa meengî, nîngaaverithia mavûrûri marîa mataambathîkîra.”