Mika 1 - ÎVUKU RÎA ÛVORO MWARO

¹ Ndûmîrîri ya Ngai-Mûnene nîyakinyîre Mika vîndî îrîa Jothamu, Ahazi, na Hezekia maarî athamaki a vûrûri wa Juda. Mûrathi Mika aarî wa kuuma îtûûra rîa Moreshethi, na nîwaguûrîrue maûndû marîa maarî mekîke Samaria na Jerusalemu.

Gûcakaya nîûndû wa Samaria na Jerusalemu

² Mue andû onthe thikîrîriani; we nthî na indo irîa irî kuo ta thikîrîria. Ngai-Mûnene nîararia maûndû macûku mamwîgiî, araria arî hekarûrî yake ntheru.

³ Ngai-Mûnene nîaûka aumîte kûrîa gwake kûtheru; akaanyûrûrûka athiîrîre îgûrû rîa irîma.

⁴ Irîma nî ikaararûka ta mûvûra irî rungu rwa magûrû make; ikaanyûrûrûka ciandarî ta manjî makînyûrûrûka kuuma kîrîmarî.

⁵ Maûndû mama monthe magekîka nîûndû wa mavîtia ma Jakovu, na nîûndû wa mevia ma andû a Isiraeli. Mavîtia ma Jakovu marî kû? Marî îtûûrarî rîa Samaria! Mevia ma andû a Juda nî marîkû? Nî Jerusalemu!

⁶ Kwoguo, Ngai-Mûnene augîte atîrî, “Nîngaatûma Samaria gûtuîke kîrûndo Kîam mathiga werûrî, kûndû gwa kûvandwa mîthavibu. Mathiga marîa magûtumîte nîngaamaikia Kîamndarî, na nthikûrie mîcingi ya kuo.

⁷ Mîvuanano yonthe ya ngai cia Samaria nîngaamiunanga tûcunjî, indo irîa ciarutagîrwa maraa ma hekarûrî nîikaavîvua na mwaki, na mîvuanano yonthe îtuîke ya mana. Nîûndû andû a Samaria maaûnganirie indo icio na njîra ya ûmaraa, na igaatûmîrwa kûrîva maraa.

⁸ Nîûndû wa ûguo nîngûrîra na njakae; nînthiî nîrî njaga na ndarî iratû. Nîndîra ta Kîamthi, na ndîre ta nyaga.

⁹ Nîûndû nguraro cia andû a Samaria itingîvona, nao andû a Juda nîagwate nî thîna wata ûcio, thîna ûkinyîte ivingorî cia Jerusalemu, kûrîa andû akwa matûûraga.”

Nthû nîciakuvîvîrie Jerusalemu

¹⁰ Mûtikeere andû a Gathu maûndû mama, mûtikarîre wana vanini, andû a Bethi-leafura îîgaragarieni rûkûngûrî.

¹¹ Mue andû a Shafiri, umagarani mûrî njaga na mûconokete, atûûri a Zaanani mûtikaume nja ya îtûûra rîenyu. Andû a Bethezeli nîmararîra, matirî na kûndû gwa kûûrîra.

¹² Andû a Marothu metererete kwona maûndû maro, nîûndû Ngai-Mûnene nîatûmîte kûgîa thîna, nginya kîvingorî Kîam Jerusalemu.

¹³ Mue mûtûûraga Lakishi, overerani ikaari cia mbaara mbarathirî. Nîmwekire mevia ta marîa mekirwe nî andû a Jerusalemu, na mûgîtûma andû a Isiraeli mevie.

¹⁴ Kwoguo mue andû a Juda, vani andû a Moreshethi Gathu iveo cia kûmaugîra ûvoro. Narîo îtûûra rîa Akizibu rîtigateethia athamaki a Isiraeli.

¹⁵ Mue andû a Maresha, Ngai-Mûnene nîagaatûma nthû imûtharîkîre na imûvoote. Atongoria a Isiraeli nîmakaathiî kwîthitha ngurungarî ya Adulamu.

¹⁶ Andû a Juda enjani njuîrî cienyu mûtigwe mûrî irîa mûrîrîre ciana cienyu irîa mwendete, neneviani ivara cienyu ciîkare ta cia nderi, nîûndû ciana nîigaatavwa ivirwe îthamîriorî.