Maariko 2 - ÎVUKU RÎA ÛVORO MWARO

Jesû nîwavonirie mûndû warî mûkuû ciîga cia mwîrî

¹ Mîthenya mînini yavîtûka, Jesû arîkia gûcoka Kaperinaumu, nîkwamenyekanire atî aarî mûciî.

² Nao andû eengî nîmaagomanire kuo ki na magîtura vandû mangîkara, wana nginya vau nja ya nyomba. Na vîndî wa îo Jesû akîmavunjagîria,

³ andû ana nîmaakinyire makuuanîrîte mûndû warî mûkuû ciîga cia mwîrî.

⁴ Nao matingîavotire kûmûkinyia kûrî Jesû nîûndû wa ûrîa kîrîndî Kîamvatîkanîte. Kwoguo nîmaaimbûrire nyomba îgûrû rîa varîa Jesû aarî. Na maimbûra vandû mangîvota kûmûtonyereria, nîmaamûnyûrûrûkirie amamîrîte kîvarî.

⁵ Nake Jesû ona ûrîa maarî na wîtîkio mûnene, nîwerire mûndû ûcio wakuîte ciîga ciake cia mwîrî atîrî, “Mûvîcîwa, nîwoverwa mevia maku.”

⁶ Nao arimû a Watho arîa meekarîte kuo, nîmeeyûririe na ngoro ciao atîrî,

⁷ “Mûndû ûyû angîvota kuga ûguo atîa? Kûu nî kûruma Ngai. Nû ûngîvota kwovanîra mevia tiga Ngai?”

⁸ Nake Jesû nîwamenyire wa rîmwe ûrîa meciragia, na kwoguo akîmaûria atîrî, “Nîndûî kîratûma mwîcirie maûndû ta mama?

⁹ Ûndû ûrîa mûvûthû nî ûrîkû, nîkwîra mûndû ûyû ûkuîte ciîga ciake cia mwîrî, ‘Nîwoverwa mevia maku,’ kana nîkûmwîra, ‘Ûkîra woce kîvarî gîaku na wîthiîre?’

¹⁰ Nie nîngûmwonia na ma atî Mûrû wa Mûndû arî na ûvoti gûkû nthî wa kwovanîra mevia.” Na kwoguo nîwerire mûndû ûcio wakuîte ciîga ciake cia mwîrî atîrî,

¹¹ “Nie nakwîra ûkîre woce kîvarî gîaku, na wînûke!”

¹² Nake mûndû ûcio nîwaûkîrire, agîoca kîvarî gîake na akiuma narua aroretue nî andû onthe. Nao andû onthe nîmaamakire na magîkumia Ngai makiugaga atîrî, “Kaî rûrû tûtirî twaruona-î!”

Jesû nîwetire Lawi

¹³ Jesû acoka rûtererî rwa îria rîa Galili, andû eengî nîmaathiîre kûrî ke na akîambîrîria kûmathomithia.

¹⁴ Na rîrîa aavîtûkaga, nîwonire mwîtia wa mbeca cia gooti wetagwa Lawi mûrû wa Alufayo ekarîte wavicirî yake. Nake Jesû nîwamwîrire atîrî, “Nûmîrîra.” Nake Lawi nîwaûkîrire na akîmûrûmîrîra.

¹⁵ Rîrîa Jesû eekarîte metharî akîrîa irio kwa Lawi mûciî, etia eengî a mbeca cia gooti na evia arîa maamûrûmîrîrîte, nîmeekaranîre vamwe na Jesû na arutwa ake.

¹⁶ Na rîrîa arimû amwe a watho, a gîkundi Kîam Afarisai moonire Jesû akîrîcanîra na evia na etia a mbeca cia gooti, nîmaaûririe arutwa ake atîrî, “Nîndûî gîtûmaga arîcanîrena andû ta aya?”

¹⁷ Rîrîa Jesû eegwire ûrîa maaûragia, nîwamerire atîrî, “Andû arîa arwaru nîo mavataraga ndagîtarî, nwatî tî arîa matarî arwaru. Nie ndiûkîte gwîta andû arîa athingu, nwatî mbûkîte gwîta evia.”

Kîûria kîgiî kwînyerekia

¹⁸ Vîndî îmwe rîrîa arutwa a Johana ûrîa Mûvatithania na a Afarisai meenyereketie, andû amwe nîmaathiîre kûrî Jesû na makîmûria atîrî, “Nîndûî gîtûmaga arutwa a Johana Mûvatithania na a Afarisai menyerekie, nwatî aku matiînyerekagia?”

¹⁹ Nake Jesû nîwamacokerie atîrî, “Andû arîa metîrîtwe ûviki nwa menyerekie vîndî îrîa mûvikania arî vamwe nao?” Ûguo gûtingîvoteka! Vîndî îrîa mûvikania arî vamwe nao, matingîvota kwînyerekia.

²⁰ Kavinda nîgagaakinya rîrîa mûvikania akaathengutua karîgatîrî kao, na vîndî îo nîmakenyerekia.

²¹ “Gûtirî mûndû ûtengaga nguo ngûrû na kîraka gîkî gîcerû, nîûndû angîka ûguo, kîraka kîu nwa kîgucagucie nguo îo ngûrû, nayo îgatembûka mûno.

²² Wana gûtirî mûndû wonoragîria ndivei ya kûvivwa warîo mboororî îno ngûrû, nîûndû mbooro îo nwa îtarûrwe nî ndivei îo, na ndivei, wana mbooro ikaûra mana. Ndivei ya kûvivwa warîo yonoragîrua mboororî îno njerû.”

Kîûria kîgiî mûthenya wa thavatû

²³ Na mûthenya ûmwe wa thavatû Jesû nîwavîtûkîre mîgûndarî ya ngano. Nao arutwa ake arîa maathiîcanîtie nake nîmaambîrîrie gûtua igira cia ngano.

²⁴ Kwoguo Afarisai nîmaaûririe Jesû atîrî, “Nîndûî kîratûma arutwa aku meke ûrîa Watho ûtetîkîrîtie gwîkwe mûthenya wa thavatû?”

²⁵ Nake Jesû nîwamacokerie atîrî, “Anga mûtianathoma ûrîa Daudi eekire rîrîa ke vamwe na arîa maarî nake maarî avûtu?

²⁶ Aatonyire nyombarî ya Ngai vîndî îrîa Abiatha aarî Mûthînjîri-Ngai mûnene, na akîrîa mîgate îrîa yarutîrîtwe Ngai na îtaagîrîrwe kûrîwa nî mûndû wîngî tiga athînjîri-Ngai onga. Daudi nîwamîrîre na akîva arîa engî maarî nake.”

²⁷ Nake Jesû akîrîkîrîria nîwamerire atîrî, “Mûthenya wa thavatû watuirwe nîûndû wa wagîrîru wa mûndû, nwatî mûndû ndaaûmbwa nîûndû wa thavatû.

²⁸ Na kwoguo Mûrû wa Mûndû nî Mwathani nginya wa mûthenya wa thavatû.”