Maariko 15 - ÎVUKU RÎA ÛVORO MWARO

Jesû nîwavirirwe kûrî Pilato

¹ Kîraûko tene anene a athînjîri-Ngai nîmaagîre ndundu na athuuri, arimû a Watho, Kîamma kîonthe na makîrîkanîra ûrîa magwîka. Nao nîmoovire Jesû na makîmûvira kûrî Pilato.

² Nake Pilato nîwamûûririe atîrî, “We nîwe mûthamaki wa Ayahudi?” Nake Jesû nîwamûcokerie atîrî, “Nîwe wauga guo!”

³ Nao anene a athînjîri-Ngai nîmaathitangire Jesû na maûndû mengî,

⁴ kwoguo Pilato nîwamûûririe rîngî atîrî, “Anga ndûgûcokia? Tathikîrîria maûndû mau monthe marakûthitanga namo!”

⁵ Wana rîngî Jesû nîwaregire gûcokia wa naarî ûndû. Kwoguo Pilato nîwamakire mûno.

Jesû nîwatuîrîrwe kûûragwa

⁶ Vîndî ya pasaka Pilato nîwamenyerete kûrekagîrîria mûndû ûmwe wa arîa meethagîrwa marî njeera, mûndû wa ûrîa andû mangîetirie.

⁷ Na vîndî îo kwarî na mûndû ûmwe wetagwa Baraba wovetwe njeera vamwe na mîtoi îrîa yaûraganîte vîndî îrîa kwarî na mbaara ya kûregana na thirikari.

⁸ Nakîo kîrîndî nîkîathiîre kûrî Pilato na gîkîmûûria eke ûrîa aamenyerete gwîka.

⁹ Nake Pilato nîwamaûririe atîrî, “Nîmûkwenda nîmûrekerie mûthamaki wa Ayahudi?”

¹⁰ Pilato nîwecî waro atî anene a athînjîri-Ngai maanenganîrîte Jesû kûrî ke nîûndû maarî na wîru.

¹¹ Kwoguo anene a athînjîri-Ngai nîmaaringîrîre kîrîndî kîre Pilato amarekerie Baraba.

¹² Nake Pilato nîwacokire akîmaûria rîngî atîrî, “Mûrenda mbîke atîa vi na mûndû ûyû mwîtaga mûthamaki wa Ayahudi?”

¹³ Nao nîmaanîrîre atîrî, “Mwambithie mûtharavarî îgûrû.”

¹⁴ Nake Pilato nîwamaûririe atîrî, “Nîmwambithia nîkî? Ekîte wîvia ûrîkû?” Nwatî nîmaakîrîrîrie kugîrîria atîrî, “Mwambithie mûtharavarî îgûrû.”

¹⁵ Na nîûndû Pilato nîwendaga gûkenia kîrîndî, nîwamarekerie Baraba. Nake Pilato nîwarivithirie Jesû ivoko na akîmûnenganîra akambwe.

Thigari nîcianyûrûririe Jesû

¹⁶ Nao athigari nîmaavirire Jesû nyombarî ya mûnene na magîîta athigari arîa engî a mbûtû yao.

¹⁷ Nîmaacokire makîmwîkîra nguo ya rangi ya njambarawe, makîthondeka nthûmbî ya mîgua na makîmwîkîra yo kîongorî gîake.

¹⁸ Nao athigari nîmaambîrîrie kûmûkethia na kînyûrûri atîrî, “Wî mwaro Mûthamaki wa Ayahudi!”

¹⁹ Nao nîmaamûrivire kîongo na rûthanju, makîmûtuîra mata na makîmûturîria maru takwa maramûgooca.

²⁰ Rîrîa maarîkirie kûmûnyûrûria, nîmaamûrutire nguo ya rangi ya njambarawe îrîa maamwîkîrîte na makîmûcokia nguo ciake. Nao nîmaamûrutire na nja makamwambe.

Kwambwa kwa Jesû

²¹ Na marî njîrarî, nîmaatûnganire na mûndû wetagwa Simoni aumîte ya mîgûndarî na makîmûringîrîria akuuîre Jesû mûtharava. (Simoni aarî wa kuuma Kurene na aarî îthe wa Alekisanda na Rufasi.)

²² Nao nîmaavirire Jesû vandû vetagwa Gologotha, na ûguo nî ta kuga. “Vandû va îvîndî rîa kîongo.”

²³ Nîmaaveere Jesû ndivei îtukanîtue na kîndû kîrûrû, nwatî akîrega kûmînyua.

²⁴ Nîmaamwambire, makîgaania nguo ciake na magîciûthîra nîguo mamenye gîcunjî kîrîa wa mûndû akûthiî nakîo.

²⁵ Maamwambire thaa ithatû cia kîraûko.

²⁶ Nakîo kîmenyithia gîa kwonania gîtûmi Kîam ambwe, Kîamndîkîtwe atîrî, “Mûthamaki wa Ayahudi.”

²⁷ Nîmaacokire makîamba acuunani aîrî vamwe na Jesû, ûmwe mwena wake wa ûrîo na ûcio wîngî mwena wake wa ûmotho. [

²⁸ Namo mandîko marîa maugîte atî nîwataranîrue vamwe na imaramari, nîmaavingirue.]

²⁹ Nao andû arîa maavîtûkagîrîra vau nîmaamûrumaga na makamûnyûrûria makîmwîraga atîrî, “Oo! We nîûngîomomorire hekarû na ûmîtume rîngî na mîthenya îthatû,

³⁰ rîu îîtethûre na wîrute mûtharavarî.”

³¹ Wana nginya anene a athînjîri-Ngai na arimû a Watho nîmaamûnyûrûririe makîranaga atîrî, “Nîaratethûraga arîa engî, nwatî ndangîîtethûra!

³² Tiga twone Mesaya mûthamaki wa Isiraeli akîîruta kuuma mûtharavarî îgûrû na nîtûkûmwîtîkia.” Wana nginya acunani arîa maambîtwe vamwe nake nîmaamûrumire.

Gûkua kwa Jesû

³³ Na thaa thita cia mûthenya ciakinya, vûrûri wonthe nîwagîre nduma nginya thaa kenda.

³⁴ Na ciakinya thaa kenda Jesû nîwaugîrîrie atîrî, “Eloi, Eloi, lama, savakithani?” Na ûguo nî ta kuga, “Ngai wakwa, Ngai wakwa, wandiganîria nîkî?”

³⁵ Nao andû amwe arîa maarûngamîte vau mamwîgua, nîmaaugire atîrî, “Tegueni nîareta Elija.”

³⁶ Na ûmwe gatagatîrî kao nîwavinyûrire agîoca civonji, na akîmîrinda ndiveirî îno ngagatu. Nîwacokire akîmîmundîrîra karûthanjurî na akîmûnengereria anyue akiugaga atîrî, “Etererani twone kana Elija nîagûka kûmûruta kuuma mûtharavarî.”

³⁷ Nake Jesû nîwanîrîre na mûgambo mûnene akînakua.

³⁸ Vîndî wa îo gîtambaa gîa hekarû nîgîatûkanire maita maîrî, kuuma îgûrû nginya nthî.

³⁹ Nake mûnene ûmwe wa athigari îgana ûrîa warûngamîte vau mbere ya Jesû ona agîtuîkana nîwaugire atîrî, “Na ma mûndû ûyû ararî Mûriû wa Ngai.”

⁴⁰ Na vau vaarî na aka meeroragîria marî varaca. Gatagatîrî kao kwarî na Mariamu Mûmagidali, Salome na Mariamu ng'ina wa Josefu na Jakuvu ûrîa mûnini.

⁴¹ Nao nîmaarûmagîrîra Jesû na makamûtungatagîra vîndî îrîa aarî Galili. Wana vaarî na aka engî eengî arîa maathiîte nake Jerusalemu.

Kûthikwa kwa Jesû

⁴² Kwarî kîvwaî mûthenya wa kwîvarîria na nîguo mûthenya ûrîa wî mbere ya mûthenya wa thavatû.

⁴³ Josefu wa kuuma Arimathea nîwaûkire. Nake aarî mûthuuri mûtîîe wa Kîamma na watûûraga etererete gûka kwa Ûthamaki wa Ngai. Nake nîwathiîre kûrî Pilato na akîmûria amûve mwîrî wa Jesû.

⁴⁴ Pilato nîwamakire mûno rîrîa eegwire atî Jesû nî mûkuû. Na kwoguo nîwetire mûnene wa athigari îgana nîguo amûrie kana Jesû aarî mwîkaru kavinda karaca kuuma akua.

⁴⁵ Rîrîa eerirwe nî mûnene ûcio wa athigari îgana atî Jesû aarî mûkuû, nîwavere Josefu mwîrî wa Jesû.

⁴⁶ Nake Josefu nîwagûrire cuka, agîcurûria mwîrî ûcio, akîûrigica nayo, na akîwiga mbîrîrarî îrîa yacîtwe îthigarî. Nîwacokire akîvingiritia îthiga rînene nîguo rîkunîke mûromo wa mbîrîra îo.

⁴⁷ Nake Mariamu Mûmagidali na Mariamu ng'ina wa Josefu, nîmoonire varîa mwîrî wa Jesû waigirwe.