Kûguû 19 - ÎVUKU RÎA ÛVORO MWARO

¹ Vuva wa ûguo, nînegwire mûgambo wekariî ta wa gîkundi kînene Kîam andû marî kûu îgûrû ûkiuga atîrî: “Ngai arokumua! Ûvonokio, riiri, na vinya nî cia Ngai wetû!

² Nîûndû atucanagîra ciira na ûma na kîvooto! Ke nîatuîrîrîte ciira mûmaraa ûrîa watûmire andû a nthî meka maûndû macûku ma ûtharia. Ngai nîamûverithîtie nîûndû ke nîwaûragire ndungata ciake.”

³ Wana rîngî nînaugîrîrie atîrî, “Ngai arokumua! Ndogo kuuma mwakirî ûrîa ûravîvia îtûûra rîu înene yunûkagia na îgûrû tene na tene!”

⁴ Nao athuuri arîa mîrongo îîrî na ana vamwe na ciûmbe irîa irî mwoyo inya nîmeegwîthirie nthî na makîgooca Ngai ûrîa wekarîrîte gîtî Kîam ûnene, makiugaga, “Ameni, Ngai arokumua!”

Kîrugo kîa ûviki wa Gatûrûme

⁵ Vuva wa ûguo nînegwire mûgambo kuuma gîtîrî Kîam ûnene ûkiuga atîrî, “Ngai wetû arokumua nî mue arîa onthe mûmûtungataga na mûmûtîîaga, mue muonthe anene na anini!”

⁶ Ngîcoka ngîgua mûgambo ta wa andû eengî mûno. Mûgambo ûcio wagambaga ta mûgambo wa ndurumo ya manjî meengî mûno, kana mûrurumo mûnene wa ngwa. Nao maaugaga atîrî, “Ngai arokumua! ‘Nîûndû Mwathani, Ngai wetû mwene vinya wonthe, nî mûthamaki!’

⁷ Nîtûkeneni na tûcanjamûke; nîtûkumieni ûnene wake! Nîûndû kavinda ga Gatûrûme kûgîa na mûviki nîgakinyu. Nake mûviki wake nîmwîvarîriu nîûndû waguo.

⁸ Ke nîmûnengere nguo mbaro ya hariri îravenavenia ya gwîkîra.” (Nguo mbaro nî ciîko mbaro irîa andû a Ngai mekaga.)

⁹ Nake mûraika nîwambîrire, “Andîka atîrî: Kûrathimwa nî arîa metîtwe kîrugorî Kîam ûviki wa Gatûrûme.” Mûraika nîwaugire rîngî atîrî, “Ino nîcio ciugo cia ma kuuma kûrî Ngai.”

¹⁰ Nînegwîthirie nthî mbere yake nîmûgooce, nwatî ke nîwambîrire atîrî, “Tiga gwîka ûguo! Nie ndungatagîra Ngai wa tawe na etîkia arîa engî onthe evokeku. Acio nî arîa marûmagîrîra ûira wa Jesû. Goocani Ngai arî ke!” Nîûndû ûira ûrîa ûguûragwa nî Jesû nîguo ûtûmaga arathi manîrîre ndûmîrîri ya ûkristiano.

Mûndû wathiîte ekarîrîte mbarathi ya rangi njerû

¹¹ Nînacokire ngîona îgûrû rîvingûkîte na kûrî na mbarathi ya rangi njerû. Ûrîa wathiîte amîkarîrîte etagwa Mwîvokeku na wa Ma. Na ûrîa atucanagîra ciira na akarûa mbaara na njîra ya kîvooto.

¹² Metho make maakanîte ta mwaki mûkengu mûno. Kîongorî gîake nîwekîrîte nthûmbî nyîngî. Mwîrîrî wake nîkwandîkîtwe rîîtwa, nwatî gûtirî mûndû ûngîarîmenyire tiga Ke mwene.

¹³ Nguo îrîa eekîrîte yarindîtwe nthakamerî. Narîo rîîtwa rîake nî “Kiugo Kîam Ngai.”

¹⁴ Nayo mbûtû ya athigari a îgûrû nîmaamûrûmîrîre mekarîrîte mbarathi cia rangi njerû, na mekîrîte nguo cia hariri ntheru cia rangi njerû.

¹⁵ Kanyuarî gake nîkwaumire rûviû rwa njûra rûûgî, rûrîa ke akaavûthîra kûvoota mavûrûri. Ke nîakaamathaga na rûthanju rwa cuuma. Nî akaaviva thavibu ciume ndivei ya marakara ma Ngai mwene vinya wonthe.

¹⁶ Nguorî yake, Kîamûrî gîake nîvaandîkîtwe rîîtwa atîrî: “Mûthamaki wa athamaki, Mwathani wa aathani.”

¹⁷ Nînacokire ngîona mûraika arûngamîte îgûrû rîa riûa. Nîwaugîrîrie na mûgambo mûnene agîîta iconi cionthe irîa ciagûrûkaga rîerarî agîciîra atîrî: “Ûkani mûgomane vamwe kîrugorî kînene Kîam Ngai.

¹⁸ Ûkani mûrîe mîîrî ya athamaki, anene a athigari a mbaara, andû arîa marî îgweta, ya mbarathi na ya andû arîa mathiîcaga maciîkarîrîte, na mîîrî ya andû onthe, ngombo na arîa matarî ngombo anini na arîa anene!”

¹⁹ Nînacokire ngîona nyamû na athamaki a nthî na mbûtû ciao cia athigari a mbaara. Nao maagomanîte nîguo marûe na ûrîa wathiîte ekarîrîte mbarathi ya rangi njerû na mbûtû yake ya athigari a mbaara.

²⁰ Nayo nyamû nîyanyitirwe wa vamwe na mûrathi wa maveeni ûrîa waringaga ciama îrî vo. (Na njîra ya ciama icio, mûrathi ûcio wa maveeni nîwavîtithirie arîa maarî na rûûri rwa nyamû na maagoocete mûvuanano wayo.) Nyamû îo na mûrathi ûcio wa maveeni nîmaaikirue marî mwoyo îriarî rîa mwaki ûrîa wakanaga na ûviriti.

²¹ Nao athigari ao a mbaara nîmaaûragirwe na rûviû rwa njûra rûrîa rumaga kanyuarî ka ûrîa wathiîte ekarîrîte mbarathi. Nacio iconi cionthe nîciarîre nyama cia mîîrî yao wata ûrîa ingîavotire.