Kîam 46 - ÎVUKU RÎA ÛVORO MWARO

Jakovu na andû a mûciî wake nîmaathiîre Misiri.

¹ Isiraeli nîwocire indo ciake cionthe na akîthiî Beerisheba. Rîrîa aakinyire kuo, nîwarutîre Ngai wa îthe Isaka îgongoona.

² Ûtukû, Ngai nîwarîrie Jakovu na njîra ya kîoneki na akîmwîra atîrî, “Jakovu, Jakovu!” Nake Jakovu nîwacokirie atîrî, “Îî, nîrî ava.”

³ Nake Ngai nîwamwîrire atîrî, “Nînie Ngai wa aguo. Kwoguo ndûgetigîre kûthiî Misiri. Nîngaatûma njiarwa ciaku ituîke rûrîrî rûnene.

⁴ Nîngaathiî vamwe nawe Misiri, na nîngaagûcokia gûkû Kanaani vamwe na njiarwa ciaku. Josefu nîakethîrwa arî vamwe nawe ûgîkua.”

⁵ Jakovu nîwacokire akiuma Beerisheba. Avîcî a Jakovu nîmoocire îthe, twana twao, aka ao, makîmatwîthia ikaarirî cia mbarathi irîa mûthamaki wa Misiri aanenganîrîte.

⁶ Nîmaakuuire ndîthia yao wana indo cionthe irîa maagîte nacio marî kûu vûrûrirî wa Kanaani na makîthiî Misiri. Jakovu nîwathiîre na njiarwa ciake cionthe kûu vûrûrirî wa Misiri.

⁷ Nacio ciarî: avîcî ake, ciana cia erîtu na anake cia avîcî ake, na erîtu ake.

⁸ Andû a Jakovu arîa maathiîre nake vûrûrirî wa Misiri maarî: Reubeni mûvîcî wake wa îrikithathi

⁹ na avîcî a Reubeni maarî: Hanoku, Palu, Hezironi na Karîmi.

¹⁰ Avîcî a Simeoni maarî: Jemueli, Jamini, Ohadi, Jakini, Zohari, na Shauli ûrîa ng'ina aarî Mûkanaani.

¹¹ Avîcî a Lawi maarî: Gerishoni, Kohathu na Merari.

¹² Avîcî a Juda maarî: Eri, Onani, Shela, Perezi na Zera, (nwatî Eri na Onani nîmakuîrîrîte Kanaani). Avîcî a Perezi maarî: Hezironi na Hamuli.

¹³ Avîcî a Isakaru maarî; Tola, Puva, Lobu na Shimuroni.

¹⁴ Avîcî a Zebuloni maarî: Seredi, Eloni na Jahileeli.

¹⁵ Acio nîo avîcî a Jakovu arîa mûka Lea aamûciarîrîte marî vûrûrirî wa Padaniaramu (Mesopotamia.) Maarî na mwîrîtu ûmwe wetagwa Dina. Ciana cionthe cia Jakovu marî na Lea, ciarî mîrongo îthatû na ithatû (33).

¹⁶ Avîcî a Gadi maarî: Zifioni, Hagi, Shuni, Eziboni, Eri, Arodi, na Areli.

¹⁷ Avîcî a Asheri maarî: Imuna, Ishiva, Ishivi, Beria, na mwarwang'ina Sera. Avîcî a Beria maarî: Heberi na Malikieli.

¹⁸ Acio nîo avîcî a Jakovu arîa mûka Zilipa aamûciarîrîte. Zilipa nî ndungata îrîa Labani aaveete mwarî Lea.

¹⁹ Avîcî a Jakovu arîa mûka Rakeli aamûciarîre maarî: Josefu na Benjamini.

²⁰ Josefu arî Misiri, nîwagîre na avîcî aîrî; Manase na Efiraimu. Josefu maaciarîte ciana ino marî na Asenathi mwarî wa Potifera mûthînjîri-ngai wa Oni.

²¹ Avîcî a Benjamini maarî: Bela, Bekeri, Ashibeli, Gera, Naamani, Ehi, Roshi, Mupimu, Hupimu na Aradi.

²² Acio nîo avîcî a Jakovu îkûmi na ana arîa Rakeli aamûciarîrîte.

²³ Dani aarî na mûvîcî wetagwa Hushimu.

²⁴ Avîcî a Nafutali maarî: Jahizeeli, Guni, Jezeri na Shilemu.

²⁵ Acio nîo avîcî mûgwanja a Biliha ndungata ya mwîrîtu îrîa Labani aaveete mwarî Rakeli.

²⁶ Andû onthe a Jakovu arîa maarî njiarwa ciake wenga arîa maathiîre Misiri matataranîrîtue na aka a avîcî ake, maarî mîrongo îtandatû na atandatû (66).

²⁷ Josefu aarî na avîcî aîrî arîa aagîte nao arî Misiri. Kwoguo andû onthe a Jakovu arîa maathiîre Misiri maarî mîrongo mûgwanja (70).

Jakovu na andû a mûciî wake marî Misiri

²⁸ Jakovu nîwatûmire Juda mbere nîguo akeere Josefu amatûnge Gosheni. Na rîrîa maakinyire Gosheni,

²⁹ Josefu nîwocire gîkaari gîake Kîam mbarathi na akîthiî Gosheni gûtûnga îthe. Rîrîa maatûnganire, Josefu nîwakumbatîrie îthe, akîmûmumunya na akîrîra gwa kavinda.

³⁰ Isiraeli nîwerire Josefu atîrî, “Rîu nîûndû nînakwona na namenya ûrî mwoyo, wana nîngîkua.”

³¹ Josefu nîwerire aa mûrwang'ina vamwe na andû onthe a nyomba ya îthe atîrî, “Nie nîngûthiî kûrî mûthamaki wa Misiri ngamwîre atî aa mûrwaiya onthe vamwe na andû onthe a nyomba ya vava arîa maatûûraga Kanaani nîmaûkîte kûrî nie.

³² Nîngûmwîra atî mûrî arîthi, nîûndû mwîthagîrwa na ng'ombe na mûkîte na ndîthia ya mbûri, ng'ondu vamwe na indo cienyu cionthe.

³³ Mwona mûthamaki wa Misiri amwîta amûrie mûrutaga wîra ûrîkû,

³⁴ mûmwîre atî, ‘ûtûûrorî wenyu wonthe mwîthîrîtwe mûrî arîthi, wata ûrîa methe menyu maarî.’ Mwauga ûguo, nîmûgetîkîrua mûtûûre vûrûrirî ûcio wa Gosheni.” Josefu aamerire ûguo nîûndû ûrîthi wa ng'ondu nî mûgiro kûrî andû a Misiri.