Kîam 38 - ÎVUKU RÎA ÛVORO MWARO

Juda na Tamarû

¹ Îvindarî rîu Juda nîwatiganire na aa mûrwang'ina na akîthiî gûtûûrania na mûndû ûmwe wetagwa Hira, warî wa kuuma îtûûra rîa Adulamu.

² Juda arî kûu, nîwacemanirie na mwîrîtu ûmwe Mûkanaani. Nîwamûvikirie na akîmenyana nake kîîmwîrî. Îthe wa mwîrîtu ûcio eetagwa Shua.

³ Mûka ûcio nîwagîre îvu na agîciara kavîcî. Juda nîwetire kaana kau Eri.

⁴ Mûka ûcio nîwagîre îvu rîngî na agîciara kavîcî, na agîgeta Onani.

⁵ Nîwacokire agîciara kavîcî na agîgatuîrîra rîîtwa Shela. Kavîcî kau gagîciarwa Juda aarî Akizibu.

⁶ Juda nîwacarîrie Eri mwana wake wa îrikithathi mwîrîtu wetagwa Tamarû atuîke mûka.

⁷ Nwatî mîtugo ya Eri yarî mîcûku na ndîakenagia Ngai-Mûnene, kwoguo Ngai-Mûnene nîwamûragire.

⁸ Juda nîwerire Onani mûrwang'ina na Eri atîrî, “Thiî ûmenyane kîîmwîrî na Tamarû ûrîa ûratigirwe nî mûrwanyûkwe akua na wîke ûrîa kwagîrîrîte, nîguo ûciarîre mûrwanyûkwe ciana.”

⁹ Nwatî Onani nîwamenyire atî ciana icio itîgaatuîka ciake. Kwoguo rîrîa rîonthe amenyana kîîmwîrî na mûka wa mûrwang'ina nîwetûrûraga vinya wa ûciari nthî nîguo ndagaciarîre mûrwang'ina ciana.

¹⁰ Ûndû ûcio Onani eekire nîwarakaririe Ngai-Mûnene, na Ngai-Mûnene akîmûraga wanake.

¹¹ Juda nîwerire Tamarû mûka wa mûvîcî atîrî, “Coka ûgekare kwa aguo ûrî mûka wa ndigwa, nginya rîrîa Shela mûvîcîwa agaakûra.” Juda aamwîrire ûguo nîûndû nîwetigagîra akîona takwa Shela angîûragwa ta aa mûrwang'ina. Kwoguo Tamarû nîwacokire kwao.

¹² Vuvarî mûka wa Juda, ûrîa warî mwarî wa Shua nîwakwire. Rîrîa Juda aathiririe mîthenya yake ya gûcakaya, ke na mûrata wake Hira ûrîa Mûadulamu nîmaathiîre Timuna kûrî andû arîa meenjaga ng'ondu ciake guoya.

¹³ Tamarû nîwerirwe nî mûndû atî îthe wa mûthuuriwe, nîwathiîte Timuna kwenja ng'ondu ciake guoya.

¹⁴ Kwoguo nîwarutire nguo irîa ciîkagîrwa nî aka a ndigwa, na agîîkunîka ûthiû na gîtambaa. Nîwacokire akîthiî agîkara nthî kîvingorî Kîam îtûûra rîa Enaimu njîrarî ya kûthiî Timuna. Tamarû nîwamenyete atî mwanake ûrîa warî kîvinga nda Kîam Juda wetagwa Shela aarî mûgima na ndaanenganagîrwa kûrî ke nîguo amûvikie.

¹⁵ Juda amwona eeciririe nî mûmaraa nîûndû Tamarû nîwekunîkîte ûthiû.

¹⁶ Juda nîwathiîre kûrî Tamarû mûkîrarî wa njîra, na akîmwîra atîrî, “Ûka tûmenyane nawe kîîmwîrî.” (Juda akîmwîra ûguo ndaamenyaga kana nî mûka wa mûvîcî aaragîria.) Nake Tamarû nîwamûririe atîrî, “Nîûmva ndûî nîguo mbûke tûmenyane nawe kîîmwîrî?”

¹⁷ Juda nîwacokirie atîrî, “Nîngûgûtûmanîra koori kuuma kûrî ndîthia yakwa.” Tamarû nîwamûririe atîrî, “Kûrî kîndû ûkûndigîra nîguo nîînyitagîre nginya rîrîa ûkaandûmanîra koori?”

¹⁸ Juda nîwamûcokerie atîrî, “Nîndûî ûkwenda ngûtigîre?” Tamarû nîwamwîrire atîrî, “Mûvûri waku na mûkathî waguo, na mûragi ûcio ûnyitîte.” Nake Juda Nîwamûvere indo icio eetirie. Nîmaacokire makîmenyana kîîmwîrî, na Tamarû akîgîa îvu.

¹⁹ Nake Tamarû nîwaûkîrire akîthiî mûciî na akîruta gîtambaa kîrîa eekunîkîte ûthiû nakîo na agîkîra nguo îrîa îkagîrwa nî mûka wa ndigwa.

²⁰ Juda nîwatûmire Hira, Mûadulamu ûrîa mûrata wake akavire koori kûrî mûndûmûka ûcio nîguo oce indo irîa aamûtigîrîte. Nwatî Hira ndoona mûndûmûka ûcio.

²¹ Hira nîwaûririe andû a îtûûra rîu atîrî, “Mûndûmûka mûmaraa ûrîa wekarîte ava rûtere rwa njîra ya Enaimu arî kû?” Nao nîmaamûcokerie atîrî, “Gûtirî mûmaraa wanethîrwa arî ava.”

²² Hira nîwacokire kûrî Juda na akîmwîra atîrî, “Nie ndinamwona. Wana andû a îtûûra rîu mambîrire atî vau vatîanethîrwa na mûmaraa.”

²³ Juda nîwacokirie atîrî, “Nîekare nacio tûtanecambithia. Ngûtûmire ûmûvirîre koori karîa twarîkanîre nake nwatî ndûnamwona.”

²⁴ Vuva wa mîeri îthatû Juda nîwerirwe atîrî, “Tamarû mûka wa mûvîcîguo ethîrîtwe akîvûra ûmaraa, na rîu arî îvu.” Juda nîwathanire akiuga atîrî, “Mûruteni nja ya îtûûra na mûmûvîvie.”

²⁵ Rîrîa aarutagwa nja, nîwatûmire mûndû kûrî îthe wa mûthuuriwe akîmwîra atîrî, “Mwene indo ino nîke ûmbîkîrîte îvu. Taroriani mûvûri ûyû, mûkathî, na mûragi ûyû mwone kana nîmûkûmenya nî cia û.”

²⁶ Juda nîwamenyire indo icio na akiuga atîrî, “Tamarû nî mûthingu kûngîra, nîûndû nînie nîraregire kûmûnenganîra kûrî mûvîcîwa Shela.” Juda ndaacoka kûmenyana kîîmwîrî nake rîngî.

²⁷ Rîrîa kavinda gake ga gûciara gaakinyire, nîkwamenyekire atî aarî na twana twa mathatha îvurî.

²⁸ Rîrîa twana tûu twaciaragwa, kamwe ga tuo nîkaarutire njara îmwe. Nake mûndû ûrîa wamûtethagia gûciara nîwocire rûrigi rûtune na akîrwoverera njararî yake, na akiuga atîrî, “Gaka nîko gaciarirwe mbere.”

²⁹ Nwatî nîgaacokirie njara yako ndaarî wa rîmwe, nako kau kengî gakiuma. Nake mûndû ûrîa wamûtethagia gûciara nîwaugire atîrî, “Nîwavota gwîtûrîra njîra e!” Kwoguo kaana kau nîgaatuîrîrwe rîîtwa Perezi.

³⁰ Nake mûrwang'ina ûrîa warî na rûrigi rûtune njararî nîwacokire agîciarwa na agîtuîrîrwa rîîtwa Zera.