Kîam 33 - ÎVUKU RÎA ÛVORO MWARO

¹ Jakovu nîwatiirire metho na akîona Esaû aûkîte arî na andû magana mana. Kwoguo Jakovu nîwagaanirie ciana ciake kûrî aka ake aîrî: Lea, na Rakeli na ndungata ciake cioîrî.

² Nîwaigire ciana irîa ciarî na ndungata ciake vamwe na ndungata icio mbere. Lea na ciana ciake nîmaarûmîrîre nake Rakeli na Josefu makîrigia.

³ Jakovu nîwathiîre amatongereretie na akînamîrîra nthî maita mûgwanja nginya agîkinya vakuvî na mûrwang'ina Esaû.

⁴ Nwatî Esaû nîwavinyûrire kûmûtûnga. Nîwamûkumbatire, akîmûmumunya na oîrî nîmaarîrire.

⁵ Rîrîa Esaû aatiirire metho na akîona aka na ciana, nîwaûririe atîrî, “Nî arîkû aya mûrî nao?” Jakovu nîwamûcokerie atîrî, “Mwathi wakwa! Ino nî ciana irîa Ngai andathimîte nacio.”

⁶ Nacio ndungata vamwe na ciana irîa maarî nacio nîmaathiîre vakuvî na makînamîrîra.

⁷ Lea na ciana ciake wanao nîmaathiîre vakuvî na makînamîrîra. Mûthiiarî Josefu na ng'ina Rakeli nîmaathiîre vakuvî na makînamîrîra.

⁸ Esaû nîwaûririe Jakovu atîrî, “Ikundi icio nacemania nacio ironania atîa?” Jakovu nîwamûcokerie atîrî, “Irarî cia gûtûma mbîtîkîrîke nîwe.”

⁹ Nwatî Esaû nîwamûcokerie atîrî, “Mûrwaiya, nie nîrî na indo cia kûmbîgana. Îigîre icio wî nacio.”

¹⁰ Jakovu nîwamûcokerie atîrî, “Naarî, ethîrwa nîmbîtîkîrîkîte nîwe, nakûthaitha wamûkîre kîveo gîakwa. Nîûndû nama, kwona ûthiû waku nî ta kwona ûthiû wa Ngai. Ûnyamûkîre na wendo mûnene atî, nakwona nona takwa nona ûthiû wa Ngai.

¹¹ Nakûthaitha wamûkîre kîveo gîkî nakûretere. Ngai nîandathimîte na nîrî na indo cia kwîgana.” Jakovu nîwamûringîrîrie nginya agîciamûkîra.

¹² Nake Esaû nîwaugire atîrî, “Nîtwîvarîrie tûthiî na nînie ngûtongoria.”

¹³ Jakovu nîwacokirie atîrî, “Mwathi wakwa, nîûramenya ciana ciakwa itirî na vinya, na kûrî na ng'ondu na ng'ombe irongia ndîthiarî yakwa, na nwa nie nîraimenyerera. Ingîvinyûrithua, wana ethîrwa nî mûthenya ûmwe tu cionthe nwa ikue.

¹⁴ Nakûthaitha mwathi wakwa ûthiî mbere yakwa, nanie mbûkage kavora kûringana na mûthiîre wa ndîthia yakwa na ciana ciakwa, nginya ngaakwîthîra Seiru (Edomu.)”

¹⁵ Esaû nîwacokire akiuga atîrî, “Tiga ngûtigîre arûme amwe aya nîrî nao.” Nwatî Jakovu nîwacokirie atîrî, “Gûtirî na vata wa kûndigîra o, nîûndû kîrîa ngwenda, nwa gwîtîkîrîka nîwe.”

¹⁶ Kwoguo mûthenya wa ûcio, Esaû nîwambîrîrie rûgendo na agîcoka Seiru (Edomu.)

¹⁷ Nwatî Jakovu nîwathiîre nginya Sukothu agîtuma nyomba yake na agîtumîra ndîthia yake rwaga. Kwoguo vandû vau vetagwa Sukothu.

¹⁸ Jakovu nîwakinyire îtûûrarî rîa Shekemu vûrûrirî wa Kanaani aumîte Padani-aramu arî na thayû. Nîwacokire akîamba îgema rîake vakuvî na îtûûra rîu.

¹⁹ Nîwacokire akîgûra gîcunjî Kîam mûgûnda, varîa aambîte îgema rîake. Aavagûrire mbeca cia sîlûva îgana rîmwe kuuma kûrî njiarwa cia Hemori ûrîa warî îthe wa Shekemu.

²⁰ Jakovu nîwatumire metha ya kîgongoona na agîta vandû vau Eli.