Kîam 28 - ÎVUKU RÎA ÛVORO MWARO

¹ Nake Isaka nîwetire Jakovu akîmûrathima na akîmwîra atîrî, “Ndûkaanagûre mwîrîtu Mûkanaani.

² Ûkîra ûthiî Mesopotamia kwa ûmaguo Bethueli, na ûgûre mwîrîtu ûmwe wa mamaguo Labani.

³ Ngai mwene vinya wonthe arokûrathima na akûve njiarwa nyîngî, nîguo ûgaatuîka îthe wa ndûrîrî nyîngî.

⁴ Arokûrathima we na njiarwa ciaku wata ûrîa aarathimire Iburahimu. Vûrûri ûyû ûtûûraga, na nîguo Ngai aaveere Iburahimu, ûrotuîka waku!”

⁵ Isaka nîwarekererie Jakovu athiî Padani-aramu (Mesopotamia) kwa Labani mûvîcî wa Bethueli, Mûaramea. Bethueli aarî mûrwang'ina wa Rebeka, ng'ina wa Esaû na Jakovu.

Esaû nîwavikirie mûndûmûka wîngî

⁶ Esaû nîwamenyire atî Isaka nîwarathimîte Jakovu na akamwîra athiî Padani-aramu (Mesopotamia) akagûrane kuo. Esaû nwa wamenyire atî Isaka akîrathima Jakovu, nîwamwîrire atî ndakanagûre mûndûmûka Mûkanaani.

⁷ Esaû nwa wonire atî Jakovu nîwathîkîre îthe na ng'ina, na nîwathiîre Padani-aramu.

⁸ Kwoguo rîrîa Esaû aamenyire atî aka a Kanaani matiakenagia îthe,

⁹ nîwathiîre kwa Ishumaeli mûvîcî wa Iburahimu na akîvikia mwarî wetagwa Mahalathi, ûrîa warî mwarwang'ina na Nebaiothi.

Kîroto kîa Jakovu arî Betheli

¹⁰ Jakovu nîwaumire Beerisheba na akîthiî Harani.

¹¹ Kîvwaî riûa rîathûa, nîwathiîre vandû na agîkara vo. Nîwocire îthiga rîmwe vo agîtiira kîongo narîo na akîmama.

¹² Nîwarotire akîona ngathî yumîte nthî îgakinya îgûrû na araika makaunûkagia na makanyûrûrûkaga nayo.

¹³ Nake Ngai-Mûnene nîwarûngamaga vakuvî nake akamwîra atîrî, “Nînie Ngai-Mûnene, Ngai wa Iburahimu na Isaka. We wa vamwe na njiarwa ciaku, nîngaamûva vûrûri ûyû ûmamîte.

¹⁴ Njiarwa ciaku nîikengîva ta mûthetu wa nthî. Nîigaatamba mîena yonthe ya nthî. Na njîra ya njiarwa ciaku, nîngaarathima mavûrûri monthe nthî.

¹⁵ Ririkana atî kûrîa kuonthe ûkaathiî, ngethagîrwa nîrî vamwe nawe na ngaakûgitagîra na ngûcokie vûrûrirî ûyû. Nie ndigaagûtiganîria nginya rîrîa ngaavingia maûndû monthe marîa nakwîrîra.”

¹⁶ Jakovu nîwaramûkire na akiuga atîrî, “Nama Ngai-Mûnene arî ava, na ndiraicî!”

¹⁷ Jakovu nîwegwire guoya na akiuga atîrî, “Kaî kûndû gûkû nîgwakûmakania-î! Nwanginya îno îthîrwe nî nyomba ya Ngai, na nî kîvingo gîa gûtonya îgûrû.”

¹⁸ Mûthenya ûcio wîngî kîraûko tene, Jakovu nîwaramûkire, agîoca îthiga rîrîa rîarî rungu rwa kîongo gîake na akîrîvanda rîrî rîa kîririkano, agîcoka akîrîtîrîria maguta akîrîamûrîra Ngai.

¹⁹ Nîwacokire agîtuîrîra vandû vau rîîtwa Betheli. (Nwatî îtûûra rîu mbere rîetagwa Luzi).

²⁰ Jakovu nîwacokire akîîvîta kûrî Ngai akiuga atîrî, “Ethîrwa ûkethagîrwa ûrî vamwe nanie, na ûngitagîre rûgendorî rwakwa, na ûmvecage irio na nguo,

²¹ na ûgaatûma njoke mûciî kwa vava na thayû, we Ngai-Mûnene, nîûgaatuîka Ngai wakwa.

²² Îthiga rîîrî rîa kîririkano navanda, rîkethagîrwa rîrî nyomba yaku ya kûgoocagîrwa. Ngaakûvecaga gîcunjî gîa îkûmi gîa kîrîa kîonthe ûkaamvecaga.”