Josh 21 - ÎVUKU RÎA ÛVORO MWAROMatûûra marîa manene ma Alawi 1 Atongoria a mbarî cia Lawi nîmaathiîre Shilo vûrûrirî wa Kanaani kûrî Eleazaru mûthînjîri-Ngai na kûrî Joshua mûvîcî wa Nuni na atongoria a mbarî cionthe cia mîvîrîga ya andû a Isiraeli. 2 Nao nîmaamerire atîrî, “Ngai-Mûnene nîwathanire na njîra ya Musa akiuga tûkaavewa matûûra manene ma kûrîa tûgatûûraga, na tûvewe mavûrûri marîa mamathiûrûrûkîrîtie kûrîa tûkarîthagia ndîthia cietû.” 3 Kwoguo wata ûrîa Ngai-Mûnene aathanîte, andû a Isiraeli nîmaaveere Alawi matûûra manene ma gûtûûra na mavûrûri ma kûrîthia kuuma mavûrûrirî marîa maagaîrîtwe. 4 Gwaikua mîtî, mbarî cia Kohathu nîo maarî a mbere kûvewa matûûra. Kwoguo Alawi arîa maarî njiarwa cia Aroni ûrîa warî mûthînjîri-Ngai nîmaagaîrwe matûûra manene îkûmi na mathatû kuuma mîvîrîgarî ya Juda, Simeoni, na Benjamini. 5 Nao acio engî a mbarî ya Kohathu nîmaagaîrwe matûûra îkûmi kuuma mavûrûrirî ma mîvîrîga ya Efiraimu, Dani na Manase ya mwena wa îthûîro. 6 Mbarî ya Gerishoni nîyagaîrîtwe matûûra manene îkûmi na mathatû kuuma mavûrûrirî ma mîvîrîga ya Isakaru, Asheri, Nafutali na Manase ya mwena wa îrathîro. 7 Mbarî ya Merari nîmaagaîrwe matûûra manene îkûmi na maîrî kuuma mîvîrîgarî ya Reubeni, Gadi na Zebuluni. 8 Na njîra ya gwikia mîtî andû a Isiraeli nîmaagaîre Alawi matûûra mau monthe wa vamwe na kûndû gwa kûrîthia wata ûrîa Ngai-Mûnene aathîte Musa. 9 Mama nîmo marîîtwa ma matûûra manene kuuma mavûrûrirî ma Juda na Simeoni marîa maaverwe 10 njiarwa cia Aroni irîa ciarî cia mbarî ya Kohathu ûrîa warî wa njiarwa cia Lawi. Nîo maarî a mbere kûgaîrwa na njîra ya gwikia mîtî. 11 Nîmaaveerwe Kîriathi-arima (Ariba nîke îthe wa Anaki) na nîyo îtagwa rîu Heburoni vûrûrirî ûrîa ûrî irîma wa Juda, vamwe na mavûrûri ma kûrîthia marîa mathiûrûrûkîrîtie îtûûra rîu. 12 Nwatî mîgûnda ya îtûûra rîu wa vamwe na icagi cia rîo, ciaveetwe Kalebu mûvîcî wa Jefune ûrî wao. 13 Njiarwa cia Aroni mûthînjîri-Ngai nîciaverwe Heburoni, îtûûra rîa kwîthitha wa vamwe na matûûra mengî ta: Libuna, 14 Jatiru, Eshitemoa, 15 Holoni, Debiri, 16 Aini, Juta, na Bethi Shemeshi wa vamwe na kûndû gwa kûrîthia. Matûûra mau monthe maarî kenda na maarî vûrûrirî wa Juda na vûrûrirî wa Simeoni. 17 Kuuma vûrûrirî wa Benjamini nîmaaveerwe matûûra manene mana. Namo matûûra mau maarî: Gibeoni, Geba, 18 Anathothi na Alimoni wa vamwe na kûndû gwa kûrîthia. 19 Matûûra manene marîa maaverwe njiarwa cia Aroni, mûthînjîri-Ngai wa vamwe na kûndû gwa kûrîthia maarî îkûmi na mathatû. 20 Mbarî icio ciîngî cia Kohathu a mûvîrîga wa Lawi nîmaaveerwe matûûra kuuma vûrûrirî wa mûvîrîga wa Efiraimu. 21 Nao nîmaaveerwe îtûûra rîa Shekemu rîrîa rîrî vûrûrirî ûrîa ûrî irîma wa Efiraimu. Nîmaaveerwe Gezeri, 22 Kibuzaimu, na Bethi-horoni. Matûûra mau monthe maarî mana vamwe na kûndû gwa kûrîthia. 23 Kuuma vûrûrirî wa mûvîrîga wa Dani nîmaaveerwe Eliteke, Gibethoni, 24 Aijaloni, na Gathirimoni. Maaverwe matûûra mau mana vamwe na kûndû gwa kûrîthia. 25 Kuuma vûrûrirî wa mûvîrîga wa Manase ûrîa ûrî mwena wa îthûîro nîmaaveerwe matûûra manene maîrî. Namo matûûra mau vamwe na kûndû gwa kûrîthia maarî: Taanaki na Gathirimoni. 26 Matûûra manene marîa maaverwe mbarî icio ciîngî cia Kohathu maarî îkûmi wa vamwe na kûndû gwa kûrîthia. 27 Mbarî ya Gerishoni a mûvîrîga wa Lawi wanao nîmaaveerwe matûûra mao kuuma vûrûrirî wa nuthu îo îngî ya mûvîrîga wa Manase îtûûra rîa Golani rîrîa rîrî Bashani (îtûûra rîmwe rîa kwîthithaga) na Beeshitera. Matûûra mau maarî vamwe na kûndû gwa kûrîthia. 28 Kuuma vûrûrirî wa mûvîrîga wa Isakaru nîmaaveerwe matûûra manene mana vamwe na kûndû gwa kûrîthia. Namo nî: Kishioni, Daberathi, 29 Jarimuthi na Enganimu. 30 Kuuma vûrûrirî wa mûvîrîga wa Asheri nîmaaveerwe matûûra mana vamwe na kûndû gwa kûrîthia. Namo nî: Mishali, Abudoni, 31 Helikathu, na Rehobu. 32 Kuuma vûrûrirî wa mûvîrîga wa Nafutali nîmaaveerwe matûûra manene mathatû. Namo nî: Kedeshi vûrûrirî wa Galili (îtûûra rîmwe rîa kwîthitha), Hamothi Doru na Karitani vamwe na kûndû gwa kûrîthia. 33 Matûûra monthe marîa maaverwe mbarî cia Gerishoni maarî îkûmi na mathatû wa vamwe na kûndû gwa kûrîthia. 34 Alawi acio engî a mbarî ya Merari nîmaaveerwe matûûra mana vamwe na kûndû gwa kûrîthia. Matûûra mau maaumire mûvîrîgarî wa Zebuluni. Namo maarî: Jokineamu, Karita, 35 Dimuna na Nahalali. 36 Kuuma mûvîrîgarî wa Reubeni nîmaaveerwe matûûra manene mana vamwe na kûndû gwa kûrîthia. Namo maarî: Bezeri, Jahazi, 37 Kedemothi na Mefathi. 38 Kuuma mûvîrîgarî wa Gadi nîmaaveerwe Ramothu îtûûra rîrîa rîrî Gileadi (îtûûra rîmwe rîa kwîthitha), Mahanaimu, 39 Heshiboni na Jazeri. Mau maarî matûûra manene mana vamwe na kûndû gwa kûrîthia. 40 Kwoguo mbarî ya Merari a mûvîrîga wa Lawi arîa maatigarîte nîmaaveerwe matûûra îkûmi na maîrî. 41 Mûvîrîga wa Lawi nîwaverwe matûûra manene mîrongo îna na manana kuuma mavûrûrirî marîa maagaîrîtwe andû a Isiraeli. 42 Matûûra mau monthe maarî na kûndû gwa kûrîthia kûmathiûrûrûkîrîtie. Aisiraeli nîmegwatîre vûrûri 43 Ngai-Mûnene nîwavere andû a Isiraeli vûrûri wonthe ûrîa eerîrîte methe mao ma tene na mwîvîtwa atî nî akaamava. Kwoguo andû a Isiraeli nîmegwatîre vûrûri ûcio na magîtûûra kuo. 44 Ngai-Mûnene nîwerîrîte methe ma tene ma andû a Isiraeli atî nîagaatûma matûûrage na thayû vûrûrirî wao wonthe. Nake nîwavingirie kîîranîro kîu. Gûtirî wana îmwe ya nthû ciao îngîavotire kûrûa nao, nîûndû Ngai-Mûnene nîwamavere ûvootani kûrî nthû ciao cionthe. 45 Nacio ciîranîro cionthe mbaro irîa Ngai-Mûnene eerîrîte andû a Isiraeli nîciavingirue cionthe. |
©Bible Society of Kenya, 2019
Bible Society of Kenya