Josh 16 - ÎVUKU RÎA ÛVORO MWARO

Vûrûri ûrîa wagaîrwe Efiraimu na Manase a mwena wa îthûîro

¹ Mûvaka wa vûrûri ûrîa wagaîrwe njiarwa cia Josefu, wambîrîrîtie rûnjîrî rwa Jorodani mwena wa îrathîro wa ithimarî cia Jeriko. Nîwavîtûkîrîrîte werûrî ûkathiî kinya Betheli vûrûrirî ûrîa ûrî irîma.

² Kuuma Betheli nîwathiîte kinya Atarothi Adari ûvîtûkîrîte Luzi. Atarothi Adari nîkuo gwatûûraga Ariki.

³ Nîwacokete ûkathiî na mwena wa îthûîro vûrûri wa Jafileti na ûkîthiî nginya Bethi Horoni ya mwena wa ngurumo. Nîwavîtûkîte kinya Gezeri na ûkîthirîra îriarî rîa Mediterania.

⁴ Kwoguo Efiraimu na Manase îrîa îrî mwena wa îthûîro nîo maagaîrwe vûrûri ûyû ûtuîke wao. Efiraimu na Manase maarî njiarwa cia Josefu.

Efiraimu

⁵ Mbarî cia mûvîrîga wa Efiraimu maagaîrwe vûrûri kuuma Atarothu-Adari mwena wa îrathîro na ûkathiî nginya mwena wa îgûrû wa Bethi Horoni.

⁶ Kuuma Bethi Horoni nîwathiîte ûkathirîra îriarî rîa Mediterania. Mikimethathi yarî mwena wa rûgûrû. Kuuma Mikimethathi nîwegatîte na mwena wa îrathîro werekerete Taanathi-shilo na ûkathiî mbere mwena wa îrathîro nginya Janoa.

⁷ Kuuma Janoa nîwanyûrûrûkîte ûkathiî Atarothi na Naara, ûgîkinya Jeriko na ûkîthirîra rûnjîrî rwa Jorodani.

⁸ Mûvaka nîwaumîte Tapua ûkathiî na mwena wa îthûîro nginya karûnjîrî ga Kana na ûkîthirîra îriarî rîa Mediterania. Ûcio nîguo vûrûri ûrîa wagaîrwe mbarî cia mûvîrîga wa Efiraimu ûtuîke wao,

⁹ vamwe na matûûra mamwe na icagi imwe irîa ciarî vûrûrirî ûrîa wagaîrîtwe mûvîrîga wa Manase, nwatî nîciagaîrwe mbarî cia mûvîrîga wa Efiraimu.

¹⁰ Kûnarî ûguo mûvîrîga wa Efiraimu ndwengata andû a Kanaani arîa matûûraga Gezeri. Andû acio nwa maathiîre na mbere gûtûûra kuo vamwe na andû a mûvîrîga wa Efiraimu. Akanaani matûûraga kuo na nîmarutithagua wîra na vinya marî ngombo.