Johana 7 - ÎVUKU RÎA ÛVORO MWARO

Jesû na arîa maaciaranîrîtue nake

¹ Vuva wa ûguo, Jesû nîwathiîre Galili. Ke ndeendaga kûthiî Judea nîûndû Ayahudi arîa maarî kuo nîmeendaga kûmûraga.

² Na kîrugo Kîam Ayahudi gîa gwîkara tûnyombarî vîndî ya maketha nîgîakinyire.

³ Kwoguo arîa maaciaranîrîtue na Jesû nîmaamwîrire atîrî, “Uma gûkû na ûthiî Judea nîguo arûmîrîri aku makoone maûndû marîa ûreka.

⁴ Mûndû wa wonthe wendaga kûmenyekana ndathithaga andû maûndû marîa ke areka. Ethîrwa we nîûreka maûndû mama, tiga andû onthe makûmenye!”

⁵ (Wana nginya arîa maaciaranîrîtue nake matiamwîtîkia.)

⁶ Nake Jesû nîwamerire atîrî, “Îvinda rîakwa rîrîa rîagîrîrîte tî rîkinyu, nwatî kûrî mue îvinda wa rîonthe nîrîagîrîru.

⁷ Andû a nthî matingîmûmena, nwatî nie nîmamenete nîûndû nînîmeraga atî nîmekaga maûndû macûku.

⁸ Mue thiîni kîrugorî. Nie ndikûthiî kuo nîûndû îvinda rîakwa rîrîa rîagîrîru tî rîkinyu.”

⁹ Nake arîkia kûmeera ûguo nîwekarire kûu Galili.

Jesû nîwathiîre kîrugorî gîa gwîkara tûnyombarî

¹⁰ Vuva wa arîa maaciaranîrîtue na Jesû kûthiî kîrugorî kîu, Jesû wa nake nîwathiîre nwatî ndathiî akîonagwa aathiîre na nthitho.

¹¹ Nao atongoria a Ayahudi nîmaamûcaririe mûno kûu kîrugorî na makîûria atîrî, “Ke arî kû?”

¹² Nao andû eengî nîmaambîrîrie kwaria na kîvwe ûvoro ûmwîgiî. Andû amwe maaugaga atîrî, “Ke nî mûndû mwaro,” na engî makauga atîrî, “Naarî nîaravîtithia andû.”

¹³ Nwatî gûtirî mûndû wana ûmwe waririe ûvoro ûmwîgiî andû makîgucaga, nîûndû nîmeetigagîra atongoria a Ayahudi.

¹⁴ Rîrîa kîrugo Kîamgeerie gûkinya gatagatî, Jesû nîwatonyire hekarûrî na akîambîrîria kûthomithania.

¹⁵ Nao atongoria a Ayahudi nîmaamakire mûno na makîûria atîrî, “Mûndû ûyû aramenya maûndû mama monthe atîa na ke ndaanathomithua?”

¹⁶ Nake Jesû nîwamacokerie atîrî, “Maûndû marîa nthomithanagia matiumîte kûrî nie, nwatî maumîte kûrî Ngai ûrîa wandûmire.

¹⁷ Mûndû wa wonthe wendaga kûvingia wendi wa Ngai nîamenyaga kana maûndû marîa nthomithanagia maumîte kûrî Ngai, kana mbaaragia na wathani wakwa.

¹⁸ Mûndû ûrîa waragia na wathani wake ke mwene, nîgwîkumia ekumagia. Nwatî mûndû ûrîa wendaga ûrîa wamûtûmire akumue nîwîthagîrwa arî mwîvokeku na ndaveenanagia.

¹⁹ Na kinthî Musa tîke wamûveere watho? Nwatî gûtirî mûndû wana ûmwe gatagatîrî kenyu wathîkagîra watho. Mûrenda kûmbûraga nîkî?”

²⁰ Nao andû nîmaamûcokerie atîrî, “We wîna ngoma! Nû ûrenda gûkûûraga?”

²¹ Jesû nîwamacokerie atîrî, “Naamûringîre Kîamma kîmwe, na muonthe mûkîmakua nîkîo.

²² Musa aamwathire mûruithagie tûvîcî twenyu (wana gûtuîka mûtugo ûcio ndwambîrîrue nî Musa, nwatî wambîrîrue nî methe menyu ma tene) na kwoguo rîu nîmûruithagia tûvîcî mûthenya wa thavatû.

²³ Ethîrwa mûruithagia kavîcî mûthenya wa thavatû nîguo mûtikaune watho wa Musa, mûrandakarîra nîkî navonia mûndû ûyû mwîrî wonthe mûthenya wa thavatû?

²⁴ Tigani gûtucanagîra ciira kûringana na ûrîa maûndû monekaga mekariî, nwatî tucanagîrani ciira kûringana na ivooto.”

Andû nîmaaûririe kana Jesû nîke Mesaya

²⁵ Nao andû amwe a Jerusalemu nîmaaugire atîrî, “Na kinthî ûyû tîke mûndû ûrîa atongoria marenda kûûraga?

²⁶ Taroriani araria andû onthe makîgucaga na gûtirî ûndû atongoria maramwîra! Nwa kûvoteke Ayahudi methîrwe nîmamenyete na ma atî Jesû nîke Mesaya?

²⁷ Nwatî rîrîa Mesaya agaaûka, gûtirî mûndû wana ûmwe ûkaamenya kûrîa ke aumîte. Tuonthe nîtwîcî kûrîa mûndû ûyû aumîte.”

²⁸ Rîrîa Jesû aathomithanagia hekarûrî, nîwanîrîre akiuga atîrî, “Mue nama nîmûmbîcî na mûkamenya kûrîa nyumîte? Nwatî nie tînie nîîtûmîte. Ûrîa wandûmire nî wa ma na mue mûtimwîcî,

²⁹ nwatî nînîmwîcî, nîûndû nie naaumire kûrî ke na nîke wandûmire.”

³⁰ Andû amwe arîa maarî vo nîmaageririe kûmûnyita, nwatî gûtirî mûndû wana ûmwe wamûvûrûririe nîûndû îvinda rîake rîtiarî rîkinyu.

³¹ Nao andû eengî nîmaamwîtîkirie na makiuga atîrî, “Rîrîa Mesaya agaaûka, nîakaaringa ciama nyîngî gûkîra irîa cianaringwa nî mûndû ûyû?”

Arangîri nîmaatûmirwe makanyite Jesû

³² Afarisai nîmegwire andû makîaria na kîvwe ûvoro wîgiî Jesû. Kwoguo Afarisai acio marî vamwe na anene a athînjîri-Ngai, nîmaatûmire arangîri mathiî makanyite Jesû.

³³ Nake Jesû nîwamerire atîrî, “Nîmbîthîrwa nîrî vamwe namue kavinda gakuvî, na vuvarî njoke nthiî kûrî ûrîa wandûmire.

³⁴ Mue nîmûkaanjaria na mûtikaamona nîûndû mûtikaavota kûthiî kûrîa nie ngeethîrwa nîrî.”

³⁵ Nao atongoria a Ayahudi nîmeeranire atîrî, “Ke arenda kûthiî kû kûu tue tûtakaamwona? Arenda kûthiî matûûrarî ma Angiriki kûrîa andû etû matûûraga nîguo akathomithie Angiriki?

³⁶ Ke arauga nîtûkaamûcaria na tûtikaamwona na atî tûtingîvota kûthiî kûrîa ke akeethîrwa arî. Akiuga ûguo-rî, arenda gûtwîra atîa?”

Tûrûnjî twa manjî marîa mavecanaga mwoyo

³⁷ Mûthenya ûrîa warî wa mûthiia na wa vata mûno wa kîrugo, Jesû nîwarûngamire na akîanîrîra akiuga atîrî, “Mûndû wa wonthe mûnyondu nîaûke kûrî nie, na anyue,

³⁸ na wata ûrîa mandîko matheru maugîte, ‘Ngororî ya mûndû wa wonthe ûmbîtîkîtie gûkaaumaga tûrûnjî twa manjî marîa mavecanaga mwoyo.’ ”

³⁹ Nake Jesû akiuga ûguo aaragia ûvoro wîgiî Roho Mûtheru, ûrîa warî avewe arîa maamwîtîkirie. Vîndî îo Roho ndaarî mûvecane nîûndû Jesû ndaarî mûve riiri wake.

Andû nîmaamûkanire

⁴⁰ Andû amwe arîa maarî vo nîmegwire akiuga ûguo na makiuga atîrî, “Na ma mûndû ûyû nî Mûrathi!”

⁴¹ Nao andû amwe nîmaaugire atîrî, “Ke nîke Mesaya!” Nwatî andû engî nîmaaugire atîrî, “Anga Mesaya akaauma îtûûrarî rîa Galili?

⁴² Na kinthî mandîko matheru matiugîte atî Mesaya akeethîrwa arî wa mbarî ya Mûthamaki Daudi, na atî ke agaaciarîrwa îtûûrarî rîa Bethilehemu kûrîa Daudi aatûûraga?”

⁴³ Kwoguo andû arîa maarî vo nîmaamûkanire nîûndû wa Jesû.

⁴⁴ Andû amwe nîmeendaga kûmûnyita, nwatî gûtirî wana ûmwe wamûvûrûririe.

Anene a Ayahudi nîmaaregire gwîtîkia

⁴⁵ Rîrîa arangîri maacokire, anene a athînjîri-Ngai na Afarisai nîmaamaûririe atîrî, “Mûregire kûrete Jesû nîkî!”

⁴⁶ Nao arangîri nîmaamacokirie atîrî, “Gûtirî mûndû wanaaria maûndû marîa mûndû ûyû araria!”

⁴⁷ Nao Afarisai nîmaaûririe arangîri acio atîrî, “Anga wa namue mûrî aritie nîke?

⁴⁸ Mwanegua mûtongoria wana ûmwe wana kana Mûfarisai wîtîkîtie Jesû?

⁴⁹ Andû acio matiîcî Watho wa Musa, na kwoguo nîarume!”

⁵⁰ Mûfarisai ûmwe wa arîa maarî vo aarî Nikodemu, ûrîa na vau mbererî wathiîte kûrî Jesû. Nake nîwerire acio engî atîrî,

⁵¹ “Kûringana na Watho wetû tûtingîvota gûtuîra mûndû ciira, tûtambîte kwîgua ûrîa akuga na kûmenya ûrîa ke ekîte.”

⁵² Nao nîmaamûcokerie atîrî, “Anga wa nawe wî wa kuuma îtûûrarî rîa Galili? Tuîria waro Mandîkorî Matheru wone atî gûtirî mûrathi ûkaauma îtûûrarî rîa Galili.”

⁵³ Nao onthe nîmeenûkire wa mûndû gwake mûciî.